قبل التلاشي قبل الغرق

قبل التلاشي قبل الغرق١١

#قبل_التلاشي_قبل_الغرق
بقلم #روز_الفياض
ج١١
.
.
.
كل مرحلة متعبة نمر بها نأمل ان تكون المرحلة الاخيرة ونتوقع ان مخزون الصبر لدينا قد نفذ وان ذلك فوق طاقتنا متناسين ان الله سبحانه وتعالى قد قال ( ان الله لايكلف نفساً الا وسعها ) .
فنندهش عندما تمر بنا مرحلة ضيق جديدة من كمية التحمل لدينا والتي كنا ظننا انها نفذت .
فسبحان الله الذي يعرف مقدرة كل نفسٍ على التحمل والصبر فلا يحملها اكثر من طاقتها .
.
.
.
بعدها سافر ماهر للسعودية جان يتصل قليل فجنه نكول حقه وين شايف هيج نظافة وراحة وترتيب ..
بعده فرحان من يتعود راح يتصل ويسأل ..
اما سلوى فجان دوامها مابين المستشفى والصيدلية والبقية مشغولين بكلياتهم ..

خواتي جانن مامحجبات ..
صحيح جانن مو من النوع اللي يسشور ويسوي تسريحات ولبسهن بسيط لكن مرتبات بنظري ولبسهن محتشم بس ماجانن يحبن الحجاب والسبب سلوى .
سلوى جانت رافضة فكرة الحجاب وتحجي كدامهن فيتأثرن بكلامها لان هي الجبيرة بيهن ولان صوتها عالي وتدافع عن ارائها بكل شجاعة حتى لو كانت على خطأ .

بيوم من الايام رجعت للبيت وكعدت اتغدا فامي كالت :
اريد اخذ خواتك للسوك .
حازم :
شعدكم ؟
امي :
يردن حجابات .
حازم :
حجاباتيش؟
امي :
حجابات .. حجاب مال شعر ربطة .

استغربت وفرحت لان الله هداهن فكتلها :
شعجب .. شنو سلوى شقنعها تتحجب ؟
امي :
مو سلوى .. مروه ورياحين .
حازم :
شعجب ؟ هن يمشن وره اختهن حكيمة زمانها .
امي :
اجتني اليوم مروة ترجف تكول كاعدين بالحديقة اني وصاحبتي واجاني واحد عده لحية كلي :
انت ليش متلبسين حجاب ؟ وليش بدون جواريب ؟ منا وهيج تلبسين حجاب وجواريب مفهوم ؟
حازم :
هاا ؟ منو هذا ؟
امي :
من الاحزاب اكيد ..
حازم :
وهو حجابيش اذا بالخوف والقوة ..
امي :
اندري يايمه .. المهم هي خافت واني هم حجيت عليهن كتلهن عوزجن طول وماتلبسن حجاب كل بنات امة محمد اتحجبت بس انتن الا يخطفونجن لو يكتلونجن يالله ترتاحن .. جنهن خافن وسمعن الككلام .
حازم :
الله يهديهن .
امي :
توصلنه ؟
حازم :
والله يمه تعبان .. اخذي فلوس من محفظتي وشوفيهن شمحتاجات .
امي :
براحتك .. الله يرزقك ويوسع ابواب رزقك ويفرحك مثلما مفرح اخوانك .
حازم :
آمين .

راحت امي للسوك واشترتلهن حجابات ولبسن الحجاب الحمدلله ماعدا سلوى اللي رافضة فكرة الحجاب وتكول ماكو دليل بالاسلام يوجب الحجاب عالمره .

مرت الايام والمسؤولية ماقلت لان شغلي بمكان الحجي جان بالنسبة الي امانة .
وامانة جبيرة حيل .. جنت اسجل كل شارده وكل وارده خاف يفوتني شي ويصير بذمتي ..
لو خاف انسى شي واطلع كدامهم حرامي وهذا شي مااكدر اتحمله .

ابن بشير بقى فترة بالخدج واني جنت كل يومية اخذهم يرحون يشوفنه وارجع وياهم اسبح الحجي واتسوكلهم واشوف شمحتاجين الى ان طلعوه للبيت .
سموه محمد .
الحجي سماه .