امانتي

«5»

البارت 5
#أمانتي
بقلمي ملاك الصمت

هيفين .. ثاني يوم العصر عقد عليه ديلر بعقد شيخ وتم تدوين العقد بورقه رسميه لان يحتاجوهه كورقه موافقة الكفيل او ولي امري والي تضمن اذن دخولي لتركيا لان بالعراق ماعدهم مشكله بسفري حتلو قاصر ..
وراهه بيومين سافرنا لتركيا اني وديلر وشهد  وهناك بس اجرنه شقه وارتاحينه نهار ثاني يوم من الصبح طلعنه للمستشفى الي يشتغل بيهه الطبيب الدزونه عليه واخذنه ويانه مترجم ..
اول ماوصلنه قدمنالهم التحاليل والفحوصات الي جنت قد اجريتهه بالعراق بس ماعترفوا بيهه بلشوا وياي فحوصات وتحاليل من البدايه ..
يوم كامل دخلت مستشفى نمت ع السديه بخوف وسلمت نفسي للاطباء شهد ماعافتني خطيه ولا ايد ديلر وصوته وهو يشجعني اصبر واتحمل .. ابد معافوني ..
ابجي من الغربه .. ابجي لان وحدي .. ابجي محتاجه لابويه يمي وبجانبي .. صعب شعور اليتم .. لو كل الناس يمي وداير مدايري بس محد يعوضني مكان ابويه الخالي ..
كانولتي بيدي بدوا يزرقوني ابربمحلول وريدي كبدايه للعلاج بلكت يرجع نظري ومااحتاج جراحه هذا الاتمناه بس تقرير الطبيب المشرف ع حالتي لسه ماتحدد شي ..
تعبت جديات وارهاق وبدون اكل من الريوك الصبح حته ماعندي قدرة اركز بكلامي ..
الطبيب سمحلي اطلع للبيت وباجر هم من الصبح نرجع نستلم النتيجه النهائيه للطبيب المستلم حالتي حتى يقرر نستمر بالعلاج لو رأسآ يحولوني لأجراء جراحي ..
جنت كاعده بغرفه بالمستشفى وجانت شهد تلبسني ملابسي بعد ماخلعت ملابس المستشفى ..
كملتلي تبديلي وصاحت لديلر يفوت لان خلصنه ..
اخذت شهد ايدي وگومتني .. حسيت بدوخه والصداع النصفي الي ماتركني من ايام .. احس راسي حينفجر من وراه ..
اختل توازني كمشت جتفهه سندتني وركضلي ديلر هم سندني ورجعني للسرير ..
ظليت مستغربه ليش بس ماحجيت ولا سألته احس نفسي ثگلت عليهم خطيه تعبتهم وابتلوا بيه ..
طلع جابلي كرسي متحرك وشالني من السرير ..
انفاسه الحارة لفحت وجهي ..
گعدني ع الكرسي المتحرك وطلعنه ..
السيارة جانت بكراج المستشفى تنتظرنه مستأجريهه شكم يوم احسن ممانتعذب بالمواصلات ..
رجعنه للشقه وبالطريق ديلر اخذلنه عشا ووصلنه ..
شهد سبحتني وبدلتلي ملابسي ورتبت العشا وكعدنه نتعشه ..
الاكل كان صمون ومشويات من مطعم قريب شفناه بالطريق .. سوتلي شهد لفه وگعدت اكل ..
بالي كوله يم باجر ونتيجه التحاليل بلكي جسمي يستجيب للعلاج بدون تدخل جراحي ..
كملت وگومتني شهد غسلتلي ..
رحت لفراشي تعبانه .. نمت ..
ثاني من الصبح بعد الريوك هم توجهنه للمستشفى بانتظار نتيجه التحاليل ..
دخلنه للدكتور .. جنت متوترة وخايفه حيل .. ديلر لزم ايدي يطمني ويشد عليهه بايده الثانيه ..
طلع عندي ورم بالقرب من عصب العين هو هذا السبب الي ادى الى اصابتي بارتفاع الضغط بعصب العين لذلك جسمي مااستجاب لاي علاج .. وجب اخذ علاج او اشعه او تدخل جراحي علمود يزيلون الورم وراهه اكدر استعيد بصري مجددا ..
العلاج جربناه مافاد لان الظاهر وفاة والدي كان السبب بأكتشاف المرض والاشعه طبيبي مارجح هالخيار لان خاف تأثر ع قدرة الحمل والانجاب عندي بالمستقبل خاصه واني بعدني صغيرة ..
لذلك ارجح وأأمن خيار انو اسوي عمليه ..
إن كنت مستعده نفسيا فباجر حيجرولي العمليه ..
رجعنه للبيت واني السكوت مخيم عليه طول هاي الفترة خاصة من وصلنه لتركيا ..
شعور بالوحده مخيم عليه ماريد اختلط بأحد انعزاليه ..
صرت قليله الاكل جنت مكتنزة الجسم اقرب للدبدوبه هسه بديت اضعف ..
خلال هاي الايام القليله نتواصل ويه بيبي وعمو عبدالهادي ع النت وشهد وديلر يشوفوهم ويحجون وياهم ويطمنوهم عني وعن اخر الاخبار الي يحصلوهه من الطبيب بس اني انعزلت اسلم بكلمتين وارجع لمكاني ..