قبل التلاشي قبل الغرق

قبل التلاشي .. قبل الغرق ١

#قبل_التلاشي_قبل_الغرق
بقلم #روز_الفياض
ج١
.
.
.
مااصعب ان تشعر بالغربة والحنين الى الناس وانت في وسطهم ...
مااصعب ان تحس انك غير موجود رغم وجودك معهم ..
مااصعب ان تكتشف انك كنت جسرا واداة لمن حولك للوصول الى احلامهم وتحقيق امانيهم ومبتغاهم دون الالتفات الى مشاعرك وجهدك وتفانيك .. ان تكتشف بعد كل هذه السنين انك انكرت ذاتك من اجل من انكروا وجودك ..
ومااشد ان تغرق وتبدأ بالتلاشي امام اعينهم ولكنهم يكتفون بالتفرج ..
يكتفون بالتظاهر انك لست منهم ..
فهل تنجو من الغرق؟
وهل من خلاص قبل التلاشي؟
هل تقدر على مواجهة الموقف وتتخذ موقفا آخر؟
هل تستطيع تغيير نفسك وتجاهل مشاعر الحنين والعطاء وانكار الذات لكي لاتعيد الخطأ مرتين؟
وهل للعمر بقية لكي تتعض؟..

.....................................................

تتذكرون ايام التسعينات؟
تتذكرون ايام الحصار؟

هواي منه عاشوا ايام الحصار وشافوا الضيم على اصوله ..
شكد اكو فقراء اليوم بس مو بكد الفقراء بذاك الوكت ..
( ٩٠ % ) من الشعب عانى الفقر ..
بس دائما وبكل زمان ومكان اكو ناس تعيش تحت خط الفقر بالنسبة لمستوى المحيط العايشة بي ..

جنت طفل زغير عمري (١٢) سنة يعني بالسادس ابتدائي من ابوي الله يرحمه اتزوج على امي وهجرنه وهجرها ...

ابوي جان سايق تكسي ..
اتعرف على معلمة ممتزوجة وجبيرة وعدها فلوس وذهب وبيت وماعدها احد عدها اخت وحده متزوجة خارج العراق ..
ابوي مصدك شافها انطته مجال وهي مصدكت لكتلها واحد مثل ابوي حتى اتجلب بي ..
مو لان ابوي جان شخصية ولا لان جان وسيم وحلو لا .. بس على كولتهم الغريق يتعلق بقشايه ..
وحده جبيرة بالعمر وماعدها احد ومو حلوة بكل المقاييس بس عدها جم فلس طمعت ابوي بيهن ..
وابوي هم ينطبق عليه نفس المثل ...

جان ابوي كوه معيشنه (٣) ولد و( ٣) بنات وهو وامي ..
وكل احنه بالمدارس وكلها تريد منه اكل وشرب ولبس وطبيب وغيرها وغيرها ..
امي جانت تخيط عبي ام راس للنسوان ..
كل شهر يمكن تجيها عباية وحده لان الناس بالحصار وينها ووين اللبس والكشخه ...
مسكينه امي اول وحده بالنسوان تخيط عبي وعبايتها حمرة من الشمس ..
ومن جددتها كلبتها على ظهرها لان ماعده ابوي يشتريلها عباية جديدة ..
وبعدما قدمت هالعباية مذبتها ..
ودتها للسوك وصبغتها من جديد ...
من اتذكر ينعصر كلبي على امي ... شكد اتحملت علمود نعيش ..
الشي الوحيد الصحيح اللي حصلته المرأه العراقية من الحكومات اللي حكمت العراق على مدى سنين هو لقب الماجدة ..
وفعلا هي ماجدة .. هذا الكلام مااذكره لتزكية لاحد سواء فرد او حكومة ولكن من باب قول الحقيقية .. اقل مايقال عن العراقية هي هذه الكلمة وهي قليلة بحقها ..
من اباوع واتذكر التعب بوجه امي اكول امي مو مال كلمة وتوفيها حقها ..
ولامال تمثال .. ولا مال هدية .. امي بس الجنة تجازيها على صبرها علينه وتربيتنه بذيج الايام السوده ..