امانتي

«9»

البارت 9
#أمانتي
بقلمي ملاك الصمت

مقدام ..
استمرت لقاءاتي بمجموعه شباب بشكل يومي ..
اكثر المكان الي نلتقي بي هو المقاهي ..
صرت اناقشهم ويناقشوني بالحقائق والاحداث ..
صح مرات يعلى صوتنه بس اختلاف الاراء لايفسد للود قضيه ..
انخرطت بفصيل مسمي نفسه مقاومة الاحتلال ..
اي القوات الامريكيه هي الي جانت مسؤوله عن امن المحافظه ..
طالبنه قوات الامن العراقيه ان تستلم امن المحافظه بس منو يسمع اذن من طين واذن من عجين ..
خاصه انه تم اعلان زياده اعداد الجنود الامريكيين الي دزوهم للعراق ضعفي العدد المعلن ..
اكو فصائل مسلحه مدفوعين من البعثيه واكو فصائل هم غطاء لتنظيم القاعده الي استفحل بالمحافظه خاصه صار مقرهم صحراء الانبار وهالمكان جدا خطر ..
واكو احنه .. فصيل مسلح .. شغلنه الشاغل زرع العبوات الناسفه بطريق الارتال الامريكيه ..
مجموعه شباب خبراتنه وتحصيلنه الدراسي يأهلنه ندبر مواد ونصنع عبوات واكو شباب غيرنه من المنطقه مسؤولين عن تحديد المكان المناسب لزرع العبوات ..
جان يجينه دعم من جهات مجهوله بس مجان هذا يأثر لان احنه دنقاوم محتل دنس ارضنه ويوميه نسمع عن حوادث تعدي ع شرف بناتنه وحته شبابنه ماسلموا من هالتعديات خاصة بعد الي صار بسجن ابو غريب ..
من بعد ماخلصت ماجستير بالهندسه رجعت لزمت شغل ابويه بس اني وهو تركنه شغلة السفر صرنه نعتمد ع وكلاء يوردولنه بضاعه ..
فجنت من الصبح للظهر لازم شغل ابويه والعصر بيد العمال والليل للمقاومه ..
عدنه بيت نجتمع بي ونخطط ونتناقش ..

رغم كل انشغالي ورغم علاقتي بناديه الي حته اهلي صار عدهم علم بيهه بس گلبي بعد يمهه .. اي هي ماكو غيرهه .. البلوة الي رب العالمين ابتلاني بيهه ..

ناديه تصير بنت ابن خال امي شفتهه بواحد من اعراس بيت خالي وصارت بيناتنه علاقه لان بوقتهه عجبتني البنيه ..
وهي طالبه كليه توهه نجحت للمرحله الثانيه ..
امي من عرفت بالموضوع كيفت وحذرتني اياني واياك تغلط ويه البنيه .. اذا عجبتك حته نخطبهه ..
فكرت بالموضوع بشكل جدي .. هاي وصل عمري 26سنه وبنت عمي مامنهه نتيجه ..
كنت اظن عنادا بيه هيج تسوي وانفتحلي امل من عرفت بعلاقتي ويه ناديه وظلت تتعارك وياي وتسمعني كلام گلت اي والله واجاني الفرج وهيفين تغار عليه .. من اكو غيرة يعني اكو حب ..
بس مرت سنوات واني أيست تلين وراسهه اليابس وخشمهه العالي مايعجبني .. ماتعجبني هيج حرمه ..
قررت اخطب ناديه بس قبلهه گلت ارمي الحجه ع بنت عمي واخبرهه بالي راح اسويه ..
رحت لبيت عمي بحجه اريد ابارك لبنت عمي نجحت للخامس علمي ..
سلمت ع بيبي ودخلت ..
سألت ع هيفين كالتلي بغرفتهه ..
هيفين .. صاحتني بيبي گالت بيت عمج هنا ..
نزلت ركض مشتاقه لشهد وميس وخاله ياسمين عبالي همه الي اجوي ..
ابد مااجه ع بالي يكون الزائر من بيت عمي هو ديلر ..
صارلي هواي مشايفته من عطله نص السنه يمكن ..
من بعد ماجنت اركض  واشبخ الدرج بهمه خففت نزلتي من شفت ديلرواكف طول وهيبه ..
ظلت عيوني عليه تتفحصه ..
خففت نزلتي وشويه عيني ع طريقي وشويه عيني عليه ..
مربي لحيه مثل اخر مرة شفته بيهه ..
هو من باب اللباقه وگف ع حيله يستقبلني واني بعدني ع الدرج ..
وع وجهه ابتسامه صادقه صافيه خجوله وشويه يدنگ وشويه يرفع راسه يتفحصني ..
عيونه لعوبه ..
سلام عليكم ..
سلمت عليه ..
ردلي ..
وعليكم السلام .. ياهلا ببنت عمي ..
هلا بيك .. عاش من شافك ..
والله انتي الي عاش من شافج .. محرمه ع نفسج طبة بيت عمج ترة الكلب العضج كتلناه ..
ههههههه لا والله ملتهيه بدراستي وهم شهوده التهت عني بالسادس وماردت اشغلهه خطيه ..
اي صدوك مبروك .. کالوا ناجحه ..
الله يبارك بيك ..
تفضل ليش واکف ..لعد بيبي وين .. ضيفتك شي ..
قابل اني غريب وتضيفني ..
لا اكيد مو غريب .. من اهل البيت انت بس حتلو كلاص مي بارد ..
تفضل وضيافه .. كبرانه يول ..
ههههههه لعد شعبالك قابل ابقى ذيج الزعطوطه .. اتكيت وكذا ههههههه ..
لا ياب من حقج  ..
وانت صاير شايب ..
ضحك بصوت عالي ..
ههههههههه اي .. الشيب وقار .. تعيريني بشيباتي بنت عمي ..
طول هالوكت كاعد وايده اليمنه ساند عليهه جسمه بحيث مكتف ايديه لصدرة وساند جسمه كوله ع كتفه الايمن فمن رحت جبتله ضيافه بطل مي بارد وعصير راني حرك ايده دياخذ العصير والمي مني شفت وشم ايده ..
رأسآ نمحت الابتسامه من وجهي  وفتحت عيوني ع وسعهن ..
شبيج شفتي جني ؟
ليش اني ماتذكرت ديلر عنده وشم من شفت وشم الملثم .. حجيتهه ويه نفسي ..
بررت لنفسي اني شفت وشم ديلر مرة وحده ومن سنتين او 3طبيعي ماتذكر هيج تفصيل ..
بس الي تذكرته ويه الي شفته بذيج الليله خله عقلي يضرب اخماس بأسداس ..
هو نفس الشخص ..؟
ولج شبيج مو احاجيج ..
انتبهت ع ديلر يحاجيني ..
ماعرف شحجي وشلون اتصرف .. اني ماسولفت الي شفته ذيج الليله لاحد ابد عدا لبنى واعرفهه لبنى امينه اسراري ..
مابيه شي ..
شلون

تكمله البارت 9

شلون مابيج شي ووجهج لونه انخطف ..
شويه عليت صوتي ..
گتلك مابيه شي ..
وشكو تصيحين ..
اي لاتلح مابيه شي ..
اني الح ؟؟
سكتت مجاوبته ..
عموما آني جاي علمود ابلغج اني راح اخطب يابنت عمي ..
التفتت عليه متفاجئه ..
رفعت حاجبي ..
ندوش ماغيرهه ؟
باوعلي نظرات طويله بتركيز .. حسيت نظراته طولت واخترقت روحي .. مثل واحد اطلق العنان لروحه تحاجي روحي ..
اذا تكولين اي هسه كولشي يتفركش .. لاناديه ولا غيرهه .. بعدني رايدج وبعدج حرمتي والعقد بيناتنه يشهد ..
ظليت صافنه بوجهه ..
بهل سهوله ؟؟
وتتصورين جيتي هنا وواكف اطلب منج تقبلين بيه للمرة الالف سهله ؟
تكسر گلب بنيه هذا فد شي كولش سهل عندك ..
ماكسرت گلب بنيه .. هي مكمله وياي وتدري گلبي مو يمهه .. يمج انتي ..
ياعينك الصلفه ومعترفلهه همين ؟
احسن من ما اكذب عليهه واوهمهه باشياء مموجوده ..
ترة اني هم مو سهل عليه ادوس ع گلبي واخطب بنيه ماهاويهه بس شي اهون من شي واني عندي كولشي ولا الكرامه وانتي يابنت عمي دستي ع كرامتي لمن گال الله بس .. شكم مرة طلبتج .. وشكم مرة رفضتي .. لهنا وصلت حدهه وياج ياشيالة همي ..
اخر مرة اسألج .. انتي كبرتي ووعيتي كدام عيني واني بعدني رايدج وهاويج شتگولين نتمم زواجنه لو اشوف حياتي يابنت الناس ؟؟
طيته ظهري ماكدرت اواجهه وانطيه جوابي .. من زمان اني ماهاويته ولا احبه فليش اوگف بطريقه ..
شوف حياتك ..
بلع ريگه .. ظل ساكت ثواني ..
كملت كلامي من بعد ماانتظرت منه رد ومارد ..
بس قبل ما تشوف حياتك اريدك تطلگني ..
سكت وتنهد ..
التفتت ادور ع جواب بوجهه وبعيونه ..
بياض عيونه احمر ولونهن غمق اكثر ..
اسمعي وخليهه حلقه بأذانج .. انتي خسرتيني ..ها و طلاگ ما اطلگ ..
عافني وطلع ..
ظليت اباوع عليه وهو ديطلع الممر .. انقهرت من كلامه .. نزلت دموعي حرگت خدودي ..
بغبائي خسرته اني مااحبه بس كان لازم جوابي يكون دبلماسي اكثر مو هيج مباشر حسيت اذيته بكلامي وصدوك جوابي جرح كرامته ..
فعلا .. من هاي اللحظه حسيت اني خسرته ....