البارت 26
#أمانتي
بقلمي ملاك الصمت
هيفين ..
بعد الي صار مقدام ميباوع لوجهي .. حته من يحجي وياي وجهه ثكيل ومن احنه وحيدنه ابد ميحجي بس من احد موجود يجاوبني ..
ماطلعت يومين طلعن سنتين عليه ..
اجوي بيت عمو ثامر ومن كرايب خاله ياسمين خواتهه واخوانهه خالات مقدام وخواله ..
بس الكرايب المقربين مااجه احد غريب ..
جنت خايفه حيل ومتوترة ..
حجت وياي خاله ياسمين هي وبيبي عن الي مفروض يصير بيني وبين مقدام اني اعرف هالموضوع من قبل مو غشيمه عنه بس التفاصيل خوفتني وفوگاهن زعلة ديلر مني ..
كلما ننفرد سوة احاول اتأسفله بس هو ميسمعلي ولايجاوب ولا يباوع ..
تعبت من طبعه .. اني العنيده دا الين واتغير بس هو هو مأذيني بطبعه من يقفل ع شي يقفل ..
من كثر ماخايفه طلبت من ميس تجيبلي حبوب مهدئه وصدوك جابتلياهه..
اول ليله بلعت حبايه ياله كدرت انام ..
وثاني يوم كذلك ..
بثالث هو يوم عرسي ..
گعدت الصبح تريگت وسبحت .. بيت عمو ثامر يمنه وبقيه الگرايب ببيت عمو هادي ..
ورة الريوك اخذت بدلتي البيضه والبرنص واجتني ميس ورحنه للصالون ..
هاي صورة بدلتي بشكل تقريبي ذكرت انو التصميم خلاعي وغريب ومقدام ماقبل عليهه گوة قنعته واصلا ماقتنع الا من شاف البرنص جبير ويغطي منطقه الرگبه والصدر يعني مستور وميطلع شي مني ...

سولفت لميس انو اني يومين اخذ من هالحبوب المهدئه ياله اكدر انام كثر مامتوترة وخايفه ..
ضحكت عليه كالتلي بس تصيرين بحضن مقدام تنامين رغد بعد متحتاجين حبوب مهدئه ..
من كالت هالكلام كزبر جلدي .. اكثر خوفي جان من زعل مقدام ..
بعد مااختاريت تسريحه بسيطه لشعري وكل توصيات مقدام ببالي والمكياج الي يوالمني سلمت زمام الامور لام الصالون ..
خلصنه ودگت ميس ع مقدام علمود بجينه لان تلفوني لساته بغرفه مقدام وماتجرأت بعد اخذه ..
دك هورن لبستني ميس كب وفوكاه البرنص ..
طلعت وصعدنه وياه بالسيارة ..
طول الوكت كاعده ومنزله راسي .. اريد اتجرأ اباوعله اباوع بعيونه الحنينه مشتاقه اتطلع لوجهه محتاجه نظراته الي تطمني دائما وتهدئ خوفي ..
جان متوتر عرفته من حركة رجله يهز بيهه وميس تحجي وياه وتشاقيه وهو عادي يضحك يسولف متجاوب بس باله مو يمهه ..
رفعت عيني صارت عيني بعينه بالمرايه مانزلتهه .. بس انحصرت دمعه تغرغرت بعيني .. بسرعه دنگت ..
قبل لاتنزل ويشوفهه ..
من وصلنه لبيت اهلي البيت جان متروس گرايب لان الجَمعه ببيتنه المفروض تصير ..
ميس رادت تساعدني انزل بس مقدام گاللهه ادخلي انطيهم خبر واصلا هي هم جانت لابسه ومتشيكه فماترهم تبقى تساعدني دخلت وهو فتحلي الباب الثاني واخذ ايدي سحبني حته يساعدني انزل ..
ايده دافيه وعرگانه ..
رفعت راسي لمحت طوله لمحته قاطه بس ملحكت ادقق بالتفاصيل ..
تأبط ايدي تحت ذراعه ..
طلعتلي شهد ساعدتني بالبدله شالتهه ودخلنه جوة ..
ماكو لا هلهوله ولا صفگه ولا اي مظهر فرح ..
دخلنه وكعدوني بالاستقبال وكعد مقدام بصفي ..
اجن البنات وخرن البرنص والكب ورتبني ..
كل شويه مرة جايه تتباركلي اكثرهن خالاته وزوجات خواله وهو كل شويه معرفني ع وحده ..
يبتسم بتصنع ..
انتبهتله لابس قاط جوزي والقميص بيجي ضارب ع لون عيونه الزيتوني ..
أنت تقرأ
امانتي
General Fictionقصه منقوله للكاتبه ملاك الصمت غربه حب فراق امل عذاب هل للقاء موعد؟ ؟ #أمانتي القصه حقيقيه ابطالهه خليط بين الغربيه والاكراد ان شاء الله تستمتعون بيهه ..
