قبل التلاشي قبل الغرق

قبل التلاشي قبل الغرق٤

#قبل_التلاشي_قبل_الغرق
بقلم #روز_الفياض
ج٤
.
.
.

رجعت ذاك اليوم للبيت واني خايف خاف ابوي ومرته اذوا امي بكلمة لو بتصرف .. مابيه حيل القهر ياربي ...
دخلت للبيت شفت امي كاعدة تكوي هدوم اخواني وخواتي يمها كاعدات يدرسن بهدوء ..

فرحت كلت مبين مصاير شي من اللي ابالي .. الحمدلله الظاهر حجيها ويه ابوي جايب نتيجة ...
الحمد ..
ماكو شي معناها ..
لاصايره بينهم مشكلة ولاصاير بينهم حجي مو حلو او مغثة ..
لكن اللي اكتشفته بعدين انه امي رايحة وباقي تدك بالباب فوك النص ساعة محد فاتحلها الباب لحدما طالعة وحده من الجيران كايتلها هاجروا ..
امي :
وين ؟
الجارة :
والله خيه مااعرف بس يكولون راحوا للسعودية .
امي :
ياا شيصخمون بالسعودية ؟ حسبي الله عليك من رجال انوب عفت البلد وعفتنه وانهزمت ؟!!!

ورجعت امي مصدومة ومتعجبة لان المسكينة حتى لاهلها صار سنين مرايحة وعدها السفر لاهلها بغير محافظة فد شي صعب ويحتاج فلوس مو بعد سفر لغير دولة هذا شي بالنسبة الها حتى باحلامها ممتخيلته ..

حازم :
ها يمه شلونج اليوم ؟

باوعتلي وهي مبتسمه نص ابتسامة :
الحمدلله .. نحمدالله ونشكره ..

ولان اعرف امي مقهورة من هجرها ابوي لليوم وتريد بس واحد يسالها حتى تبث همومها وشكاويها من ابوي ومرته فسألتها رغم رياحين حجتلي القصة كلها من وصلت :
بشري شصار وياج اليوم شفتي ابوي ؟
امي :
شصار هو يجي من وراه خير .. ساعة كاملة ادك بالباب لاهو طلع ولاذيج العجوز اليابسة ام كراعين .. حمستني الشمس حسبي الله عليهم .. هسه يطلعون بعد شوية يطلعون وكل شي ماكو .. لوما هاي المره جيرانهم طلعت كالت ماخذ هالملحة الجلحة ومسافر للسعودية جان بقيت لهسه ادك بالباب ..
حازم :
ههههه باقية لهسه شتسوين هههههه دكيتي الباب ومحد فتحه معناها محد بالبيت .
امي :
لا والله جنت ناوية اضوجهم شوية كلت يجوز مايردون يفتحولي الباب خل اكسره على راسهم .. بس غير الحظ الاغبر طلعوا مهاجرين عشتوا .. هو ابوك هنا للحلة لاهله صارله سنين مارايح انوب للسعودية .. الله يرحم ايام الفگر هسه صار عده فلوس وعاف مرته وجهاله وراح للسعودية ...

بقيت ساكت رجعت كالت :
اعععععع لللسعوووددييية ... شوداك ياخيايب صدك جذب شوصلك ؟
حازم :
هو مو شوصله هو شلون راح ؟ على اي اساس ؟ اخاف غلطانه يمه يجوز سمعتي بالغلط مو للسعودية ؟
امي :
لا لا شلون غلط هي كلتلي للسعوووووددددييية .
حازم :
والله ماادري .
امي :
راحوعافنه .. عاف مرته وجهاله .. لاكال منو يصرف عليهم لاكال منو يطيهم منو كال خاف يحتاجون شي .. انهجم بيتك من رجال لاتحس ولاتفكر بس بروحك .
حازم :
يمه انت ليش حارگه دمج وحارگه اعصابج هو شوكت صرف علينه لو يدري بينه شمحتاجين ؟؟ احنه نسيناه من زمان وعشنه على هذا الاساس على اساس ماعدنه ابو انت بعد ليش مدوخة روحج بي سافر لو بقى ؟
امي :
اممم .. اني قابل بحالهم مو بحالهم اصلا كافي علي قهركم .
حازم :
شبينه عايشين الحمدلله .. اكو شي ؟
امي :
لا ماكو شي .. بس مقهورة على تعبك وشبابك المثلك هسه بالجامعة وانت تشتغل حمال سوده علي .
حازم :
لاتنقهرين ولاشي .. كتلج احنه اتعودنه واني اتعودت اصلا يوم الجمعة اضوج لان ماكو شغل لااشيل ولااحط ولا ادفع العربانه ..
امي :
اااخ ياحازم يايمة .. شوكت ترتاح .. شوكت تدرس مثل اخوانك ..
حازم :
الله كريم يمه .. الله كريم .