امانتي

«40»

البارت 40
#أمانتي
بقلمي ملاك الصمت

🌹🌹🌹🌹🌹🌹🌹🌹🌹💔💔
في ضياع

مشاعر ليس لها مرسى

تتلاطم أحاسيسي

كموجات البحر
لاتجد  شاطئك يرسيها
ضاعت مني
تلك الدقه في قلبي❤️

وأنا أنظر في حب عينيكِ

ضياع
أملي وحبي وأماني
أمنياتي بقربك
تهتز خوف من غدرك
أمتزج كل شيء
وتدمر
أتركيها للسنين
ربما تعالج ماجرح
همي
الآن
أن أبتعد عنكِ ولا أراك

فكل مابداخلي مُبعثر
مُنكسر
مؤلم شعور الخوف
من فقدانك

وخوفي أن أضعف
في قربك
فيشدني الحنين
لارتمي بين أحظانك
وأبكي منك واليك اشكو

ماحدث لقلبي💔

الخاطرة لصاحبة الاحساس ملاك الياسمين ..
************************************

هيفين ..
وينك .. اصيحك .. ادورك .. وين ادورك .. ضيعتك بليله ظلمه الگمر غايب بيهه .. ضيعتك وضاع عمري وياك ..
فراشي بارد حرارة حضنك تدفيني .. وسادتي خاليه من ريحتك .. عذاب .. كل تفصيله بحياتي ناقصتك عذاب ..
كلما اصفن افزن ويه دکة الباب .. واتذكر دروبنه التفارگت .. مدري حظك مدري حظي .. مدري هو مكتوب ومامنه مهروب ..
صارت عيني اعله الدرب .. انطر وانطر وماكو ريحه الاحباب ..

مرت ايام .. حجي سعد دبرلنه بيت ايجار والبيت بعيد عن منطقه بيت عمي رغم ايهم طلب منه يدبرلنه بيت قريب حته بلكت يجي خبر منهم بيت عمي وهمين علمود مقدام .. علمود من يجي للبيت احنه قريبين ونعرف احد سأل ..
بس ماصار .. ردنه بيت اجارة رخيص ع گدنه ومنطقه بيت عمي راقيه وكل بيت يدلينه عليه الحجي اغلى من الثاني وهاي من غير صاحب البيت يريد ايجار سنه ليكدام واذا نگوله نازحين عود يساعدنه و يسويهه اجار 6اشهر ليكدام وهم المبلغ مو قليل ..
فحجي سعد لكالنه بيت بغير منطقه .. ارخص ..
اضطرينه نقبل لان 3ايام واكثر احنه كاعدين ببيته خطار ماقبل نطلع بيته اذا مو ع بيتنه ..
وهذا الي صار ..
بذيج العصريه الاجرنه بيهه البيت ايهم واحمد وحجي سعد راحوا جهزوه طباخ ومبرده وثلاجه صغيرة وام دلال ساعدتنه بالفراش وقنينه غاز ومنظمهه وشغلات المطبخ والبردات وهواي اشياء شالتهه عنه ..
ثاني يوم الصبح رحنه اني والبنات نظفناه من فووك ليجوة غسل وتنشيف والولد ويانه ..
وللظهر جبنه خالتي ياسمين والجهال لان جانوا باقين يمهه واستقرينه بالبيت ..
البيت تصميمه بسيط ومو نفه .. الطابق الثاني محور شقه بس ضيگ غرفتين صغار ومطبخ وصحيات ودرج وباب ع الحديقه والطابق الاول غرفتين ومطبخ وهول وصحيات وطارمه صغيرة ..
كولشي بيه صغير لان متتجاوز مساحته 150متر ..يله الحمدلله اهم شي فوگانه سگف ساترنه ولامنه كولنه ..
الفلوس الماخذتهن ماخلصن ساعدت بيهن ايهم بالاجار وبالتجهيز ..
رغم هلكانه تعب من التنظيف وتعزيل غراض البيت بس العصريه بنفس اليوم اخذت ميس ولبنى ورحنه للسوگ جهزنه ملابس اني اخذت قياس خالتي وشهد اني وياهه نتلابس جهزنه كل وحده دشداشتين وملابس طلعه غيار واحد وفد حجابين وميس جهزت زوجهه وابنهه وحماهه ولبنى كذلك الهه ولبتهه مريومه ..
ومن رجعنه جبنه ويانه لفات مو مال نطبخ لان هلكانين وشهد عايفيهه يم الجهال ..
رجعنه تعشينه ووزعنه الغراض والملابس .. حته الملابس الداخليه مناسيتهه .. تكسرت تكسر من التعب ..
مثل ليلة العيد مثل الطفل من يفرح بثوب العيد هيج جانت تلوح بوجوهنه هالابتسامه .. ابتسامة زرعت بداخلنه امل لغد احسن من يومنه هذا ..
صار الطابق الثاني حصتي اني وخالتي وشهد لازم هيج بوجود احمد اخو ايهم  الي صارت حصته الطابق الارضي ..
بس خطيه نومته صارت بالهول لان ماكو غرف كافيه .. ميس وايهم وابنهم بغرفه ولبنى وبنتهه بالغرفه الثانيه واحمد بالهول ..
خالتي معفناعه تنام وحيدهه رغم خصصنه غرفه الهه يوم اني ابات يمهه ويوم شهد ..
من يوم تركت الرمادي وابنهه هناك وصحتهه بالنازل متحجي بس مبين التعب ع ملامحهه ولسانهه يلهج بالدعاء اله .. الماينزل ذكرة عن لساني ..
هالليله شهد نامت يم خالتي ..
واني نمت وحدي بغرفتي ..
رغم التعب الجسدي بس من يجي الليل .. تسكن الآم الجسد وتبدأ الآم الروحي ..
اني روحي متعلعله من يوم عفته ..
مطروحه ع فراشي وامسح ع بطني .. اتذكر كلام خاله ام دلال من كالت مشيتج مشيه وحده حبلى واتمنيت .. تمنيت .. شتمنيت .. لو قطعه منه بداخلي .. يمكن يواسيني هالشي ..بس فاقده الامل ..