قبل التلاشي قبل الغرق

قبل التلاشي قبل الغرق ٨

#قبل_التلاشي_قبل_الغرق
بقلم #روز_الفياض
ج٨
.
.
.

كل واحد منا قد مر في نفس الموقف .. حيث تعتبر نفسك عند شخصٍ ما عزيزاً كماهو عزيزٌ عندك وتظن ان هذا الشخص طيب الى حدٍ بعيد وانك لن تهون عليه في يومٍ ما ..
لكن المواقف تكشف لنا معادن البشر واخلاقهم في اوقات الشدة ونكتشف ان البعض مهما كان طيباً وكريماً ومسامحاً فانه سوف يتغير عندما تمسه ولو بالخطأ وتظهر لنا وجوهاً لم نكن قد الفناها منهم يوماً ولم نسمع بها قبلاً فينكسر شيئ في داخلك حين تشعر ان الناس كلها متشابهه ..
فعند المصالح تسقط من حساباتهم وقد يدوسون فوقك عمداً كي يخفوا مايجب اخفاءه حتى لايشار اليهم بالظلم .
بل قد يتهوك باخطائهم كي لاتدنس صورتهم في اعين الناس .
.
.
.
فرغت نفسي ورحت اشتريت لاهلي مكيف وصبغت الديوانية اني وفرقد وفرشناها ورتبناها ..

امي :
عاشت اديكم .. المره الجاية نبدل الطباخ والثلاجة .. ثلاجتنا بس كشر لاتبرد ولاتجمد .
فرقد :
تدفي هههههه .
حازم :
ياجاية يمه هي هاي شعره ..

سكتت بس هي كملت :
اي صدك .. صدك .. شعره من جلد خنزير ..

بيومها اخواني وخواتي ظل يسألون منين هاي الفلوس ؟ بس امي مقبلت احجيلهم شي عن افلوس ابوي حتى لحد منهم يكول اويد فلان حاجة ومحتاج هلكد لهالشي ..

فكتلهم :
من الحجي .. الحجي دايني .
سلوى :
ومنين تسددهن شنو هو المكيف بالف بالفين ؟
امي :
كون انت هيج تفتهمين وتعرفين منين يسددهن خلي عدج شوية احساس وكضي ايدج من الصرف .
فرقد :
يمه اني راح اشتغل .. اريد اطلعلي مصرف .
امي :
صلاوات .. صلاوات راية الله بيضا من فكرت تشتغل .
فرقد :
وره الدوام ... صاحبي عدهم كهوة وكتله اريد شغل كلي تعال ويانه بالكهوة ..
امي :
شتشتغل بالكهوة ؟
فرقد :
هو مو كهوة صدك عبالج كهوة مثل ايامكم كرويتات خشت واستكاين جاي والشياب كلمن لازم سبحته يفر بيها وحاط رجل على رجل ويلعب دومنة ..
امي :
كهوتيش ؟ خلصني ؟
فرقد :
هسه يسموها كوفي شوب يعني كعده مرتبة ونراكيل وعصاير وعالسوالف الكشخة نسكافية وكبتشينو ومدري شنو .
امي :
شني هاي انوب الاسكافية وذاك مدري شسمه مااعرف ؟
حازم :
مثل الكهوة يمه .
ماهر :
لا لاجذب يمه هاي نوع من انواع الشرب حرام تره تسكر .
امي :
ياااا صدك عود ؟ فريقد انوب تريد تشتغل بالعرك؟

ضحكنه على امي وفطاريتها ..
امي :
حرام لو لا حلال ؟ فريقد وروح ابوي اذا السالفة بيها حرام اطردك من البيت تره مو تكول .
فرقد :
يمه يا حرام شبيج يضحكون عليج بكل شي تصدكين .. تردين اخذج وياي وتشوفين بعينج ؟
امي :
يااا لا يمه اسم الله .. اسم الله .. استغفر الله استغفر .
ماهر :
ههههههههههههههه عفيه عليج يمه عجبتيني شيوديج لهيج مكانات بيها منكر .
فرقد :
كافي .. كافي هسه تصدك وتاكل راسي .
امي :
وحگ هو القرعان يافريقد اذا طلع حجي اميهر صدك الا اخبر عليك الشرطة واخليهم يشبعونك دك .
فرقد :
ههههه عليمن شنو بايك لو ناهب عمي الله واكبر عود هاي كتلج كهوة بالاول ههههههه .