قبل التلاشي قبل الغرق

قبل التلاشي قبل الغرق ٣

#قبل_التلاشي_قبل الغرق
بقلم #روز_الفياض
ج٣
.
.
.
عندما يتعود الانسان على العطاء فانه في بعض الاحيان ينسى كيف ياخذ وهذا مايجعل المحيطين به ينسون وجوده كذلك لانهم تعودوا على الاخذ فقط لا على العطاء .
.
.
كبروا اخواني واني كبرت وصار عمري ١٨ سنة واني مثل مااني اكرب واشتغل من الصبح للعصر ..
يوم ادفع العربانة عربنجي يعني ويوم اشوف التاجر الفلاني مدخل بضاعة اروح اشتغل حمال ادخل البضاعة ويه العمال للمخزن وبعد الغدا استغل جايجي اسوي قوري جاي جبير وافتر على اهل البساطي والمحلات ابيعلهم جاي مهيل ..
وخلصت سنوات طفولتي على هالمنوال ..
جنت اطلع باليوم شي بسيط يادوب يكفينه اكل وشرب بس مرات جان الحجي ابو بشير يخلي بيدي هالاف دينار والالفين خصوصا بالعيد جان يطيني عيديتي قبل اسبوع :
هاك ..
حازم :
شنو هاي حجي ؟
ابو بشير :
هاي عيدية ..
حازم :
عمي كبرنه بعد مو مال عيدية .
ابو بشير :
اخذ .. اخذ .. مد ايدك اخذ ..
حازم :
حجي والله عندي الحمدلله .
ابو بشير :
ادري عدك الله يرزقك بس هاي عيدية .
حازم :
شكبرني اصير بعد وانت تطيني عيدية ههه ؟
ابو بشير :
هاي مو الك .. هاي لاخوانك وخواتك .

مديت ايدي اخذت الفلوس واني مستحي بس بداخلي فرحان .. هاي الالف دينار جانت هواااي بالنسبة لواحد بمثل حالتي ..
هالفلوس اللي جان يطينياها جنت احرص مااصرف منها ولا استخدمها بالاكل والشرب والصرف على البيت واحتياجاته لان مرات خواتي واخواني يحتاجون اشياء للمدرسة وماعندي .. اللي يحتاج قميص واللي يحتاج حذاء واللي يحتاج ملزمة خصوصا سلوى اختي جانت بالسادس اعدادي ومااكدر اخليلها مدرس خصوصي اقل مدرس جان ياخذ ( ٢٥ ) الف وهذا المبلغ لو اشتغل ليل ونهار مااكدر اطلعه .. عالاقل جنت احاول اشتريلهم ملازم هذا اللي اكدر عليه .

ومرات جان الحجي من يعرف امي مريضة هم جان يطيني شي بسيط ويكلي :
اخذ امك للطبيب .
حازم :
رحم الله والديك حجي .
ابو بشير :
ووالديك .. الحجية تسال عليك تكول شنو مناوي يتزوج ؟
حازم :
هههه الله كريم .. بعد وكت .
ابو بشير :
لا شنو بعد وكت لاتصير مثل بشير صار شكبره يالله اتزوج .
حازم :
لا ان شاءالله من يتزوجن خواتي والولد يشتغلون ويشيلون روحهم عالاقل اكدر اجمعلي جم فلس .
ابو بشير :
ان شاء الله .. ان شاءالله .. انت قرر وان شاءالله مهر العروس علي والحجية هم تكول من عدها نيشان العروس .
حازم :
الله يرزقك حجي ويطول بعمرك انت والحجية ويطيكم الصحة والعافية والله مشتاقلها الحجية .
ابو بشير :
والله هي هم يومية تسالني عليك شلونه حازم ؟ شلونهم اهله ؟ امه شلون صارت ؟ ميريد يتزوج ؟ تساله خاف محتاج شي ؟ هاي يومية هالحجي .
حازم :
هههههه فدوه لعمرها طيبة وحنينه دومها .
ابو بشير :
مر عليها فد يوم شوفها .. خطية هم تضوج كله وحدها بالبيت مرت بشير من النوع الهادئة متحجي وخالتك تعرفها تحب الحجي والسوالف .
حازم :
ههههه اي خطية .. ان شاءالله امر عليها اشوفها .
ابو بشير :
شوكت ؟ انت ترجع تلف راسك وتنام بعد شوكت تروح تشوفها ..
حازم :
والله حجي اتعب .. ارجع للبيت لازم اسبح واكلي لكمة عالسريع واصلي وانام .. اذا ماانام مااكدر اكعد الصبح واجي على باب الله .. والتعب مايخليني اسهر رجلية مورمة من الوكفة طول النهار وظهري مكسر من شيل شوالات البالة مال ابو تحسين .
ابو بشير :
حقك .. حقك .. تعال يوم الجمعة اتغدى وياها يوم الجمعة بشير ومرته يرحون لاهلها ونبقى بس اني والحجية بحدنه .
حازم :
ان شاءالله .
.
.
.
ابوي مجنت اشوفه لان الصبح اشتغل وبالليل انام من التعب من الساعة بالسبعة وهو هم جان ميسال عنه ..
مرة مرتين امي راحتله حتى تحجي وياه بلكي يسال علينه ويهتم بينه بس كالعادة ينتهي كل لقاء بينهم بعركة جبيرة ومشكلة ..
امي جانت كتومة متشتكي لاحد بس من كبرت بالعمر وتعبت ظلت تحجي كلما ادخل والكاها كاعده وحدها بالغرفة الكاها تسولف بصوت عالي ويه نفسها :
نايم ومرتاح ميدري بجهاله ياكلون يشربون ... مرتاح من مسؤوليتهم .
حازم :
السلام عليكم .
امي :
هلا يمه .. الله يساعدك .
حازم :
يساعد بختج ... شبيج ؟
امي :
مابيه .. شبيه بعد احجي على ابوك ... خلص عمره ماعده احساس بالمسؤولية ... ولكاله وحده مثله نفس طينته .. ماصدكت لكتلها رجل حتى تجلب بي ..
حازم :
هسه شذكرج بيهم .. يولون لتفكرين بيهم يمه ..
امي :
مسوي روحه يصلي وسبحته ماتطيح من ايده وسبحان الله والحمدلله وهو هاجر مرته وجهاله .. يركض وره هاي ام فجوج الزركة خشمها تكول راس بصل هلكبره ..
حازم :
هههههه وين شفتيها ؟
امي :
شلون وين شفتها كلما اروحله تجي توكف يمه عبالك حماية تخاف عليه خاف احطه بجيبي وابوكه منها .. امداها هي وياه حتى امداها .
حازم :
ههههه .. يمه ماله داعي ترحين بعد كافي .. تره المايسوگه مرضعه سوك العصا ماينفعه .. المو منه ومن ذاته يعرف حق الله ويحس بمسؤوليته واهله وواجباته هذا ميفيد وياه الحجي .. هسه احنه صارلنه ست سنوات عايشين بدونه شيرجعه بعد ؟؟ خلص انسيهم .
امي :
ناسيتهم هسه اني شكايله .. قابل بحالهم .. كافي علي القهر البيه .. بس هن الزركات حظهن كاعد من الله انوب تمشي جنها عجوز عووع مدري شلون يباوعلها .. لو حلوه شسوه ؟ بس حظها محليها بعينه .. حظها هلكبره .. يولون قابل اني بحالهم ..