قبل التلاشي قبل الغرق

قبل التلاشي قبل الغرق ١٨

#قبل_التلاشي_قبل_الغرق
بقلم #روز_الفياض
ج١٨
.
.
.
لابأس في كل مرةٍ نجرح ونتعلم نفقد جزءاً من ذاتنا وقلوبنا وارواحنا ..ولكن حين نصل للنهاية مع من يستحقنا ستزهر كل رياضنا الجميلة ..
سيكون الغرقُ مطلوباً وبناءُ الذات لا ارادياً ..
وسيصبحُ التلاشي جميلاً امام عشق حبيبٍ لايرضى لنا بالحزن لحظة ..
سيصبح الضعف بين احضان ذلك المتلهف قوة لانه ببساطة يعرف قيمة مايملك ..❤️
.
.
،
خابرت للحجية ام بشير وحجيتلها وكلش رحبت بضحى :
ولك حويزم هذا بيتك .. احنه هم اهلك .. جيبها وتعال لتخليها بالشارع كاعده ..
حازم :
بس جم يوم لحدما اشوفلنه مكان ثاني .
الحجية :
ميخالف .. دتعال هسه اني جوه بحدي كاعدة وعدي غرفتين فارغات تعالوا كعدوا بيهن ..
حازم :
لا لا خاله هن يومين ان شاءالله احصل مكان ولو راح نثكل عليج بس هي والله فقيرة هسه تشوفينها مابيها اذية وتعجبج نادرة ونظيفة ..

وصيت ضحى تهتم بالحجية وتدير بالها عليها ..
وصلتها وهي مستحية بس الحجية كلش رحبت بيها وعبالها اني ابقى وياها بس اني مقبلت .
الحجية :
ولك منين مستحي هذا البيت بيت الحجي مينسد بابه بوجه احد .
حازم :
بيت العامر ان شاءالله .. بس اني مااخذ راحتي والله بس ضحى خليها يمج هم تخدمج وهم تونسج لحدما اجي عليها .

خليت عد ضحى فلوس خاف تحتاج شي وكتلها :
اذا صار شي لو احتاجيتي شي رمشي علي من تليفون الحجية واني اجي ..
ضحى :
واني ابقى هنا ؟
حازم :
شنسوي بعد بلكي الله يفرجها هاليومين واحصل مكان واجي اخذج .
ضحى :
وانت وين تروح ؟
حازم :
لتفكرين بيه .. ادبر روحي .
ضحى :
اذا ماافكر بيك افكر بيمن .

ابتسمت فرحت ..
حازم :
تخافين علي ؟
ضحى :
ياا طبعا اخاف عليك انت كل اهلي .. لا والله اهلي يرحولك فدوة .

انشك حلكي من الابتسامة من سمعت حجيها ..
حازم :
على كيفج وياي .. تره اني كلبي رهيف مااتحمل هيج حجي محد
كايلي هالحجي كبل .
ضحى :
شيومني اليوم ..
حازم :
اني الشينومني .
يالله ديري بالج على روحج .. حجابج على راسج مينزع الا من تنامين وتقفلين باب الغرفة عليج .. ومااوصيج عالحجية بعد ؟
ضحى :
لاتوصي حريص .. احطها ابطن عيني .
حازم :
عفيه ..

طلعت وعفتها واني خايف عليها رغم ادري بيها يم الحجية والحجية اكثر شخص امين ممكن استأمنه عليها .

زين اني هسه وين اروح ..
خابرت على بشير وحجيتله وكتله اريد ابات بمحلة مال الموبايلات لان ماعدي مكان ابات بي ..
بشير :
ليش تبات بالمحل تعال وياي للبيت .
حازم :
لا لا لا المحل احسن مااخذ راحتي ولا انت واهلك تاخذون راحتكم وماادري شكد احتاج ابقى يوم يومين يجوز اسبوع ..
بشير :
وشكو بيها يوم لو اسبوع لحدما تلكالك مكان .
حازم :
لا لا كتلك ماارتاح والله ماارتاح ..
بشير :
كيفك .. تعال للمحل اني موجود ..