قبل التلاشي قبل الغرق

قبل التلاشي قبل الغرق ٥

#قبل_التلاشي_قبل_الغرق
بقلم #روز_الفياض
ج٥
.
.
.
الحياة الدنيا ماهي الا مرحلة قد تنتهي في اي لحظة فهي مجرد اختبار للانسان يختبر فيها صبرك وقوتك ويختبر فيها قدرتك على التحمل على العطاء على التسامح على ان تكون انسان سوياً رغم كل ماتمر به من ظروف قاسية ..
.
.
بعدما صار ماهر اخوي بالكلية صارت مروة اختي بالسادس وظلت تلح على تريد تاخذ محاضرات بالانكليزي ..
حازم :
والله ماعندي المحاضرة بخمسة هواي شدعوة خلي ماهر يشرحلج .
مروه :
هو وين ماهر الصبح بالكلية يرجع ينام العصر يبدل ويطلع يرجع بالليل اني نايمة .

دخل ماهر كتلها :
هذا هو اجه .. تعال ماهر .
ماهر :
هاا ؟ شكو ؟
حازم :
درس مروة انكليزي .. تريد تاخذ محاضرات بس المحاضرات الساعة بخمسة ماعدي والله .. فرقد صارلة يومين ياكل براسي يريد ستلايت ورياحين تريد جنطة للمدرسة جنطتها تكول مال العام ومخيطتها مدري كم مره وهسه هم انشكت وبعد متتخيط ..
ماهر :
ماعدي وكت ..
حازم :
شعدك ؟
ماهر :
هذا الولد بالمكتبة يريد واحد يشتغل وياه عالاستنساخات .. كتله اني اجيك ..

امي جانت تصلي خلصت كلتله :
اي خوش خوش صلاوات .. اي يمه شوفلك شغلة ساعد اخوك .. مات من الركضة عالعيشة .. وهاي وينها رياحين جنطتيش بعد خل تاخذ هذا الفكس مال سلوى القديم تخلي بي كتبها .
ماهر :
فكسيش ؟ الفكس دهن مال بلاعيم مال اعصاب مال تشنجات مو مال كتب يمه .
حازم :
هههههههههه خرب يومك .
ماهر :
هههههه والله .
امي :
مو اكلك دمك طين على ابوك .. هذا مال الكتب مال الجامعة ولك .
مروه :
ههههههه لفكس لفكس هههههه .
ماهر :
لفكس وين يكفي كتبها مال المدرسة ميكفي لازم جنطه .
حازم :
هسه عوف رياحين علي انت خلصني من مريوه ودرسها انكليزي .
ماهر :
مااكدر والله .. اكلك التزمت ويه هذا الولد ماالحك ارجع تعبان اريد ادرس اريد انام هي خل تقرا شبيها عوزها كبر ..
مروه :
هو اني لو اعرف اكلك اعرف خبيث .
ماهر :
تره اكوملج .
امي :
كافي لاتتعاركون ... مريوه دومج عله بكل سنة عدج درس تشلعين كلبنه بي .
مروه :
يمه هو بكيفي غير المادة صعبة .
امي :
لا مو صعبة بس انت تردين تتفيكين كدام البنات عود مثلجن عدي مدرس .
مروه :
هسه اني شطالبه ياناس تردون ارسب واعيد السنة على مادة وحده ؟؟ مو هذا فريقد يريد ستلايت شو ماتحجون عليه .
ماهر :
دولي .. هي غير امة محمد كلها خلت ستلايت من اول السقوط بس احنة خررب الدنيا كلها تسولف بالستلايت واني اظل ساكت من يحجون .
حازم :
كافي كافي .. وحده وحده خلوني احل سالفة الانكليزي وانوب عود الستلايت .
مروه :
والجنطة ؟
امي :
جنطتيش ؟
مروة :
مال رياحين بيش تروح للمدرسة ؟
امي :
الله واكبر عليجن طلباتجن ماتخلص .
حازم :
الجنطة سهلة اجيبلها من البالة .. بس الانكليزي شكم محاضرة يعني تحتاجين ؟
مروة :
ماادري عالاقل قبل الامتحان اروح اخذ محاضرة .
حازم :
الله كريم .. شوكت امتحانج ؟
مروة :
الاسبوع الجاي تبدي الامتحانات .
حازم :
الله كريم ..