قبل التلاشي قبل الغرق

قبل التلاشي قبل الغرق ١٣

#قبل_التلاشي_قبل_الغرق
بقلم #روز_الفياض
ج١٣
.
.
.
شلت هدومي والباقي من اغراض البيت المكيف والتلفزيون اخذتهن وياي وفراشي هم اخذته .. الثلاجة جانت باقية بس كشر وشعدي بيها شحط بيها منو يطبخلي بعد ويسويلي اكل .

شلت الطباخ والثلاجة بعتهن على ابو القديم .
رحت شفت الغرفة غرفة عادية صحيح تعبانه حيطانها وارضيتها بس كافي علي شعدي ..
بيها جرباية ام نفر مكسره وميز زغير مابي باب خليت بي هدومي ورحت جبت سطل وطاسة مادام بيها حنفية اتحزمت وغسلتها ونظفتها وفرشت فراشي عالجرباية وحطيت راسي ونمت ..

نمت بدون هم لاول مرة بدون ماافكر خاف اليوم اليومية متكفي ..
خاف رياحين تريد فلوس تشتري اوراق ودفاتر ..
خاف امي ماعدها دوا ..

نمت لاول مرة بدون ماافكر بغيري ..

بيت ياسين جان كبال الغرفة وكلي اذا تحتاج شي دك الباب علينه ..
مرت يومين واني اشوف خوانه يطلعون يلعبون بره كلهم زغار جهال بعمرنه من جنه زغار وعافنه ابوي ..
ظلينه نطلع الصبح سوا للشورجة ونرجع سوا ..
مااتريك محد يسويلي ريوك وماعدي بعد لاطباخ ولاشي .
ابقى للظهر اشتريلي لفة فلافل واكلها وبالليل جنت اتمشى للشارع العام اكو دكان جبير اشتريلي جبن لو كيكة اكلها وارجع الف راسي وانام ..
حتى ماكو واهس اباوع للتلفزيون .
مرة مرتين من اروح للدكان جنت اشوف مجدية كاعدة وره الدكان بالظلمة بس مامبين وجها ولا احد يتعرضلها ..
ينكسر خاطري عليها واكول الحمدلله محد من خواتي صار بيهنا هيج ونامت بالشارع ..

العيب الوحيد جان بالغرفة الاني نايم بيها هو الزبالة ..
الناس جانت تجي تذب الزبالة وراها .
اتعاركت جم مره ويه الناس من اشوفهم يذبون زباله بس ماكو فايدة ..
واليضوج الريحة تطلع مرات ومااكدر انام .. من غير البزازين التجي تاكل بالزبالة وتتعارك الليل كله ..
لو مرات تجي الجلاب وتصير بيانتهن معارك ومطاحن والنباح يشتغل بالساعات ..
ابقى كاعد وحاط المخدة بحضني ماادري شسوي ..

فكرت كم مره اذب سم بس خفت خاف حرام واتحمل ذنب .
بقيت متحمل هالوضع غصبا عني واكول الحمدلله عالاقل مشايل هم احد غير نفسي مادام بحدي سهلة رجال واتحمل حتى لو انام بالشارع ماكو مشكلة ..

جنت اتصل على امي كل جم يوم اشوف شخبارها حسيتها مرتاحة يم فرقد ..
بعدين راحت من بيت فرقد لبيت مروة ..
مروة بيتها جبير ومحد عدها رجلها دوامه من الصبح للمغرب وامي تبقى يمها :
يمه رياحين خل تبقى عد فرقد .. عالاقل بيت اخوها .. مو تخلينها تروح تبات عد الناسبة انوب تجينه حجايه لو احد يشوفها .
امي :
لا لا لاتوصي حريص بقت يم فرقد ادري بيك ماتقبل .
حازم :
عينج عليها واذا احتاجيتن شي خابرني .

امي هم حسيتها خذتها الراحة حقها جابت عمرها تركض وياي تعبت ومره جبيرة تريد ترتاح .
بردت حسيتها ..مو مثل الاول تسال علي وماترتاح الا تسولف وياي ..