#امانتي
البارت 1
بقلمي ملاك الصمت
اسمي هيفين الوحيده لاهلي بذرة عشگهم .. اسمي كردي و دمي كردي من جهة امي وابويه من الرمادي ابن الغربيه ..
شلون هيج انجمعوا واتزوجوا .. ابويه حارب الدنيا واخذ امي ..
اهل امي ناس ع گد حالهم عايشين بكركوك واهل ابويه لا ناس زناگين فماشافوا انو من المناسب ابويه ياخذ مستوى اقل منه ماديا بالاضافه الى كون امي كرديه هذا مجان مقبول عدهم اطلاقا ..
ابويه جان هو الاخ الوسطاني من بين 3 اخوان وخوات 2 ..
من زمن صدام همه زناگين شغلهم كوله بالتجارة ونقل بضائع وابويه رغم صغر عمره جان لازم شغل ابوه جدي الله يرحمه الفرع المفتوح بكركوك بس جان يروح ويرجع بين كركوك وبين الانبار ..
وبوحده من روحاته شاف امي وصار حب من اول نظرة وبقوا يتشاوفون من بعيد وغير النظرات ووعد الگلوب مصار بينهم شي ثاني ..
امي جانت يتيمه الاب وعدهه اخ واحد خالو سراج وامهم بيبيتي تربيهم بين اجدادهم وبين خوالهم ..
فتح ابويه موضوع زواجه ويه اهله ومن عرفوا البنيه كرديه واهلهه ناس ع گد حالهم وفوگاهه اكراد شيعه رفضوا الموضوع رفض نهائي بس هو جان قافل ومجان بوقتهه محتاج احد لان ماديا متمكن بفضل شغله من عمر صغير ..
اقرب اخوانه اله جان اخوه الجبير عمو عبد الهادي فطلب منه يروح وياه يخطب امي بالبدايه رفض بس ابويه گله بيكم او بلياكم اني متزوج هالبنيه جان قصده يحط اهله كدام الامر الواقع لان گاموا يتخطبوله بنت العم وبنت الخاله وبنت العمه بدون علمه ورضاته ..
وافق عمو عبد الهادي الي جان بوقتهه متزوج وعنده ولد واحد اسمه مقدام ..
راحوا سوة خطبوا امي من اهلهه وابويه سولف ظروفه لبيبي ام ماما انو اهله مراضين ع زواجه وكون اذا وافقت بي متتوقع تجيهه مشيه زلم لو مشيه نسوان بيهه ابوه لو امه وحته العرس اذا صار يخلى من اهل ابويه ..
ولان هو زنگين وعرفت بنتهه رايدته وافقت بشرط بنتهه تبقه كاعده بكركوك قريبه عليهه ويامسهل هالشرط ع ابويه لان هو اصلا شغله بكركوك عود بالشهر مرة ينزل يزور اهله عاد هسه هنا يصيرله بيت وتصيرله مرة واطفال منو يعلم ..
وصدوك اشترى ابويه بيت بكركوك وجهزة وكل تجهيزات الزواج من الابرة لاكبر شي جهزة لامي واتزوجهه خلال شهر ..
وعمي وزوجته وابنه جانوا حاضرين العرس بس بدون علم احد من اهل ابويه ..
احلا حياة عاشوا مو بس جانوا يحبون بعض جانوا متفاهمين همات ..
امي تأخرت بالحباله يمكن سنتين بعد زواجهم ..
كل هالفترة وابويه مدللهه طلباتهه اوامر ..
بعد ما ماما تعالجت من طبيب لطبيب حبلت بيه ومن جابتني ولان عدهه قلب قلبهه ضعيف توفت بالولاده ..
عمو عبد الهادي ابد معاف بابا خاصة بهاي محنته احتواه ولزمله شغله بين ميطلع من محنته ويگوم ع حيله لان عمو جان يعرف شكد جان بابا يحب امي ومتعلق بيهه ..
بذيج الفترة عمو عبد الهادي صار عنده ويه مقدام بنات 2الثانيه صغيرة جانت توهه عمه ياسمين زوجة عمو عبدالهادي توهه شهرين جايبه بنتهه ..
اول ما ماتت ماما واني اجيت للدنيا بابا كرهني مارادني لان اخذت الحياة من ماما هيج كان متصور او هيج كان يفكر ..
فنكرني ومرادني شمرني ع بيبي ام ماما ..
ابويه طلع من خطيتي بكولشي مو بس مرادني كرهني همين ونكرني .. طفله اني جنت شذنبي ..
حبس روحه بغرفته ..
جنت من ابجي يصيح سكتوهه خرسوهه لا اجي اخرسهه بيدي ..
يبقى يعيط الى ان يتعب ومرات جانوا يسمعوه يبجي بنحيب ويعاتب بصور امي .. هيج جان يحبهه ومتعلق بيهه ..
مادرى عني شلون صرت وشلون كبرت وشلون تربيت بس جنت كوله بيد بيبيتي وعمه ياسمين الي جانت ترضعني ويه بتهه شهد بالاضافه الى حليب قواطي لان عمه جانت تجينه اسبوع وترجع لبيتهه بالرمادي اسبوع فبالاسبوع الي تجي بي هي اني ارضع من صدرهه ومن تروح بيبي تشبعني بحليب القواطي ..
أنت تقرأ
امانتي
General Fictionقصه منقوله للكاتبه ملاك الصمت غربه حب فراق امل عذاب هل للقاء موعد؟ ؟ #أمانتي القصه حقيقيه ابطالهه خليط بين الغربيه والاكراد ان شاء الله تستمتعون بيهه ..
