قبل التلاشي قبل الغرق

قبل التلاشي قبل الغرق٧

#قبل_التلاشي_قبل_الغرق
بقلم #روز_الفياض
ج٧
.
.
.
بسم الله الرحمن الرحيم
( فأما اليتيم فلا تقهر واما السائل فلا تنهر واما بنعمة ربك فحدث ) .
في كل مرة اقرا فيها هذه الاية اجد فيها تاكيدا على شيء ما ففي اول مرة اكد الله سبحانه وتعالى على عدم قهر اليتيم .. دلالة ان ان قهر اليتيم فيه ذنب عظيم .
وفي المرة الثانية وجدت فيها ان الله سبحانه يؤكد على عدم نهر السائل فكلمة ( لاتنهر ) معناها لاتزجر ولاتصرخ ولاتصيح دلالة على ان زجر السائل ذنب عظيم كذلك وونهى الله سبحانه وتعالى في القرآن الكريم عن زجر السائل وزجر الوالدين ( ولاتنهرهما وقل لهما قولاً كريما ) لما له من ذنب عظيم في الحالتين .

وفي الثالثة وجدت الله سبحانه وتعالى يأمرنا بالحديث عن نعمه علينا .. فعجبت للاولى فما اكثر الايتام المقهورين وعجبت اكثر من الثانية فكم من سائل تعرض للزجر من ذي نعمة ..
والثالثة اشد واعظم فلم اجد من يحدثني عنه نعم الله عليه ، بل وجدت اكثر الناس كثيرة الشكوى .
.
.
.
انطيت اخواتي كل وحده تليفون وارتاحت امي شوية ..
ظليت افكر شلون اسدد هالدين العلي لبشير ؟؟
مااريد منيته علي وفضله يطول ..
وقررت يومية اضم ربع الي احصله حتى لو الف دينار هم اضم ربعه وان شاءالله يتجمع المبلغ .
بقت لازم اشتري لكل وحده شريحة .. ماعندي بس وعدتهن اشتريلهن بس اسدد فلوس التليفونات .
مااعترضن لان مادام اشتريت التليفونات معناها اول وتالي راح اشتريلهن كل وحده شريحة ..

ومااريد افكر من هسه واشيل هم فوك همي بس مو بيدي .. هالشرايح متريدلها رصيد ؟؟ منين انوب اجيبلهن رصيد.؟

كل يوم يمر جنت اخسره من شبابي وصحتي وعافيتي ..
شغلي ويه الحجي بقى مثل ماهو ومره من المرات اطاني ( ٢٥ )
فرحت هاي ربع فلوس الدين ..
شافني فرحت كلي :
شراح تسوي بيها ؟
حازم :
شسوي بيها ... خواتي يردن كل وحده شريحة للنقال وهسه الشرايح بدت ترخص اضمهن والم فوكهن ومن يصير مبلغ زين اشتريلهن كل وحده شريحة ورصيد .
ابو بشير :
يعني هن عدهن نقالات ؟
حازم :
اي حجي امي تخاف عليهن وكالت لازم نشتريلهن والله يطي بشير اخذني لولد صاحبة عده محل تليفونات واشتريتلهن كل وحده واحد .. مستعملات يعني مو جدد ..
ابو بشير :
بشير اخذك ؟ شوكت ؟
حازم :
قبل فترة ..
ابو بشير :
شو مكتلي ؟
حازم :
شكلك حجي .. متسوى اكلك هو طابوكة مستعمل .

سكت الحجي وصفن .. يمكن استغرب انه بشير يخدمني بشي ..

وره شوية كلي :
اكلك حازم ؟
حازم :
ها حجي ؟ اجيبلك بعد جاي ؟
ابو بشير :
لا مو عالجاي .. بس اكلك شتعرف عن بشير ؟

اتفاجأت بسؤاله وارتبكت :
هاا حجي ؟ شعرف عن بشير ؟ شعرف عنه يعني ؟ كل خير .. خوش ولد ومؤدب وابنك وانت مربيه احسن تربية وامه الحجية بعد شيطلع ..
ابو بشير :
ولك حازم .. لتصير لوتي .. متعرف تره ..
حازم :
ليش حجي ؟ شكلت ؟