قبل التلاشي قبل الغرق

قبل التلاشي قبل الغرق ٢٩

#قبل_التلاشي_قبل_الغرق
بقلم #روز_الفياض
ج٢٩والاخير
.
.
.
ان تخسر احد ابنائك معناه ان تخسر قطعة من قلبك ..
رحيل ذلك الطفل الصغير يخلف فراغاً والماً كبيراً ..
الماً لم ولن يخف يوماً مهما توالت الايام والسنين يبقى ذلك الجرح نازفاً والشوق عارماً والفراق صعباً ..
والنسيان مستحيلاً ..
.
.
.
زنوبة بابا صدك رحتي ؟؟
مااكدر اصدك ..

احس كبرت بليلة ويوم عشرين سنة ..
حتى مااكدر افرد ظهري عدل .. احس ظهري مكسور ..

احاول اقوي نفسي واكول امر الله بس مااكدر ومن اشوف ضحى شلون منهارة ومنتهيه انتهي اكثر منها ..

انوار بقت عدنه اسبوع يم ضحى ..
بس ضحى مالها خلك روحها ..

بقت انوار يمنه حتى تهتم بسيف ..
تعاملها وياي جان عادي ..
بس كل وكتها يم ضحى ..

بعد الاسبوع رجعت انوارلبيتها ..
امي راحت وياها ..
بقيت تقريبا شهرين اني مطالع من البيت ولاشايف شغلي ..
الديانة لزمولي الباب يردون فلوسهم ..

ماادري شسوي ..
امي حاجية يم انوار ..
بعد جم يوم اجت امي جايبه مفاتيح المحل مال الشورجة .
كتله :
مااخذهن .

امي :
اخذ واسكت .. قابل تظل كاعد بالبيت لازم تطلع وتستغل هاي الناس منين توفيها وترجعلها فلوسها .. شغل المحل حتى اليطلع من اجار المحلات تطيه للديانة ..
ماادري هاي الفلوس وين وديتها .. لاشفتك اشتريت شي للبيت لاجبت شي .. كله على هالغالية هاي .. كلها تركض وراها .. شايلة خرزة مدري ساحره الزلم ..

حازم :
مالي خلك اطلع للشغل .. هي مو لغت الوكالة ليش ودت المفاتيح هسه ؟

امي :
زين سوت من لغتها .. والله .. يمه هاي المرة نكسة شفتها شسوت ابشير الله يرحمه حتى اهله بعد ماعرفهم .. لو ظال عدك المحل والبيت يمكن تخليك تطيهن الها ..

حازم :
شالقصة !! اطيهن الها شكو ؟

امي :
هاا يمه .. المن رهنت المحل ذاك وراح من ايدنه ؟؟ مو علمودها ؟ لو اعرف بس شتسوي للزلم وتخلي عقلهم ينغسل غسل .. ماتردون الفقيرة والنادرة والتخاف عليكم وعلى الفلس بايدكم تردون المتستحي وملسونه وتهلسكم تهلس كون ولافلس يبقى بجيوبكم هاي تحبونها وتردونها وماتفكون حلكم وياها .. بس لساناتكم تطلع عالفقيرة ..

ضحكت كالت :
وروح ابوي .. هم كول جذب ؟
العراقيين اتهدوا .. اتهدوا .. خلوا رجيلكم بالكاع تردون المره فقيرة حتى تسيطرون عليها وتركضون انتم وره طايحات الحظ والصبغ ..
اني كتلها تطيك المفاتيح .. خوما تريد تبقى كاعد بالبيت عازل روحك من الناس لاطلعه لاطبه لاسالفة لاحجايه ..
شوف شكلك شصاير بي .. لحيتك وجنك شايب حتى الشيب بين عليك .. اذكر الله يايمة اول واحد انت بته تموت ؟
هذا يومها كول الحمدلله .