قبل التلاشي قبل الغرق

قبل التلاشي قبل الغرق٢٠

#قبل_التلاشي_قبل_الغرق
بقلم #روز_الفياض
ج٢٠
.
.
.
اكتشفت ماهر اخوي متزوج بت عمي علاء ..
بعدما حصرت امي بالحجي اعترفت :
اخذ بت عمك علاء .
حازم :
شوكت ؟ شلون ؟ اجه اتزوج وراح واني ولا ادري ؟؟؟!
امي :
لا لا لا .. مااجه .. ابوك اجه بس مااجانه راح كبل لاخوانه ماهر مسويلة توكيل مدري مدري شني مااعرف بها السوالف المهم ابوك اجه بمكانه زوجه هنا وسواله العقد واخذ اوراقها وراح .. انوب من مناك ماهر سوالها فيزا مدري شسمها واخذها وراه ..
حازم :
واني ماادي ؟؟؟ عدو مثلا اني ؟ قصرت وياكم ؟ ذبيتكم بالشارع ؟ موتتكم من الجوع ؟ بطلتهم من المدارس ؟؟ شنو السويته ويجازوني هيج ؟؟ لان فقير وماعدي ؟؟؟
امي :
لا انت لاتظل على كل شي تنقهر وتسوي قصة هو لاسووا عرس ولا اي واحد من اخوانك وخواتك راح بس ابوك احنه هم ماندري .. من خطبوا وعقدوا يالله خابرنه وكللنه بعد ماتعرف اميهر شلون كله بسكوت شغله ..
حازم :
يعني انتم عرفتوا من خطب واني لوما انت هسه حاجيه بالصدفة ولاجان دريت متزوج وعده بنية .. وتكولين لاتنقهر ؟؟!!!
امي :
هسه بعد هذا الصار ..

هزيت راسي وسكتت ..
واليكتلك يكلولك لاتنقهر ..

اتناسيت قهر اهلي شوية لخاطر رياحين اللي خطيبها اجاني حتى يترخص مني علمود يتزوجون لان كمل اموره .
ماعدي مانع يتزوجون .. مادام كل شي تمام وهي موافقة ..
ويمكن رياحين استحت مني طلبت زفتها تطلع من بيتي بس اني مقبلت كتلها لا تطلع من بيت فرقد احسن اني بيتي بسيط وخاف تستحين كدام عيالج ..

وتم العرس بعدما طلعت الاربعين مال بشير الله يرحمه ..
ضحى رادت تروح للعرس بس اني مردتها تروح .. رغم رياحين اجت وعزمتها ووصتني اجيبها ..
بس مردت سلوى ومروة يسمعنها حجايه لو يغثنها بكلمة ويفشلنها كدام الناس ..
قبل العرس بيومين اخذتها للسوك كالت :
اريد اشتري بنطرون وسترة ..
حازم :
والعباية ؟
ضحى :
جوه العباية .. بس يم خواتك انزعها ..
حازم :
مو انتي جايبة خاف مو زين عليج تطلعين وتلبسين وتكشخين ؟
ضحى :
مو هذول الاجانب ميصير بيهم شي من يطلعون بس احنه عدنه هاي السوالف ..
حازم :
مالي شغل انت تتحملين مسؤولية نفسج مو بعد يومين تكولين انجبست .

سكتت محجت شي بس حسيتها ضاجت ..
بعدين كالت :
بطلت مااريد اروح ..
حازم :
هاا ؟ ليش ؟
ضحى :
انوب خاف رياحين يصير بيها شي وتصير بوجهي شكلك ضحى اجت وداستها ..
حازم :
كتلج انت لزكتي الا ترحين ..
ضحى :
لا خلص بعد مااروح .. اكعد ابيتي واسكت احسن ..

بعدها طلعوا زنوبة من الخدج ..
نورت بيتنه ..
خابرتني الحجية ام بشير خطية رحت جبتها رادت تجي تبارك لضحى وتوجبها خلت جوه راس زنوبه مية الف ومحبس زغير لضحى :
تتربى بعزكم ان شاءالله .
ضحى :
خالة ليش هيج والله جيتج كافي والله العظيم جيتج عدنه تسوى الدنيا .
الحجية :
لا هذا واجب ومثلما حازم ابني انت هم بتي .. وهاي الحلوه من معزة جهال بشير ..
ضحى :
والله مالها داعي هاي خليتيلها فلوس كافي .
الحجية :
لاهاي الج .. انت الجايبة وتعبانه مو هي ههههه ياريت خالة الفلوس تفيد وترجع الراح ..
ضحى :
اي والله خالة ..
الحجية :
انت خوش بنية .. حازم الله يحبه .. الله يستر عليكم .