امانتي

«12»

البارت 12
#أمانتي
بقلمي ملاك الصمت

هيفين ..
جنت متحمسه لحياتي الجديدة .. صح بيبي مو كولش مقتنعه من باب تخاف عليه ومن باب راح تشتاقلي واني صراحه ابد ممفارگتهه طول ال 19سنه الفاتت بس فرحانه وروحي مملوءة امل ماعرف حاسه عبالك اني مقبله ع دنيا جديد بعيد عن كل الي اعرفه وكل الي عشته ..
صارت بالاسبوع مرة تاخذني خالة ياسمين وويانه لو شهد لو ميوس ونروح نجهز ملابس طلعه ودوام وجنط واحذيه وحجابات وحته ملابس بيت اخذت وهم هنه جهزن للدوام ع واهسي ومرات خاله فيان زوجة خالو سراج تاخذني نتسوگ ..
عطلتي صاحبتهه فترة هدوء نفسيتي مرتاحه ومفتوحه وعقلي ترست من بعد تعب سنه دراسه واعصاب ..
جنت احاول اسمن شويه لان السادس قضى ع ملامحي الانثويه الي بدت تبرز اول مابلغت لذلك التجأت للاكل واني طولي متوسط حلو بس ذبة جسمي يسمن ع الحاله النفسيه مو ع الاكل بس هذا ميعني ماسمنت شويه ..
مرت الايام وطلبوا نروح لجامعه بغداد نسجل ..
من الصبح اخذني خالو بسيارته وراحت ويانه بيبي وخاله فيان واطفالهم ويانه توم مرام وشهم عمرهم توة 5سنوات لان خالة هواي ظلت بال8 سنين ياله صارت حامل والله عوضهم بتوم ولد وبنيه ..
اني انطيت خبر لعمو عبد الهادي انو باجر ع اليوم نروح لبغداد فاكيد ديلر عرف ..
الطريق طويل وطالعين من ال 5الفجر وتعب وشمس وحارة ..
جنت حاطه الهيد فون بأذني اسمع اغاني بين منوصل اتصل عليه ديلر ..
استغربت .. من بعد ذاك اليوم ابد ماتصل ولاشفته بعد ..
فتحت خط والسماعات بعدهن بأذاني ..
رديت الوو مستغربه ..
الوو ..
انتي وين ؟
بدون سلام بدون مقدمات سألني وصوته ناعس وجانت الساعه قريب السبعه ونص يمكن توة گاعد من النوم ..
جاوبته .. بالطريق ..
سويتيهه صدوك يعني ..
تحسسني وكأنه اني شارده مو رايحه اقدم ع الكليه ..
اي فعلا .. انتي شارده .. مني ..
ههههه لا موهيج ..
سكت .. اتنهد ..
تغيرت نبرته .. التمست نبرة حنيه بصوته ..
ديري بالج ع نفسج ..
هذا امر لو طلب ؟
طلب ..
حااضر .. انت همين ..
يله روحي ماعطلج ..
هلاو ..
سدة مني .. ظليت صافنه .. متغير ..لا اوامر ولا صياح ولاعصبي .. متقبل قراري واعرفه ماراضي واكتفى بعتاب بسيط وراح ..
رجعت اسمع اغاني بس مراح من بالي كلامه واسلوبه ووصيته اليه ..
مقدام ..
بعد مانهيت المكالمه من هيفين اتصلت ع صديق تعرفت عليه بالاردن عراقي من بغداد درسنه سوة واخذنه الماستر سوة بس اني رجعت لزمت شغل ابويه اني  وهو عادل شهادته وتعين استاذ بجامعه بغداد ..
بعد ماعرفت هيفين مصرة ع قرارهه تأكدت من صحه قراري قررت اعيش لنفسي شويه حاجيت ابويه اترك الشغل واتعين بشهادتي واني ماخذ ماستر بالهندسه البحريه ..
يعني استاذ جامعي .. اعادل الشهاده واتعين حتلو بفلوس والامر الاداري خلال شهرين اكدر اجيبه من الوزارة ..
اتصلت بي ووصيته ع هيفين گتله يداوم اليوم وينتظرهم بمكان معين وانطيته رقم سراج خال هيفين ..
اما شغلتي فقررت امشي بيهه وبلكت يصير تعييني ع جامعه الانبار ..