قبل التلاشي قبل الغرق

قبل التلاشي قبل الغرق ٢١

#قبل_التلاشي_قبل_الغرق
بقلم #روز_الفياض
ج٢١
.
.
.
رغم انه ابوي تركنه من زمااان وعاش حياته .. بس بجيت من كلي فرقد مات ..
جنت اتمنى يرجع بيوم من الايام ويكول ولدي وبناتي ..
مااتمنيت يموت وهو بعيد عنه ..

سوينه فاتحة رغم هو اندفن هناك بس بعد لازم ..
خطية رياحين ملحكت تفرح بزواجها .. خبر موت ابوي عكر كل الاجواء .
امي الجانت كل عمرها تحجي عليه خلصتها بجي ونعاوي ..
وام بشير وياها عالواهس ..

بعد الفاتحة جنت بالبيت نايم تعبان ومالي خلك ..
اندك الباب طلعت ضحى فتحت الباب ورجعت كعدتني :
حازم ..
حازم ..

حازم :
هممم ؟
ضحى :
خالتي والبنات .

فتحت عيوني :
خالتج منو ؟ يابنات ؟
ضحى :
امك وخواتك ..

كعدت .. استغربت كمت بسرعة طلعتلهم للديوانية خفت خاف صاير شي ..
دخلت شفت امي وسلوى ومروه ورياحين ووياهن فرقد ..

بس دخلت كامن سلوى ومروة سلمن علي وباسني ..
اتعجبت ..
حسيت امي يمكن صدمة موت ابوي صحتها يمكن ظلت تفكر بالموت لذلك جابت خواتي حتى يصالحني ويطيحن علي ..

سلمت وكعدت وبدت امي تنعى عالاخوان شلون همه حزام الظهر وشلون الخوات تلوذ بيهم ..

بجينة كل احنه ..
ورغم زنوبة كبرت شوية بس خواتي مااجن لضحى من جابت ولاوجبنها ..
هالمرة جانن جايبات كل وحده هدية ..

بعد ايام اجه ماهر ..
مفاجأة ..
اتفاجأت من رحت اشوف امي عد بيت فرقد خابرتني ورحتلها ..
فتحلي الباب بالبداية معرفته ..
كبران .. مشيب .. بس صاير كللش كشخة ومبينة عليه النعمة والراحة ..

ناس هواي عد بيت فرقد نسابته وجماعته جايين يسلمون على ماهر فبقيت ساكت ..
لاعاتبت ولاحجيت ..
وشينفع العتب بعد ..

ماهر جان جاي هو ومرته وبته ..
جايين حتى مرته تشوف اهلها وهو جاي علمود موضوع الورث على كولته ..
حازم :
هو ظل ورث .. البيت وبعتوه على حياته وكلمن اخذ حصته .
ماهر :
لا .. عده بعد تلث محلات وبيت الورثهن من مرته .
فرقد :
وهناك ؟
ماهر :
هناك وين ؟
فرقد :
يمكم بالسعودية .. مو عده معرض سيارات وبيت مدري بيتين .
ماهر :
كلهن مال مرته مو مالاته .
فرقد :
هاي شلك بيها .. المعرض ماله هو كال من اجه خطبلك .
حازم :
مو على اساس هو اجه خطب وراح بدون ميجيكم ولاتشوفونه ؟
فرقد :
اني رحت شفته هناك يم عمامي ..
حازم :
اي .. بس انت ابنه .
فرقد :
هسه وكته هالحجي ؟
حازم :
شوكت وكته ؟ شوكت ؟
فرقد :
هسه احنه بسالفة الورث مات هو وراح لدار حقه احنه هسه نحجي بالورث اميهر تريد تاكل علينه الورث ؟
ماهر :
خب دروح .. اكل عليه الورث .. اكو محامي هو يعرف كل شي اني شكو ..صوجي اجيت اني لو باقي هناك ومرتاح من دوختكم ولا هالجيه الكشرة هاي .