قبل التلاشي قبل الغرق

قبل التلاشي قبل الغرق ١٢

#قبل_التلاشي_قبل_الغرق
بقلم #روز_الفياض
ج١٢
.
.
.

سألني فرقد :
تخابر لعمامي يجون ؟
حازم :
ياعمام .. همه يعرفونه ؟ يسالون علينه ؟ شوكت اخر مناسبة صارت عدهم وعزمونه ؟
حازم :
كلت اجيب جماعتي ومنا من شارعنه ابو محمد وابو عباس وشوف منو بعد .
فرقد :
وين جايب جماعتك يمعود ..
على حورهم لو من كشختهم .. حتى مينطلع بيهم .
حازم :
شبيهم مينطلع بيهم ؟ شنو مو كد المقام ؟ تره ذولي زلم عليهم العتب
فرقد :
يفشلون يمعود ..
حازم :
يعني انت هم متفشل مني ؟
فرقد :
اهووو لتصير حساس عاد انت اخوي مقصدتك بس جماعتك مبهذلين .. لو عربنجي لو حمال قابل جايب وياك مهندسين لو دكاترة .
حازم :
داسكت اسكت .. اني صوجي .. جيب جماعتك انت اني مالي علاقة .. صوجي اني ..

حسيت اخوي مستحي مني ومتفشل لان اخوه عربنجي ..
زين اني ليش صرت عربنجي ؟؟ مو علمودكم علمود اعيشكم .

كلللش انقهرت من حسيت اخواني بدوا يخجلون مني ويستحون يكولون اخونه يشتغل حمال لو عربنجي .

ثاني يوم كلت اروح اكل للحجي زحمة يسمعون اخر الناس .
رحنه اني وامي اتلكتني الحجية ودخلتني يم الحجي لكيت بشير كاعد ..

حجيت للحجي وكتله خطوبة فرقد وامي تريد الحجية تروح وياها ..
ابو بشير :
اي يدددلل فر .. فر قدد ..
نجي ... آ آ آني ووو بشييير ووخاااللتك .
حازم :
لا عمي انت تعبان شيجيبك بعدين تتعب .
بشير :
لا لا نجي .. نجي ان شاءالله .. اني اجيبهم واجي .

استغربت من موقف بشير بس كلت يمكن الله هداه صدك واتحسنت اخلاقه وحس بغلطه ..
هم ميصير احكم عليه من موقف صار بينه ويجوز جان مضغوط بسبب رفض الحجي والحجية لمرته الثانية ..

اجه يوم الخطبة وفرقد جاب جماعته على كم رجال من جيرانه على بشير والحجي واني هم عزمت ابو علي ابو الباله يجي ويانه لان شكله مرتب وهيبة ويعرف يحجي ..

النسوان اجرتلهن ولد اعرفه بالشورجة عده كيه ..
خواتي وامي والحجية ومرت بشير ام محمد وجم مره من نسوان شارعنه ..

اتعرفنه على اهل البنية وسولفنه وتمت الخطبة على خير وسلامة ..

طلعت ويه الزلم رجعنه لبيت اهلي كعدنه نسولف ..
امي وخواتي والنسوان بقن هناك وفرقد يرجعهن ..

سويت جاي وصبيته وكعدنه كل احنه نسولف ونضحك لحدما بدت الناس تروح بقى بس الحجي ابو بشير وبشير وابو علي .
ابو بشير :
انت شوكككت تت تت زوج ..
حازم :
هالتشوف عمي ماكو فكه .. اركض من الصبح للعصر عالعيشة . وهم ياريت ملحك .
ابو بشير :
زو .. زو اااجك علي .. آآآني متككفل بي كككله .
حازم :
الله يطول عمرك عمي مو هسه من تخف المسؤولية شوية وخواتي يتزوجن .. الله كريم عود .
ابو بشير :
اذا آآني مي ميتت بش .. بش .. بشييرر يز يزو ..جك ..