البارت 14
#أمانتي
بقلمي ملاك الصمت
هيفين .. نقلت غراضي لبيت عمو ثامر واستقرت حياتي بين دراسه ودوام ومن ارجع انام شويه واساعه خاله ام عصام لو بشغل البيت لو اهتم بفروحه وهي تكف شغلهه واكثر الاوقات اخذ فروحه يمي بالغرفه واطشرلهه العابهه تلعب بيهه واني ادرس شويه بين ماخاله تكمل شغلهه ومرات اني اسوي العشه ..
ولد عمي .. عصام ووليد وحارث كولش حبابين عصام ثالث متوسط ووليد اول متوسط وحارث سادس ابتدائي ..
دائما وليد وحارث وياي بالليل ادرسهم اي ماده ميفهموهه يستعينون بيه بالواجب البيتي والتحاضير اليوميه ..
مرتاحه لحياتي ببيت عمو ثامر وبيبي اتصالي وياهه مستمر ..
اما اوضاعي بالكليه فدائرة صداقاتي توسعت شويه .. بس بعدهن اساور وتبارك اقرب الصديقات اليه ومرات يگوللي هنيالج طلعتي من القسم الداخلي لان البنات ماوراهن بس مشاكل والقيل والقال والغيرة هاي من غير سوالفنه نلكاهن عد الولد لان اكو بيهن مكبلات ويه ولد من مرحلتنه ..
مر شهر ع دوامي ..
نزلونه جدول امتحانات يبدي بعد اسبوعين امتحانات شهريه ..
البنيه سارة بعدهه نفس حركاتهه بس اني مغلسه عنهه والبنات الوياهه صار بيناتنه سلام بس هي ابد قافله ..
مرة سألت وحده من صديقاتهه گتلهه سارة شعدهه وياي احسهه ماطايقتني ..
كالت هي شايفه روحهه شوفه وعبالك هي احلا وحده وتحس بيج تنافسيهه لان حلوة ..
فكيت حلگي شنو احلا منهه شنو انافسهه وين كاعدين احنه .. احنه جايين ندرس شكد سطحيه هاي وتفكيرهه سخيف ..
تجاهلتهه تماما ..
استاذ طارق دائما يجي يسألني شمحتاجه ..
مرت تقريبا شهر ع اقامتي ببيت عمو وبعدلي اسبوع تقريبا وتبدي تقريبا ..
فد يوم جنت مداومه بالكليه شفت واحد دخل العماده ..
هسه دكولون اي وشنو الغريب بواحد دخل العماده .. الهيئه هيئه ديلر والي شككني بي السبحه الي نطيتهه اله جانت بيده ..
توقعت جاي يشوفني ..
صاحتني تبارك ادخل محاضرة بس اني ماقبلت ردت اتأكد من وجوده بالجامعه كلت مو مشكله ادخل بالساعه الثانيه ..
ظليت كاعده انتظر برة ومادري ليش مادخلت العماده ادور عليه او ع اقل اتأكد من الي شفته ..
هواي انتظرته وماكو ..
دگيت عليه مارد ..
اضطريت اكوم ادخل للمحاضرة بالساعه الثانيه بعد ما ايست ..
مقدام ..
مر اكثر من شهر مشايف هيفين بس ع طول اتصالي ويه عمي ثامرودائما يسولفلي عن اخبارهه خاصه من صارت مشكله بالقسم الداخلي وجابهه ببيته ..
جنت شويه مأمن ع وجود هيفين بالقسم الداخلي بعيد عن ولد عمي خاصه عصام الي كل سوالف المراهقه مالته يمي ..
ظليت مامطمن رغم ادري هيفين بأمانة عمهه ..
معاملتي مال معادله الشهاده كملت والامر الاداري هم كملته بس مسويته لجامعه الانبار سويته لجامعه بغداد هم اصير قريب من هيفين وهم تبقى تحت عيوني ..
بلغت ابويه وهو ع علم بكولشي يصير بس ممقتنع بالي دااسويه من ناحيه يشوفني داارجع احاصر هيفين باهتمامي واحنه اتفقنه ابتعد عنهه ومن ناحيه ثانيه من استأذنت منه اعوف الشغل وامارس وظيفه باختصاصي ايدني بالموضوع لان جنت حاسب حسابي ع جامعه الانبار موبغداد يعني قريب ع اهلي ارجع من دوامي ارتاحلي ساعه والزم شغل ابويه العصر هسه الوضع اختلف لذلك والدي ع مضض وافقني مكان كولش مقتنع بس مو بيدي انه اخاف عليهه وانوب بديرة بعيده ..
بس بقت مكان اقامتي حرت بي مااكدر اثكل ع بيت عمي خاصه همه اصلا مستقبلين ضيفه (هيفين )يمهم اجي اني ازود الحمل تعلاوة فكرت ااجرلي شقه ببغداد ..
اتفقت ويه طارق اجيب الامر الاداري مالتي واباشر ..
طبعا مكان تدريسي الرئيسي هو كليه الهندسه بحكم اختصاصي بس هم اخذ مواد غير اساسيه بغير كليات تاخذ ماده تخص الهندسه خاصه المراحل الاولى بكل الكليات ..
اختاريت كليه التربيه وانطوني اكثر من اختصاص بكليات التربيه ادرسه ..
الماده الي جنت ادرسهه هي الرسم الهندسي والرياضيات والبرمجه بكل اختصاص من اختصاصات التربيه صرت اخذ محاضرة مرة بالاسبوع ..
طلعت من العماده كملت اوراقي الرسميه وامر المباشرة و عيوني تدور عليهه .. اعرف هي تربيه انكليزي وعيوني للبنايه وصرت ادقق بوجه كل طالبه تطلع من بنايه التربيه ..
گلت يمكن عدهه محاضرة ..
اني جنت بمكتب العميد هي اتصلت عليه وماكدرت ارد ومن طلعت دكيت عليهه مجاوبت ..
ظليت ويه طارق اتمشى من باجر راح تبدي محاضراتي ..
شفتهه من بعيد تتمشى ويه بنات 2مندمجه تسولف وتضحك ..
طارق هم شافهه وباوعلي شافني مبتسم ابتسم لابتسامتي انتبهت عليه عرفته قراني ..
يله اغاتي اشوفك غير وقت ..
تصافحت وياه ..
اتصل بيه بنهايه الدوام غداك اليوم يمي ..
ان شاء الله ..
ترخص وراح ..ظليت امشي بأتجاهه مبتسم مدنگ ايديه بجيوبي ..
عيوني مشتاقتلهه بس ماريد هالعيون تفضح شوگي الهه ..
ابتسامتي شي بسسسسيط من الفرحه الي بداخلي لشوفتهه ..
ودي اصرخ ودي احضنهه ودي بحضنتي اكسر ضلوعهه حتى تحس بشوگي الهه ..
انتبهت عليه ..
بانت الابتسامه .. ضحكت عيونهه قبل مبسم شفافهه ..
اوووف طيرت عقلي بها ضحكه ..احس طاير ومااكدر الزم نفسي ..
دفعت صديقاتهه راحن من يمهه وتقدمتلي بخطوات اسرع من خطواتي مادري تريد توصلي باقل وقت ماعرف شوگي غزا گلبهه الجان جاحد الي لو هيج اني يتهيألي ..
تمنيت وماريد اتأمل واتفاشل ويه گلبي مرة ثانيه وانصدم ..
تقدمت الهه بخطوات ثابته ..
صارت گبالي ..
الشمس ضاربه ع بياض وجهه صايرة حمرا والخدود مصبوغه بحمار رباني والعيون الخضر ويه الشمس صايرات فيروزيات عبالك زمرد ..
الشعور الي اجتاحني بشوفتهه ماكدرت اقاومه .. بس صارت گبالي شعور ي اترجم ع هيئه ضحكه واسعه نبعت من گلبي الفرحان بشوفة عيونهه ..
هلاااااو ..
وعليكم السلام ..
شنو هالمفاجئه الحلوة .. شعندك هنا ؟
راح ادرس هنا ..
عقدت حواجبهه ..
لا تسولف صدوك ؟؟
گتلهه راح اصير استاذج ..
رفعت حنچي وراسي بأنفه وتكبر ..
عجل شحسبالج شويه اني ..
لايابه شويه شنو ..
شلونج ..
زينه الحمدلله ..وانت ..
مثل مداتشوفين ..
داشوفك مشيب هههههههه
هاااا .. توصلني اخبارج ام السوالف ..
رفعت اديهه اشارة للاستسلام ..
والله حبابه ممسويه شي والي يوصلك اخباري جذاب ..
هاا يعني عمج جذاب ؟
لا حشاه ..
جديات تعينت هنا ؟
اي والله ..
شعجب مو گلت هناك يم اهلنه ..
صارت هنا بعد .. متريدوني ..
لايابه هلابيك ..
عمو يدري بجيتك ..
اي اتصلت بي قبل شويه ..
خلصتي محاضراتج ؟
لا بعدلي وحده ..
تمام .. اروح ويه استاذ طارق عازمني ع غده ومن تكملين دگيلي ..
لاتكلف نفسك عندي خط يرجعني ..
انجبي لج صايرتلي جامع
تكمله البارت 14
أنت تقرأ
امانتي
Ficción Generalقصه منقوله للكاتبه ملاك الصمت غربه حب فراق امل عذاب هل للقاء موعد؟ ؟ #أمانتي القصه حقيقيه ابطالهه خليط بين الغربيه والاكراد ان شاء الله تستمتعون بيهه ..
