البارت 7
#امانتي
بقلمي ملاك الصمت
مرت اشهر العطله ونجحت شهد للرابع اعدادي واني عدت السنه ..
بلش الدوام واني سنه ثانيه بالثالث متوسط ..
عمو خلالي خط لان الوضع ابد مو امان وانتقلت ويه بنات عمي لغير مدرسه ثانويه غصبن عني لان هنه ثنينهن صارن اعداديه واني بعدني متوسطه ومدرستي بيهه لحد الثالث متوسط لذلك عمو نقلني وياهم حته تلاثتنه بالخط نروح ونرجع ..
يعني بدايه جديده ومكان جديد وطالبات ومدرسات غير ..
لبنى هم انقلت ويانه لان هي نجحت صارت رابع ويه شهد بس بقينه صديقات ..
ميس ابتعدت عنه لان سادس علمي صارت والتهت بمحاضراتهه والخصوصي واصلا جانت مبينه مهمومه وضايجه ومتكأبه طول الوكت هاي هيج السادس يسوي بالواحد ..
ديلر سافر للاردن قبل لايبدي الدوام عدنه لان عامهم الدراسي هناك يبلش قبلنه حته يكمل السنه الثانيه من الماستر مالته ويتخرج ويرجع ..
بلشنه دوام وكونت صداقات واكثر شي بنات جيرانه غيداء وحوراء شاطرات ودائما نتنافس بمستوانه الدراسي ..
خطنه جان سيارة تكسي صغيرة احنه 4 بنات بنات عمي 2واني ولبنى والسايق اخو لبنى .. اسمه ايهم خريج علوم كيمياء ولسه ممتعين ويشتغل تكسي ..
حياتي صارت روتين ممل وايامي منحصرة بين بيت ودراسه وثانويتي وصديقاتي ..
امتحنه نص السنه وصارت العطله وصارت دورة السنه مالة بابا ..
سويناهه ع حسب الاصول ورحنه زرنه قبرة ورجعنه ..
كلما اروح اشوف ابويه ارجع جثه شي بداخلي مات رغم مدلله وممحتاجه شي وساعة الاحتاج اامر واتفنن بالدلال بس سندي راح شنو الفايده .. واليوم يسألون ويهتمون باجر ينسون .. مشاغل الدنيا وهمومهه تنسيهم ..
بهالاسبوعين العطله اجة ديلر يقضي اجازته يمنه وهمين حضر دورة سنة بابا ..
شفته وسلمت سلام عادي لان جنه تونه راجعين من المقبرة تعبانه ومتعاركه ويه بيبي لان ابجي وهي متقبل تخاف ع عيوني ليصير بيهن شي ..
بسرعه صعدت ودخلت غرفتي ..
سبحت ونمت بدون ماانشف شعري ..
گعدت الصبح مصخنه حرارتي مرتفعه اهذي وارجف واصيح بردانه وبيبي تغطيني بالبطانيات وبعدني اصيح بردانه ..
ماجنت حاسه ع نفسي واني اهذي بس اتذكر ضربوني ابرة خافض حرارة ..
تالي حسيت عرگانه كولش فاكتني الصخونه ..
گعدت دايخه وعيوني مغوشه وجووووعانه واحس عظامي كولهه توجعني ..
گعدت ع حيلي ..
فركت عيوني بيبي وخالو سراج وعمو عبد الهادي وديلر كاعدين واني مو بغرفتي ..
منزليني جوة بغرفة بيبي ..
باوعتلهم كولهم صافنين عليه ..
ضجت لان صايرة محط انظارهم ..
شبيكم ..؟؟
رأسآ ديلر دنگ ومثل الواحد الي ضم ضحكته ..
بيبي .. شلون صرتي حبيبتي ؟؟
زينه .. خوفتوني عبالك بيه شي ..
عمو عبد الهادي وخالو تحمدولي بالسلامه ..
ديلر .. صارلج يومين مصخنه وتهذين ..
فتحت عيوني .. يووميين ؟؟ شهذيت بله ..
ضحك بمكر .. اعترفتي بهواي سوالف مسويتهه ..
عقدت حواجبي خوف ع ارتباك .. شگايله اني ؟؟
عمو وخالو وبيبي يضحكون .. يمكن ديلر ناصب عليه ..
دتكذب عليه ماهذيت شي ..
خزرني هم جفصت ..
هنا نقذني التلفون .. دگ تلفونه وجان حاطه ع ماصه گزاز جبيرة محطوطه گدامي ..
مديت راسي اباوع منو ديتصل ..
ندووش يتصل ..
هو كام بسرعه خطف التلفون من گدامي واترخص وطلع ..
الفضول صار يقرا الف عندي ..
منو ندوش .. زين هذا ندوش اسم الدلع يعني .. وهو اختصار ليا اسم ؟؟ دينا ، ديانا ، ناديه ..
عمو وخالو ترخصوا بعد ماتطمنوا عليه ..
بيبي ظلت يمي سألتني جوعانه ..
گتلهه اي كولش ..
كالت خالة ياسمين دزتلي شوربه محطوطه بگدر صغيرون ع الطباخ بس احميهه علمود اشربهه شويه دافيه احسن علمود بلعومي ..
گمت والي گومني فضولي مو الجوع لان عظامي كولهه توجعني ومالي نفس بالاكل رغم جوعانه ..
عود علساس كمت للمطبخ احمي الشوربه .. اني غيرت طريقي لباب المنور الي تروح لورة البيت وممر ضيق داير مداير ظهرالبيت .. هناك خوش ختله ..
توجهت للمكان وفعلا شفت باب المنور مفتوح ومردود شويه ..
ظليت امشي بالممر .. بديت اسمع صوت .. صوته ..
من يخلص الممر تلاگينه حديقه خلفيه بيهه شجرة نبگ وتكي ضخمات والمكان محد يروحله بس من ننظفه لو يجي موسم النبگ والتكي ..
ظليت واگفه احاول اتسمع ..
أنت تقرأ
امانتي
General Fictionقصه منقوله للكاتبه ملاك الصمت غربه حب فراق امل عذاب هل للقاء موعد؟ ؟ #أمانتي القصه حقيقيه ابطالهه خليط بين الغربيه والاكراد ان شاء الله تستمتعون بيهه ..
