قبل التلاشي قبل الغرق

قبل التلاشي قبل الغرق ٢٣

#قبل_التلاشي_قبل_الغرق
بقلم #روز_الفياض
ج٢٣
.
.
.
من وصلنه للفاتحة اشتغلت التليفونات ..
خليت التليفون صامت لان استحيت كدام الناس كلساع وحده منهن تخابرني ..
ولارديت عليهن ..
امي خابرت عالحجية وكلتلها وصلنه .
ثاني يوم من خلصت الفاتحة رجعنه ..

دخلت لكيت بس انوار :
وين خالتي وضحى ؟؟

انوار ظل وجهها يطي الوان ..

حازم :
شبيج ؟ وين خالتي وضحى ؟

انوار :
ما.. هاا .. ماادري .. عمتي تعبانه واخذتها ضحى للعيادة الشعبية .

حازم :
ياعيادة شعبية ؟ وليش اخذتها وراحت ليش متانتني ؟ شلون تخلينها تاخذها وتروح بالله طاحت عليها ؟ وهي ضحى شعرفها ووين تندل ؟

بقت انوار ساكته ..
وره شوية كامت اختفت ..
كمت اريد اروح اشرب مي من المطبخ سمعتها تحجي ويه ضحى بالتليفون :
ضحى ..
حازم رجع وسال عليج كتله اخذت عمتي للعيادة الشعبية ..

....................
انوار:
ماادري بعد دبري نفسج وفهمي عمتي اني مالي علاقة اخاف تطيح براسي ..

........................
انوار :
مو كتلج لتروحين هو حذرنه بس متسمعين الكلام .. رجع على وقت واتورطتي ..

فهمت السالفة جذب وضحى طالعة بدون علمي ..
يجوز راحت للسوك .. واني حذرتها من الروحه ..

رجعت انوار كالت :
اصبلك غدا ؟

حازم :
متزقنب ..

انوار :
زين كوم اسبح وارتاح راح احضرلك الحمام .

حازم :
مااريد ..

بقت واكفة ساكتة كتلها :
شوكت راحن ؟

انوار :
هسه على جيه ميتأخرن ..

حازم :
اممم ..

انوار :
شعجب اجيتوا من وكت ؟

حازم :
ليش ؟

انوار :
لا يعني اقصد مبين طالعين من الصبح .

اتنهدت احس دخان يطلع من عيوني على كدما انقهرت لان ضحى كسرت كلامي ..

حازم :
طلعنه وره الصلاة ..
شلونهم الجهال ؟

انوار :
زينين الحمدلله ..
متونسين على زنوبة ههه .

بقيت ساكت مالي خلك اسولف ..

انوار :
شبيك ابو زينب ؟

حازم :
مابيه ..

انوار :
اشو احسك مطايقني حتى متريد تحجي وياي ؟؟

حازم :
عوفيني بحالي انواار .. مالي خلكججج ،.

زمخت عليها ..
رأساً كامت طلعت من الهول ..

بقيت كاعد واهز برجلي من العصبية ..
هم انقهرت على انوار لان مالها ذنب وهم مقهور لان ضحى طلعت من وراي ..