قبل التلاشي قبل الغرق

قبل التلاشي قبل الغرق ٩

#قبل_التلاشي_قبل_الغرق
بقلم #روز_الفياض
ج٩
.
.
.
نظن في بعض الاحيان اننا وصلنا الى طريق مسدود فنبكي وتضيق بنا رحابة الدنيا ونتشائم وننعزل ثم بمرور الايام نكتشف ان كل ماجرى كان خيرا فرب الخير لا يأتي الا بالخير ..
.
.
.
وصلنه للبيت ماهر من الباب صاح لامي حتى يحجيلها على عركتنه ويه بشير ..

امي من سمعت ظل تصرخ والتمت العائلة كلها حتى تسمع القصة من جديد على لسان ماهر ..
امي :
خيولي يمه خيولي .. هذا واحد اخوث تره لايفتهم ولايعرف يحجي المطي ..
حازم :
ياخيولي يمه ..
ماهر :
والله كسرته الج تكسر .. طايح الحظ اخوث على روحه احنه شكو مرت الثانية اذا حجة الا اشك حلكة ..
امي :
لا يمه لا .. عيب من الحجي والحجية .. اذا هو مايعرف العيب ومايعرف الاصول ولايحترم احنه مو مثله .. الناس الهم فضل علينه عيب يمه عيب .. خلكم بهيج سوالف انتم اصحاب الفضل وكلوله لخاطر الحجي والحجية سكتنه .. هيج كلوله ..

انتهدت ..
ماهر :
هذا ابنج مابي خير كعدلي يبجي بالشارع ..
حازم :
انجب .. احترم نفسك ..
امي :
انجب اميهر .. انطم .. يبجي عالعيشة .. يخاف عاللكمة منين يجيبلكم قابل مثلك تاكل وتمسح ايدك بالحايط ماتكول منين يجيب ..
ماهر :
اهووووو ... لازم لازم اطلع اني الغلطان لازم ترجع السالفة علي .
امي :
قابل مجذبين .. كاضي شغلك على كفشتك تدهن بيها ليل ونهار وكل شوية رايح جايبلك قميص لو بنطرون هلبت يوم كلت اجيبلهم علاكة كيلو برتقالات كيلو تفاحات ..
ماهر :
اهوووو .. الله اكبر .. عمي القميص طلبته من صاحبي اريد البسه باجر وارجعه .. بس البنطرون اشتريته بنطروني انشك بيش اروح ..
امي :
هذا الفالح بي تتشكى بس .
سلوى :
يمه تره حقه بيش يروح اذا بنطرونه مشكوك ؟
امي :
انت اخس منه تبجين بوجهنه ليل ونهار .
ماهر :
هسه عافت العركة ولزكت بماهر والقميص هسه اروح ارجعه للولد وارتاحوا.
رياحين :
هسه انتو عفتوا سالفة العركة وجلبتوا بماهر .. هسه احنه برقم التليفون حازم انت صدك متعرفها وهي اتصلت بيك لو جذب ؟
حازم :
والله مااعرفها ولاشايفها ولااعررررفففف ..

اتذكرت ....
امي :
شبيك يمه ؟
حازم :
اتذكرت ..
ماهر :
شتذكرت ؟ بس لا طلعت صدك انت داك عليها ؟
حازم :
ولك لاااا .. قبل كم يوم من رحت اشوف الحجي حتى اكله على سالفة بشير ملكيته بالبيت بس الحجية كعدت يمها وكلتلي اكتبلي رقمك خاف احتاجك تجيني ..
ماهر :
اي ؟ شنو يعني مخابر عليها لو لا ؟
حازم :
ولك لا .. لا .. لا .. جابتلي تليفون مرت بشير كتبت رقمي بي بس مكتبت اسمي وكتلها مكتبت الاسم حتى تعرفه كالت خوش ..
هاي من خابرت كالت منو حضرتك هذا رقمك عدي منو انت ؟ بس لا الحجية نست تكللها ؟؟!! خرب حظي المگرم .
ماهر :
بس مگرم .. كلش حظك مصاب بجلطة مسببتله شلل رباعي .
امي :
تف .. فالك ماگبلناه ..
ماهر :
يمه تره اني جايبلج فلافل حارة وعمبة لاتخليني ارجعها وتبقين بلا عشا ههههه .
امي :
بسلامة حازم مااظل بلا عشه ولاغده .. الله يخليلي وليدي .. مايبلع اللكمة كبلي .
رياحين :
يمه انت وماهر شكد تتعاركون .. هسه احنه بحازم خطيه .
حازم :
الله كريم .. شيريد يصير اكثر يعني ... قابل الشورجة لبشير هم اروح اشتغل يم غير ناس .. بس اني ميهون علي الحجي .. وهو ممقصر وياي ..
امي :
ربك يفرجها .. الحجي يعرف ابنه ارعن خوما يمشي وراه .
حازم :
الله اعلم ..
ماهر :
شلون ميمشي وراه غير ابنه الوحيد .. وابنج شاهد على زواجه من هاي الشريفة .
حازم :
مو اكلك حظي مگرم .