قبل التلاشي قبل الغرق

قبل التلاشي قبل الغرق٦

#قبل_التلاشي_قبل_الغرق
بقلم #روز_الفياض
ج٦
.
.
.
تضعك الحياة في مواجهة مباشرة مع بعض البشر الذين تكون حياتك معهم مجرد حرب مستمرة باردة لاتعرف ماهي ومااسبابها ولاتعرف متى تنتهي .. محاولاً فقط ان تخرج منها بأقل الخسائر فالحروب عادة لارابح فيها عدا شبح الموت .
.
.
حازم :
اني ؟
بشير :
اي انت شبيك خفت ؟ مو تكول اني مثل اخوك الجبير .. اريد تشهد على زواجي اذا صدك .
حازم :
لا لا .. مااكدر .. الحجي اذا عرف راح يزعل مني .
بشير :
الحجي شمدريه .. منو راح يكله ؟ عقد وبجيبي شمدرية منو الشهود اصلا محد يدري بزواجي بس انت .
حازم :
لابشير لا .. والله يزعل مني الحجي واني مااكدر ازعله .. ملكيت غيري يشهد وياك .
بشير :
ولك شكد خواف انت .. صير نجر .. صير سبع لتخاف من احد .
حازم :
مو خوف بس هذا احترام .. الحجي صاحب فضلي علي شلون اخونه .
بشير :
هاا هاا جنك ظليت تلوصها شنو اخونه شنو خيانة قابل اني مسوي شي حرام ؟ لو كايلك بوك لو سوي شي مو زين لاسمح الله ؟
حازم :
مو قصدي بس اني مااريد الحجي يزعل مني مااتحمل يزعل مني هو والحجية .
بشير :
ولك بطل لواكة بطل .
حازم :
والله العظيم مو لواگة .. الحجي صاحب فضل علي وعلى اخواني لوما هو جان انحجت حجايتنه يمكن جان كتلنه الجوع .
بشير :
كافي كافي لتدوخني متريد تشهد خلص لتشهد بس بعد تنسى عندك اخ اسمه بشير وصدكني راح اردلكياها هم تحتاجني بيوم واردلكياها .

بقيت متحنط ومتحير بسرعة هذا گلب علي وظل يهددني .. اعرفه بشير يسويها .. وهم حسسني اني خاين للعشره ماادري حقه لو مو حقه دخت واحتاريت ..
بقيت ساكت ..

بشير :
روح .. روح .. اني هسه اشوفلي واحد من الشارع يجي يشهد ..

بقيت واكف محتار اروح لو ابقى بالحالتين اني متورط ..
اذا مااشهد وياه باجر يخلي الحجي يقلب علي ويجوز هو عالعناد يجي يشتغل ويه الحجي حتى يخليه يطردني ..
واذا صار للحجي شي بعد عمر طويل مالي عيشه ولاالي شغل يم بشير لان هو هسه بصريح العبارة جاي يكلي مراح انساها الك ..
شلون ؟
شسوي .

ماكدامي حيل غير اشهد على زواجه والله يستر .. عالاقل هو ابنهم والوحيد ماعدهم غيره يعني حتى لو زعلوا منه يوم يومين شهر بالنهاية راح يرضون عنه ويتصالحون وياه .. واكيد هو راح يدافع عني ويدير باله علي اذا صار شي ..
عاالاقل اكون كسبته لان اعرفه نحيس وارعن على كولت الحجي .

وشهدت على زواج بشير ..
ورجعت للبيت راسي مفتر من التفكير ماادري اللي سويته صح لو خطأ بس شعور بتأنيب الضمير والندم ماكلني او هو خوف خاف الحجي يزعل مني وينكطع باب رزقي ..
وين اروح ؟
حسبي الله عليك يابشير منين طلعتلي ؟
شجابك علي ؟
هاي السالفة لان مابيها خير ذكرتني بيها ..
لان بيها اذية اجيت على حازم ..
جان شهدت جماعتك الطاگين لو كدرت علي لان فقير ..

امي :
ها حازم .. رجعت ؟

هزيت راسي اي وبقيت ساكت .
امي :
متكوم تصلي ؟
حازم :
هسه ..
امي :
شبيك يمه ؟
حازم :
مابيه ..
امي :
وين رحتوا انت وبشير ؟
حازم :
لبيته .
امي :
بيته ؟ عده بيت ؟