كسرة كلب

البارت 21

#كسرة_كلب
البارت 21
بقلمي روسكان
لبيج قصص روسكان
بعد 3سنوات :
حنين ..مرت عليه 3سنوات ..صارت عنجي بنيه سميتهه ريم وصدوك ريم فدوة لكلبهه (عيون الريم هي عيون الغزال الواسعه) جرة عيونهه تشبه جرة عيون ابوهه وابيض مني ودنفوشه والستوتات تمريات وبضوة الشمس يصيرن ع شكار دمهه يلعب تنحب صار عمرهه 3سنين واني تخرجت العام من الكليه ورغم ما حالتي الماديه جانت اكثر من زينه لان تقاعد بابا الله يرحمه بعدني استلمه وتقاعد همام لان.... لان بعد ما ايسنه من رجعته عمي طلعله شهاده وفاة وصارله قبر رمزي نروحله نزوره ..وداعه بنتي اكتب هذا الكلام وبكلبي غصه وخنكه بس رب العالمين يعلم بيهه..
وبيت اهلي بعده ماجر واجارة يوصلني كامل كل نهايه شهر اشتريت سيارة صول بدل عن سيارة بابا الي بعتهه علمود الفديه  يكولون عليهه بناتيه صغيرة لونهه زيتوني سكنت فترة يم بيت عمي بس ماتحملت ابقه بمكان مابي ريحه همام ..بغيابه حيل تعلقت بي رغم ماعرفته شهر واحد بس وماتذكر منه غير بس الحنيه والذكريات الحلوة وعشت 3سنين ع ذكراه ورجعت لبيتي الي جمعني بي اني وريمه ولحيت ع عمي يشوفلي واسطه علمود اتعين وصدوك تعينت بس مو ع اختصاصي  واني جنت رايده هيج تعينت معلمه حضانه برياض اطفال علمود ماعرف ريمه وحيدهه وخالتي تعبت صحتهه بالفترة الراخت بعد متكدر تداري بنتي فكمت اداوم روضه وبنتي تروح وترجع وياي جان دوامنه من ساعه 8الصبح للساعه 2الظهروبيت عمي ابد ماعترضوا للتهيت بدوامي وببنتي ريمه.
بدة الدوام مثل اي يوم اعتيادي كعدت الصبح بدلت وتريكت وريمه مرات تكعود ومرات اخذهه للحضانه نايمه وهناك اريكهه واليوم ريمه نايمه ورحنه للحضانه ساعات وخلص دوامي واخذت بنتي وطلعت دا اصعد بالسيارة من بعد ماصعدت ريم بكرسي الاطفال واشوف سيارتي صاير بنجر احد ثاقبلي اطار السيارة..شلون ياربي عندي سبير بس ماكدر ابدله مادبرهه ..حايرة ووياي طفله وظهريه.

حازم..عمري ماعرف شكد عمري ،بيتنه بحي العامل عندي سيارة النترا تكسي اشتغل بيهه ع باب الله..وعندي امي وابويه عايشين الحمدلله ..ذكرياتي تنحصر ب 3سنوات الفاتت فقط ..ماتذكر قبلهه شصار وشجنت لان فقدت الذاكرة بحادث صارلي من 3سنوات.
حنين..دنيا الظهر صح ساعه 2وشتا وناس قليلين بالشارع ظليت حايرة منو يبدلي التاير كلت خلي ااشر للسيارات بلكي واحد ابو غيرة يبدلي التاير وصدوك الله هيالي واحد وكفلي شاب عنده سيارة تكسي ووياه مرة جبيرة كاعده جانت بالصدر ارتاحيت شويه من شفتهه لان الولد جان مو كولش جبير بعده شاب..
نزل الرجال والشمس بعيني..
ها الله يساعدهم..
حواسي كولهه تحفزت وانتبهت هذا الصوت مو غريب عليه ..
تقرب عليه واني خليت ايدي فوك راسي هيج علمود اوخر ضوة الشمس من عيوني شويه ..جسمي يرجف اريد اوكف رجليه متشيلني..اسمعه يكولي هاخويه محتاجه شي ؟؟
واشوف الصدمه..
همااام !!!
للحكايه بقيه..
اعرف البارت كولش قصير بس عندي مناسبه واذا صارلي مجال اعوضكم بالليل واذا لا اعذروني تفاعلو عاد باللايكات موصعبه ترة ..سلامي.