قبل التلاشي قبل الغرق

قبل التلاشي قبل الغرق١٩

#قبل_التلاشي_قبل_الغرق
بقلم #روز_الفياض
ج١٩
.
.
.
هناك من لاتحصد منه سوى الهم والحزن وهناك من يتمنى ان يحمل الحزن عنك ..
.
.
بعدما طلعت ضحى حامل ..
طلعلها حصة بالبيت لان ابوها اله نص بالبيت وهي تورث ابوها ..
سوينه ازالة شيوع وبانتظار البيت ينباع وكلمن ياخذ حقه ..
ضحى :
يعني اني طلعت من اصحاب الاملاك ؟
حازم :
اي عمي طكيتي .. طكوا المعدان شتردين بعد .
ضحى :
نص البيت الي وخلوني ست اشهر نايمه بالزباله ؟؟

تحجي وهي مقهورة وكل شوية تدمع عيونها ..
حازم :
انذال .. يولون لتنقهرين بعد هذا شي صار وراح وفات وربج كشفهم وفضحهم وراح يرجعلج حقج الحمدلله .
ضحى :
زين اذا بعنه البيت وكلمن اخذ حصته .. حصتي تكفي اشتري بيها بيت ؟
حازم :
لا .. هو بيتكم تعبان وبمنطقة شعبية يعني ينباع كاع اليطلعلج يجوز يجيبلج كاع بغير منطقة مثلا زراعية شلون هاي المنطقة العدي بيها كاع .
ضحى :
وانت كاعك وين صفى بيها الدهر ؟
حازم :
موجوده ..
ضحى :
زين ليش منبنيها ونكعد بيها بدل مندفع اجار ويومية متهجولين من بيت لبيت ؟
حازم :
وانت شتستفادين من اخذ فلوسج وابني بكاعي ؟
ضحى :
يصير عدنه بيت غير ؟
حازم :
وهيج انت مأمنة بيه ؟
ضحى :
انت مو كلت حتى لو مطلكني متطلعني من الغرفة وتدفع اجارها حتى ابقى كاعده بيها ؟ قابل يعني من اطيك فلوسي راح تاخذهن وتذبني بالشارع ؟؟
حازم :
ابن ادم يتغير .. خاف باجر عكبة تعيريني وتكولين فلوسي ولوما فلوسي مابنيت ؟
ضحى :
ينكص لساني ان شاءالله اذا فكيت حلكي بيوم وحجيت ..
حازم :
الله كريم .. هسه خل نشوف شراح يصير وبعدين نقرر .

وبعد شهر انباع البيت الحمدلله واخذت ضحى حصتها وبدينه نبني القطعة الزراعية العدي ..
الفلوس ماكفت نكمل البيت للنهاية بنينه وسگفنه بس بقى الصبغ  والكهرباء والمي وخلصت الفلوس .

وبنفس الوكت صاحب البيت رفع علينه الاجار راد ميتين ومنا ضحى حامل وعدها مراجعات عد الدكتورة ..
حاولت ويه صاحب البيت بكل الطرق يخلي الاجار مثلما هو مقبل ..
آخر شي طردنه ..

حازم :
وين نروح هسه ؟ والله تعبت يومية مهجول بمكان .
ضحى :
خل نروح لبيتنه .
حازم :
لا شبابيج لابيبان ولاصبغ لاكهرباء لامي .
ضحى :
احسن من الاجار عالاقل محد اله منه علينه والكهرباء والمي شوية شوية لم فلوس الاجار وسويها والصبغ يولي ..

صفنتلها لكيت ماعدي حل ثاني اصلا ..

رحنه لبيتنه كعدنه ..
الجو بعده بي بروده خصوصا بالليل ..
جنت ادك بطاطين عالشبابيج حتى ميدخلنه هوا بارد ..
والبيبان هم بطانية ثكيلة لو جينكوه ..
الكهرباء جريت من الشارع واير على كد الضوه والمي هم جريت صونده من البوري مال الشارع ..

ضحى من البرد خلصتها مريضة وتكح حيل ..
واني هم مثلها ..
جنت باليل اغطيها بشكو شي عدنه ثخين واحضنها حتى تدفى ..