قبل التلاشي قبل الغرق

قبل التلاشي قبل الغرق ٢

#قبل_التلاشي_قبل_الغرق
بقلم #روز_الفياض
ج٢
.
.
.
الظروف التي يمر فيها الانسان غالباً هي من تحدد شخصيته لبقية حياته ..
فالظروف تنحت شخصية الانسان منذ طفولته وتهيأ شخصيته للتعامل مع كل مايمكن ان يمر به في الكبر ..
.
.
رغم سنين عمري القليلة بس جان تفكيري مال كبار ...
مو لان اني اريد اكبر نفسي ولا لان اني هيج ... بس لان الحياة اجبرتني افكر مثل الكبار وانسى طفولتي وعمري الحقيقي ....
المسؤولية اجبرتني اتخلى عن طفولتي والعابي واحلامي في سبيل اكدر اعيل امي واخواني ....
الظروف خلتني اكبر واترك كل سوالف الاطفال والبراءة وراي وانساها واتصرف وافكر واعيش على اساس اني الابن الجبير والمسؤول عن عائلة مكونة من (٦ ) نفرات بالاضافة الى ام تعبانه نفسيا وجسديا ومنهكة نفسيا وجسديا وعاطفيا ....

بأختصار جنت اني السند الوحيد لاهلي واولهم أمي ...
اني جنت الاب والاخ والمعيل ...

من ناموا اخواني وشفت امي حطت راسها عالمخده وصفنت .. رحتلها ..
حازم: يمه ..
امي: هاا يمه ..
حازم: الحجي ابو بشير باجر يريدني اروح وياه للشورجة ..

رفعت امي راسها باوعتلي وكالت:
شتسوي بالشورجة؟
حازم: اشتغل وياه منا لحدما تبدي المدرسة اطلعلنه مصرف .. اشتغل بالعربانه ...
امي: عربنجي ؟... حازم يمه هاي تاليتك ؟...
حازم: يمه هن جم يوم بس على متبدي المدرسة وانوب بعد مااكدر اروح عالاقل اطلعلنه جم فلس حتى تشتريلنه بيهن دفاتر واقلام وجواريب ...

سكتت امي لان ماعدها حل ولابديل ...
رجعت بفراشي اتمددت واباوعلها كعدت وشدت راسها واتعصبت بالحجاب وخلت ايدها على خدها وظلت دموعها تصب ...

جنت اسمعها تدردم وتحجي على ابوي وتدعي عليه ورغم ادري ابوي يستاهل كل دعاويها بس بداخلي مجنت قابل ..
يبقى ابوي وابقى احبه مهما سوه ...
ماادري هي براءة اطفال لو هي هاي الفطرة ...
مو يكولون حب الام والاب عند الاطفال بالفطرة ...

ثاني يوم مر علي الحجي واخذني وياه للشورجة واخذ عربانتي حتى اشتغل بيها هناك ..
ظليت يومية اروح وياه الصبح الساعة ب( ٨ ) ونرجع العصر الساعة ب ( ٥ ) ..
جنت اشتغل كل شي .. عربنجي .. حمال .. زبال ...
كل شي اشتغلت ..
كل شغلة يكلولي عليها جنت اسويها بدون مااتذمر او اشتكي ...
وجان الكل يعرفني ويه الحجي فيديرون بالهم علي ..
الحجي جان تاجر يشتغل بالجكاير ..
جان مرات من يبيع ويربح ويطلع ربحه يفرحني وياه ويطيني جظ دينار وتكة جكاير ..
ماجنت ادخن بس جنت ابيعها واخذ فلوسها ..
وبيوم اليطيني التكه جنت اطير من الفرح ... رغم هم جان من يطلع عدهم بكراتين الجكاير تيشيرتات كدعاية ومداليات وجداحات وطفايات وهواي شغلات هم جان يطيني بس ربحي جان بالجم باكيت جكاير ..

ومرات هذا عنده شوال مال باله اروح اشيله اله .. وهذا عنده بضاعة يريد يوصلها لمحله احملها اله ...
هذاك محله وصخ ويريد واحد ينظفه انظفة اله ...
وهذاك يريد استكانة جاي اروح اركض اجيبله ..
ومن هذا دينار ومن ذاك جم دينار ويتلم الوارد ..