امانتي

«25»

صبااحو ..
البارحه نشرت متأخر فصار نقص او خربطه ماعرف بالضبط بس شفت التعليقات كالوا اكو نقص بالبارت وهنا راح انشر البارت من جديد وتكملون النقص الي صار البارحه عدكم ..
البارت 25
#أمانتي
بقلمي ملاك الصمت

هيفين ..
مرت اول ايام العطله عاديه بس حلوة بوجود ديلر ..
ديلر لمحلي انو نتمم زواجنه بس شلون عمو صارله 3اشهر من توفى ..
ماانفتح الموضوع بعد ..
كل فترة اطلع ويه البنات لو ويه مقدام نجهز واشتري كم شغله ومقدام منبه عليه مااجهز ملابس سود ..
بس بالخفيه جبت اسود ونيلي لان عيب من خاله وعمو عزيز عليه كانلي اب قبل لايصير لي عم ..
خاله ياسمين كملت العدة وفد يوم اجونه للبيت هي ومقدام ..
سلمت عليهه جانت مبينه ضايجه ..
ماعرفت ليش بس سلمت ع حسب الاصول وبيبي جانت كاعده وضيفتهم ..
باوعت لديلر حاولت ااشرله بعيوني .. شكو شصاير شنو الموضوع ..
هو عرفني متوترة طمني بنظراته وابتسامته ودزلي بوسه بالهوا ابتسمت وكعدت يمهم ..
هو نفسه الموضوع .. نتمم زواجنه .. نتزوج سكتاوي لاهوسه ولاحنه ولازفه نعزم الكرايب بيوم احنه نحدده علمود اشهار الزواج ونسافر لاربيل اسبوعين ونرجع ..
اني ضجت بصراحه بس مابيدي شي شفت الفرح بعيون مقدام ماكدرت اكسر فرحته ..
بس ماسكتت لان شفت خاله ضايجه وع الاكثر ضايجه لان ابنهه مستعجل ع زواجه ..
مقدام لو ننتظر دورة سنه عمو مو احسن .. السنه الجايه مثل هيج وكت نتزوج ..
باوعتلي خاله ياسمين ..
بيبي ايدتني كالت شبيك مستعجل ياعيني الناس تاكل وجوهنه ..
مبين من ملامحه تعصب مقدام .. كان مصر ع قرارة ..
بيبي وصل عمري 29سنه ولسه لامتزوج ولاشايلي ضنى يشيل اسمي ..
باوعلي بضوجه
وبتكم الله يسلمهه يوميه براي جان من زمان متزوجين لو ما دلال ابويه الله يرحمه الهه ..
انقهرت من كلامه وردت اتعارك بلحظتهه والله ...
ردت اگوم زعلانه بيبي گعدتني
كبري عقلج دنفتهم ..
وهو الافندي ابن عمي كمل كلامه ..

والناس شعدهه يمي وتحجي قابل مسوي هوسه وحفله وطبل .. لااعزم احد ولاهوسه كرايبنه القريبين واهلنه وهايهيه ..
اباوع لخاله ولا تحجي ..
مو يمه شتگولين ؟
كيفك يمه ..

افتهمت من كلامهه انو هي مقتنعه لان هاي رادة مقدام وهو ابنهه الجبير والوحيد وتريد تفرح بي وتشوف اطفاله وبعد حته عمرة حيطخ الثلاثين بس هيج حكمت الظروف انو يصير زواجه سكتاوي ..
ماطول همه اهل الانه مقتنعين اني هم ماعندي مشكله ..
حددنه موعد الزواج بعد اسبوعين ..
وطول مااحنى كاعدين اني مطنگرة لا اباوع ع مقدام ولا اوجهه كلام ..
ظلت بيبي وخاله يحجون ويتفقون ع التفاصيل ..
تعالي احاجيج ..
راح للمطبخ ..
كمت وراه بثگل ..
من باب المطبخ جرني من ايدي وقربني اله وباسهه ابتعدت عنه خطوة ليورة واخذت ايدي سحبتهه من بين ايده ..
وخر عني ..
گلتهه واني مطنگرة ..
ول يابه باع البرطومه ..
زعلان مني الحلو ..
سكتت مرديت ..
شلون تحجي هيج عليه ..
اي قابل مجذب .. مو من عمرج 15سنه واني اركض وراج وعقدت عليج وعبالي افراج تالي طفرتي مني ..
ضحكت ع كلامه ..
اي ضحكي يارويحتي انتي .. بعد اسبوعين زواجنه مفرحانه ..
طبعا فرحانه بس شو احس خاله مراضيه ..
لا شنو مراضيه مو سمعتيهه شلون تحجي بالعكس هي تريد تفرح بيه بس غير الظروف تجبرنه منسوي عرس وابويه لسه مادارت سنته ..
اي شيصير هسه لو انتظرنه ورة دورة سنة عمو الله يرحمه ترة اني مطايرة ..
نفخ زفير قوي بنفاذ صبر ..
حبيبه حسي بيه ميت عليج وع قربج واني ترة مو صغير والبعمري اطفالهم دخلوا ابتدائيه واني منتظر حضرة جنابج توافقين ..
اوووه رجعت تحجي عليه ..
هههههه مااحجي عليج شعندي غيرج بس اسمعي كلامي ولاتطلعيلي سوالف منا ومنا ..
هزيت راسي باستسلام وموافقه ..
عندج نواقص هواي ؟
اذا ماكو لاحنه ولازفه فماعندي ..
لا بدله بيضه تلبسين ونشتريهه ..
صدوك والله ..
وعيونج ماتغلى عليج ..بس ها سوالف صالون ماصالون تروحين وتتفقين بس ماتلعبين بلون شعرج ولا بطوله ..
هههههه غير عروسه شلون مالعب بلونه ..
مالي شغل اللون ميتغير وشعرج افتحيه هسه اشبره واذا لكيت سم ناقص منه الااعض خشمج ..
هههههه ..
سحب خشمي ليكدام ..
حضني بقوة مثل واحد يريد يرتوي ويشبع ..
بعدني عنه ليورة وباسني بگصتي ..
اخذ ايدي ورجعنه كعدنه يمهم ..
جانوا ديتفقون ع التجهيزات والاكل ..
غرفتنه جاهزة بالطابق الثاني حته غرفة الاخشاب منصوبه ومجهزة ثلاجه وتكييف وتلفزيون وستلايت والبيتونه مقدام مرتبهه بتخم مرتب وصايرة مثل الغرفه او هول ومكيفه والصحيات داخل الغرفه عايزنه بس مطبخ وتصير شقه متكامله ..
صح مقدام يحب الاستقلال ودائما يسولف انو لازم الواحد ياخذ راحته بس ماقبل نعزل كال خلينه ع الاقل نجتمع ع الاكل واني هم ماحبيت هالشي خالتي وبنات عمي حلوة عشرتهن ..
اتفقنه تعدي جمعه والجمعه الوراهه زواجنه ..
ماكو مظاهر فرح ياخذني من الصالون لبيت اهلي ومناك يزفوني للفندق وحته زفه بمعنى هوسه الزفه ماكو والكرايب الباقين يسوولهم عشه وعمو ثامر وولده يتكفل بهل مسؤوليه واحنه نروح نبات ليله بالفندق وثاني يوم نطلع طيران لاربيل .
مر اول اسبوع بتحضيرات وتنظيف  ..
تكمله بارت 25