امانتي

«28»

مقارنة بأحداث البارحه اليوم البارت صادم شويه بس من البارحه انطيت خبر تم تسريع الاحداث ..
قراءة ممتعه ..

البارت 28
#أمانتي
بقلمي ملاك الصمت

بعد مرور 3 سنوات ....
الكلام عن لسان هيفين ..
المكان الانبار ..
الزمان 2013 ..
مرت 3سنوات ع زواجنه .. اعوام ماخلت من مشاكل وزعل بسبب عنادي وعصبيه مقدام ..دائما بالمشاكل يصير تصادم قوي بين طبعي وطبعه بس هم اظلم حياتي وابخس حق حبيبي لو كلت مو سعيده او ممرتاحه وياه .. لا الله كتبلي مقدار من الراحه والسعاده وياه ..
الحياة متمشي بدون تنازلات من الطرفين وهذا الي صار .. الحب بعده موجود والاحترام بس العلاقه الحميمه بردت وهالشي جان اله سبب ..
بهل 3 سنوات كملت كليتي تربيه انكليزي ويه مقدام بجامعه الانبار وصارلي شهرين من تخرجت ..
للاسف لحد هسه مصار عدنه طفل .. شكد تصير عندي خربطه بالشهريه وافرح عبالي حمل واركض احلل ماكو شي تخيب امالي ..
رغم اسمي معناه الامل بس سنه بعد سنه صرت افقد الامل انو اصير ام ..
مقدام ميحسسني بشي بس ابتعاده عني يكفيني اعرف شنو الي يدور بداخله ..
صح بعدني 23سنه بس مقدام صار  عمرة 32سنه ولسه مصار عنده طفل يشيل اسمه ..
هالشي يألمني ومخليني طول الوقت تحت ضغط ..
شكد خاله تاخذني لطبيبات وعلاج وتحاليل ويكولون مابيه شي ومقدام هم اجتي فترة هو هم راجع طبيب وثنيناتنه مابينه شي بس مديصير طفل ..
طبعه العصبي زاد بالفترة الاخيرة واني بطلت عناد صرت اسمع واسكت مابيدي شي ..
يمكن حته خاله بدت تفكر تزوج ابنهه بوحده من بنات اخوتهه او اخواتهه ..
جنت اسمع الكلام الي يدور بالغرف ورة الابواب بس اسكت لان شنو بيدي اسويه مقدام ابتعد عني ..
صار اكثر من مرة اسمع خاله تحجي وياه وهو ميجاوب ولا يكول لايوم احبهه وماتزوج عليهه ميبرد گلبي ..
اصير اشتعل بنار واطفى لوحدي مثل شمعه تذووب وتذوي ومحد يحس بيه ..
الضغط النفسي قوة هائله سلاح ذو حدين .. بس الحد السلبي من هالقوة صار نصيبي ..
التفكير نخرني نخر .. فت کلبي فت .. صعب متعرف شنو مصيرك وشنو التالي وشنو الي ينتظرك  بالمستقبل ..
بالبيت بس شهد هم تخرجت وگعدت بس ميس خلصت معهد صحه وتعينت وورانه بسنتين تزوجت ايهم .. تتذكرون ايهم ؟ .. يمكن هالانسان حالف الا ياخذ من هالعائله .. احنه جيران واخلاقه وسمعه اهله معروفه وبغض النظر عن الي صار بالماضي بس هو شخص جدير بالثقه رغم جان مقدام متردد بالبدايه بس عمو ثامر بعد ما سأل ع الولد واهله طلب من مقدام يتوكل وهيج تزوجت ميس ايهم وعين الله عليهم مدللهه ومرتاحه وياه ..
ايهم اخو لبنى .. لبنى صديقتي الي تقاطعنه من بعد ما نرفض اخوهه رجعت علاقتنه سوة بس مو مثل قبل العلاقه رجعت بفضل النسبه بين العائلتين والجمعات العائليه الي جانت تصير لان ايهم بهالسنين المضت اخذ نصيبه من الدنيه ابوه وامه استشهدوا بسيارة مفخخه وهمه راجعين من زيارة الامام الكاظم عليه السلام يمكن هالاحداث ب 2009 .مابقه من هالعائله بس لبنى وايهم وعدهم اخ ثالث ايمن وانضمت الهم ميس كزوجه لايهم ..