قبل التلاشي قبل الغرق

قبل التلاشي قبل الغرق١٧

#قبل_التلاشي_قبل_الغرق
بقلم #روز_الفياض
ج١٧
.
.
حتى عند التلاشي أو الياس .. انا دائما بخير .. فانا شخص يعرف جيداً كيف ينجو لكثرة مااعتاد على الغرق ويعرف يكف يقف لكثرة مااعتاد على السقوط .
.
.
.
طلعت افتر بالشوارع كلبي مقبوض .. اتمنيت لو ميت .. ميت ولا احس الكل مستعر مني ومتكبر علي وناكر تعبي ..
حتى امي ظلت تدور رضى بناتها لان عدهن فلوس !!

ملكيت مكان فارغ واظلم غير المكان الشفت بي ضحى اول مرة ..
وره الدكان ..
كعدت وبجيت براحتي وبقيت كاعدة ماادري شكد ساعة ساعتين مالي خلك ارجع البيت ولا الي عين احط عيني بعين هاي المسكينة ضحى ..

تعبت وكمت رجعت للبيت ..
اتمنيت الكاها نايمة ..
لكن لكيتها كاعدة وبعدها بهدومها ..
حازم :
سلام
ضحى :
وعليكم السلام ..

اخذت هدومي للحمام بدلت وغسلت واتوضيت ..
رجعت اريد اصلي كالت :
اوكف لتصلي تانيني اتوضا واجي اصلي وراك .
حازم :
وين جنتي لهسه لاصليتي ولا اتوضيتي ..

كتلها بعصبية ..
محجت شي ركضت بسرعة اخذت هدومها وراحت بدلت واتوضت واجت وكفت وراي ..

خلصنة صلاه كالت :
تتعشه ؟
حازم :
مااشتهي .. مالي نفس .. انت اتعشي ..

تمددت واطيتها ظهري ..
اسمعها تتحرك بالغرفة تسوي عشه الها ..
تغني وتشتغل ..
بقيت متعجب شعجب مزعلت من حجي امي وخواتي ..
هي سمعت كل شي ..
صفنت افكر ..
سمعت صوت ( تششش ) وشميت ريحة طماطة كلي ..
درت عليها اباوع كتلها :
الج خلك تگلين ؟
ضحى :
الياكل بضرسه .. ينفع نفسه ..
واني مسويه كباب عروك من الظهر بس مااتغدينه .. هسه هم نبقى بلا عشه ؟

ابتسمت ..
گلت الكباب والطماطة وخيار وخبز وجاي ترست الصينية واجت خلتها يمي :
يالله .. كوم .
حازم :
شلون الج نفس ؟
ضحى :
ليش ؟
حازم :
مو سمعتيهن حجن عليج ؟
ضحى :
اي وشسوي يعني ؟ انت مو اتعاركت وياهم ؟ هاي انتهت بعد شحجي ..
حازم :
عبالي اجي الكاج اموته روحج من البجي ؟
ضحى :
علمود الحجي الكالنة خواتك ؟ عادي .. شنو اول مرة اسمع هالحجي يعني حتى اظل ابجي ؟ مو اول مرة .. اتعودت ..

ارتاحيت من عرفت هي مضايجة بسبب اللي صار وكعدت اتعشى وياها بس بكلبي اكول حتى لو متعودة هم لازم عدها كرامة ..
حازم :
عاشت ايدج ..
ضحى :
طيب ؟
حازم :
كلش طيب ..
ضحى :
بالعافية .. حطيتله بصل اخضر ..
حازم :
اني مااحب البصل .. بس هنا طعمه غير ..
ضحى :
عمرك خسارة هو غير عبالك تفاح .

ضحكت حيل :
يالظالمة البصل مثل التفاح ؟
ضحى :
لا خو مو كل بصل بس هذا البصل الاخضر يصير بارد  ..

خلصنه عشه وكعدنه نباوع عالتلفزيون  بس اني جنت افكر باللي صار وهي حست بيه كالت :
اني لو عدي بس مكان انام بي مثل هالغرفة ماابقى عدك واسويلك مشاكل ..
حازم :
متعود عالمشاكل .. بس هالمرة مجنت متوقع امي تفضح سري وتصف وياهم ضدي ..
ضحى :
تره حقهم .. اذا انت مستعر مني وكايللهم مجدية ومخليها عدي لحدما اشوفلها دبره شتريدهم يحجون  ؟
حازم :
مو مستعر منج .. بس اني كتلج قبل مااعرف شلون اتعامل وياج انقهر عليج .
ضحى :
بعد انت تكول امي فضحت سري .. شلون مو مستعر؟
حازم :
ضحى انت بعدج زغيرة صعب عليج تفهمين قصدي وتفكيري .
ضحى :
لا فاهمتك وعاذرتك .. والله عاذرتك بس ان شاءالله الله يفرجها .
حازم :
شلون الله يفرجها ؟
ضحى :
ماادري .. يجوز امي الله يهديها وتجي تدورني وتاخذني عدها .. يجوز اروح لدار المسنين اعيش هناك ..