قبل التلاشي قبل الغرق

قبل التلاشي قبل الغرق ١٥

#قبل_التلاشي_قبل_الغرق
#روز_الفياض
ج١٥
.
.
.

صليت المغرب ورحت سألت على الولد الجاي على رياحين ..
هم مثلها طبيب بس حالتهم مو كلش مو مثل رجل سلوى ورجل مروه بس يعني احسن من حالتنه كبل ..

رجعت مريت عالحجية ام بشير مادام طلعت من العده مشتاقلها ومحتاج اشكي يمها واحجيلها همومي ..
خطية من شافتني حضنتني وظلت تبجي :
يمه حويزم انت من ريحة الحجي .
حازم :
حجية فدوة لربج لتبجيني اني اريدلي حجة حتى ابجي .. اني اكثر واحد مفتقده ..

بجينه اثنينه ..
بعدين كالت :
احجيلي على احوالك وين صرت شلون عايش ؟
حازم :
والله على حطت ايدج .. ياخذني الصبح ويجيبني المغرب ..
الحجية :
سوده علي ياحازم يمه .. ظليت بالضيم وره عمك الحجي ..
حازم :
الف رحمة على روحه ..
الحجية :
شبيك ؟ شو جنك مهموم ؟ محتاج فلوس ؟
حازم :
لا لا الحمدلله نعمة من الله عدي.
الحجية :
ممبين .. عدك شي سالفة تريد تحجيها ؟

اتحسرت كتلها :
والله ياحجية انت هم امي واني الله يشهد لامي محاجي هالحجي بس راح احجيلج ولو اخاف تزعلين مني ..
الحجية :
خير ولك شمسوي ؟
حازم :
عرست ...

فكت عيونها الحجية متعجبة كالت :
ياااا !!!! شوكت ؟؟؟
شلون ؟؟؟ شو بشير مكلي شي ؟
حازم :
محد يدري .. حتى بشير ولا حتى امي مو كتلج محاجيلها .

صفكت ايدها على رجلها كالت :
ولك حويزم .. خاف مسويلك مكسورة ؟

ضحكت على كيف كتلها :
اني لو ماال هيج سوالف يكعد حظي عدل بس لان ماشي عدل حتى الدرب يلتف بيه ويمشي بيه للمصايب .
الحجية :
ولك خوفتني .. احجيلي شمسوي .
حازم :
والله ممسوي شي .. بس ولد هم عربنجي ويانه بالشورجة حتى بشير يعرفه اكيد اطاني بت عمه .. يتيمة وبدون لامهر ولاعرس ولا شي ..
الحجية :
اي ؟
حازم :
يدري هو بحالتي .. كلي اخذها بعبايتها .. بس عقدت عليها عد الشيخ .
الحجية :
وبعدين ؟

حجيت للحجية كل اللي صار ظلت صافنة مثلي بعدين كالت :
الدنيا تخوف صدك ..
حقك تخاف منها .. بس بعد شتسوي خو متذبها بالشارع يمه هم حرام عليك .. بعد هي هسه صارت مرتك دير بالك عليها وبلكي تطلع زينة وبت اوادم وتخدمك وتداريك .. اصبر عليها وشوف بالله .
حازم :
اكلج طلكتها من دريت بيها مطلكة ..
الحجية :
ولك شنو طلكتها هو بكيفك .. هو الطلاك عبالك بالحجي وبس كلمة تنحجي .. لا يمه لا كبل الحجي الله يرحمه باول زواجنه هم طلكني بس طلع باطل لان كلوله جنت عصبي .
حازم :
هاا ؟ طلكج ؟ ليش ؟

ضحكت كالت :
هم جنت خارمة اول مااتزوجت هههههه لااعرف اطبخ لا اعرف اشتغل بالبيت طكت روحه مني طلكني هههههه عاد انوب صرت خوش مره .
حازم :
هههههههههه يعني من خوفج يالله ؟
الحجية :
الخوف يعدل الشوف هههه ... هسه انت هم مثل الحجي عصبي جنت مينحسب عليك طلاك ..