امانتي

«30»

البارت 30
#أمانتي
بقلمي ملاك الصمت

هيفين ..
مرت ايامنه حلوة .. هم عناد مني وعصبيه منه بس بنهاية اليوم مالي غنى عن حضنه وماله غنى عن حناني ..
بظرف ايام وجان بعده الدوام توة شهرين من بادي دبرلي مقدام واسطه تعينت بمدرسه اهليه ..
صرت مدرّسة انگليزي ..

يومي صار عبارة عن ركض وگعده من الصبح اسوي الريوك نتريك سوة ونطلع سوة يوصلني لمدرستي لان دوامي بمدرسه اهليه كوله صباحي وهو يروح لدوامه بالجامعه ومن اخلص يجي عليه حبيبي نرجع سوة للبيت اذا طابخه احمي الاكل ونتغده واذا ماطابخه بطريقنه قبل لانرجع نجيب اكل ومرات خاله تخابرني تعزمنه ع غده لو مسويه ثواب لعمو الله يرحمه لو متنغصتلنه ع فد اكله دسمه ..
الظهريه نوم لان تعبانين والعصر حبيبي يروح للشغل ساعتين ويرجعلي ..
عاد هالوجبه حصته اداريه بيهه اسوي عشه مرتب لو ننزل يم خالتي كولنه نتعشه سوة ..
وراهه تبدي حصة حبيبي حب وغرام وغزل حتلو ميصير شي بيناتنه بس احنه بآحضان بعض ..
ومرات اطبخ شي للغده ومرات لا انام ..
خلي احجيلكم شويه عن وضع الانبار .. الانبار من شهر 12ب 2012 بدت مظاهرات سموهه ساحة العزة والكرامه ..
بس هالمظاهرات كانت غطاء لشي ثاني عناصر واجنده نائمه تنظيم القاعده والنقشبنديقه وجماعات مسلحه وثوار العشائر كولهه انضمت تحت لواء هالمظاهرات الي گالوا سلميه ..
سنه كامله هالمظاهرات استمرت ..يعني لحد شهر 12
..2013
قبلهه بشكم شهر وتحديدا 21/7/2013 هاجمت داعش سجنين في بغداد هنه سجن التاجي وسجن بغداد المركزي وتم تهريب قرابه 1000معتقل اكثرهم قتله ومجرمين وجرائمهم 4ارهاب ..
الوضع بالمدينه شبه عادي الناس تعودت ع الوضع المضطرب وعدم الاستقرار صار هذا العادي عدنه ..
احنه جنه بالرمادي بمركز المدينه والمظاهرات هنا ..
سنه كامله وماكو استجابه للمطالب وتعتيم اعلامي عن الوضع بس احنه مواكبين هالاوضاع ومتعايشين وياهه خاصه بعد الي صار بينه ب 2003..
المناطق البعيده عن المركز الحياة بيهه طبيعيه رغم الكل تدري بالوضع بس عبالنه يوم يومين شهر وتفض فقاعه ع گوله ذاك الرجال ..
اخذت اجازة من دوامي يومين ومقدام كذلك واتفقنه نروح نزور خديجه بنت الحسن عليها السلام ..
خالو سراج اجه ويانه لان جان يندل المكان ورايحله ..
طريقنه يمر ع الفلوجه ومناك ندخل الحله من جرف الصخر ..
بس طلعنه الانبار ردنه ندخل الفلوجه تحول طريقنه الى سيطرات كل شكم كيلو متر سيطرة بس مو سيطرة جيش عراقي لا ثوار العشائروناس ملتحين ودشاديش قصير وعمائم ..
مقدام ماقبل نكمل الطريق .. گمت ابجي بسكوت بس هو يباوعلي بالمرايه .. صح بجيت لان جنت ناويه نيه زيارة وقاصدتهه بحاجه وماصارت زيارتي بس هم جنت ابجي من الخوف ومن الوضع الي وصلت اله المدينه ..
طريق موت .. اشكالهم مخيفه جانت بالنسبه الي وماجنت خايفه ع نفسي بس خفت ع زوجي وخالو لان صح ماسوولنه شي ولا تكلموا بس النظرات تراقب وايدي ع گلبي من رده فعل مقدام من يوگفونه ويسألونه منين جايين ووين. رايحين ويشوفوني ليورة كاعده ويركزون بنظراتهم ..
وكل شويه مقدام ينفخ ويتأفأف عرفته ضاج ..
جنت جايبه وياي عبايه راس البسهه من ازور فطلعتهه  وتلفلفت بيهه زين رغم ملابسي جانت مستورة بس عيونهم ونظراتهم تعري المقابل ..
.مسحت مكياجي رغم خفيف بس شفت بعيون مقدام نظرة راحه لتصرفي هذا بس اني جنت كولش خايفه وگلبي مقبوض ..
الف ياالله ياله وصلنه لبيتنه ..
2013 بنفس الشهر بنهايته اجتي قوة من بغداد اعتقلت نائب بمجلس النواب احمد العلواني بعد ان تم قتل اخيه علي العلواني وتم فض الاعتصام بالقوة وهالشي ادى الى اشتباكات مسلحه بين الجيش العراقي والمتظاهرين ..
بس المتظاهرين مسلحين مو ع اساس المظاهرات سلميه ؟؟ لامكان الاشتباك ويه المتظاهرين كان ويه جماعات مسلحه بس الي راح ضحيه هم المتظاهرين العزل ..