قبل التلاشي قبل الغرق

قبل التلاشي قبل الغرق ١٠

#قبل_التلاشي_قبل_الغرق
بقلم #روز_الفياض
ج١٠
.
.
.
عندما نتأمل محطات حياتنا نندهش من كمية المنعطفات التي مررنا بها .. ونعجب لشدة رباطة الجأش التي لدينا !!
فهل حقاً مررنا بكل هذا الكم الهائل من المنعطفات والمشاكل ؟
ام ان هذا كله كان مجرد حلم ؟
اكان هذا شجاعةً منا ؟
ام كنا مجبرين على تحمل كل هذا والتعايش مع كل عشناه ؟

ربما ..
ربما .. يكون كل مامرننا به خيراً لم نكن حينئذ ندركه .. ولكنه الان صار واضحاً جلياً مهما حاولنا الانكار .
.
.

وطلعت مرت بشير حامل ..
ومابين فرحة الحجي والحجية ومابين خجلنه اني وماهر وبين فرحة امي الي عبالك ام مرت بشير لو بشير ابنها وفرحانتله .
امي :
صلاوات على محمد .. صلاوات على محمد .. يمه الله يكومج بالسلامة ويسهل عليج ويترس حظنج جهال كولي آمين .

ردينه كل احنه آمين ..
امي :
كوم ولك حازم .. كوم طيح عالحجي وبوس راسه وبوس ايده بعد ..

كمت واني مستحي ومحرج دنكت على راسه بسته وردت ابوس ايده بس مقبل ودمعت عيونه ..

من شفت عيونه دمعت حضنته وظليت ابجي كتله :
انت ابوي .. واكثر .. اني ضميري يوجعني من يوم الشهدت وياه والله العظيم ضميري يوجعني .. بس خفت اكلك خفت تطيح وتخرب مثلما صار هسه وخفت من بشير من كلي اردلكياها ..

بجه الحجي بعدين خله ايده على راسي كلي :
انت ابنه .. اححححنه ربينااااك ..
امي :
اي والله ابنكم وربيتوه وانتم السويتوه رجال وعليه الاعتماد لوما انتم جان الله اليعلم شصار بينه .. والله وهو ماناكر فضلكم الله الشاهد ومايذكركم الا بكل خير ودعاء .. والله العظيم من يوم الاجه عليه بشير واخذه وشهد لليوم هو مامرتاح يريد يحجيلكم بس يخاف تزعلون منه .. بعد انتم تعرفون حازم مو غريب عنكم وامدحه كدامكم حازم ابن سوك بس الاسم فقير وطيب وكريم ونفسه حلوه وماعده وجه مكروه ويه احد بس حظ ماعده .
الحجية :
اي والله .. اصلا اذا انت متمدحينه اني امدحه ياام حازم .. انت الام الجابت واني اريد امدح نفسي واكول اني الام الربت مو بس انت ربيتيه اني هم ويشهد الله علي يوم الدين مايوم اعتبرته غريب لو يفرق عن بشير .. لا بالعكس والحجي هم يشهد كلما يجي احجي واعلم واوصي لان اشوفه فقير وكلبه طيب وباليده مو اله .. مرات افكر اكول ياربي هذا الولد شلون بي ؟ لشوكت يبقى يركض والعشا خباز لايفكر يتزوج لايفكر يكمل دراسة لايفكر يشوفله شغلة ثانية يعتمد عليها ويعيش منها الى متى يبقى يركض وماكو شي والله كلبي يتكطع عليه .. اني اشوف بي الابن الاتمنيت ابني يكون مثله .. ابني كون طالع مثل حازم يفكر بينه يفكر باهله بمرته .. بس شنكول الحمدلله والشكر على كل حال .
امي :
الحمدلله .. حجية انت عزيزة وتدرين بمعزتج مثل اختي الجبيرة اني اعتبرج بس سالفة الزواج احنه هسه مانكدر نفكر بيها .. بيني وبين روحي نوبات اسولف مثلج واكول هيج ازوجه وهيج اخطبله وهيج ازفه وهيج اركص بعرسه .. بعد يعني واحد ويسولف على روحه تدرين انت .. بس بعدين اتذكر العيشه شلون كوه مدبرها هو .. بت الناس التجي هم تريد مهر واخشاب ونيشان وحلقة ومحيبس وهم من تجي عدنه تريدلها مصيرف .. هو لروحه مايلحك يشيل دينار خاف يعتازله قميص لو شي انوب يلحك على طلبات المره .. والبنات تريد مو مثل الرجال هالبنطرون والقميص وهاي هي .. بنات تريد كل شي وهو ماعده امكانية ليش الجذب ..