البارت 17
#أمانتي
ملاك الصمت
هيفين ..
مجرد ماطلعت من الغرفه طلعت بوجهي للحديقه ..
جسمي مضطرب ضربات گلبي قويه مديت ايدي گدامي شفتهه ترجف ..
شنو الي صار ؟
تلمست شفتي ..غمضت عيوني واني اتذكر الموقف .. باسني .. بلعت ريگ ..
تنفست بعمق اكثر من مرة اريد اتمالك نفسي ..
مو واعيه للي ديصير .. دا احبه وخايفه .. هو يعرف بيه ؟ زين هسه شيگول عليه من شافني مارديته ولاحركت ساكن للي سواه ..
تعبني التفكير .. ظليت برة بالحديقه وحدي يمكن ساعه او اكثر ..
صاحني حارث اساعده بواجب الرياضيات والانكليزي ورحت ساعدته ..
عيني ع باب غرفتي مردوده شويه بس ممبين بيهه احد ..
قريب وقت الغدا گمت ساعدت خاله بالزلاطه والفاكهه واللبن وصحناهم ع الغده وعمو جان جايب سمج شوي بالتنور واني بصراحه السمج بصورة عامه مااكله لان اتعاجز افلسه من العظام الي نسميهه سله خاصة الناعمه منهه وجانت بيبي رغم شوف عيونهه مو هالگد بس خطيه تفلسلي وتنطيني ..
صبينه وگعدنه نتغده .. كلما اشيل عيني ديلر يباوعلي .. بعيونه نظرات متسائله يمكن يحاول يعرف ردة فعلي من نظراتي او بشنو احس ..
كملنه الغده ولمينه السفرة ورحت اغسل مواعين ..
ظليت مدنگه وصوت المي واني دااشطف المواعين مغطيه ع اعصار المشاعر الهايج بصدري وصدره وكأني في صراع .. اريد ارفع عيوني اباوعله ماعندي جرأة ..
ظل المي يجري ويغطي ع كلام گلوبنه وهو ظل واگف عينه عليه يريدني ارفع عيوني اله بس ماطاوعته ..
واكف بباب المطبخ متكتف وايديه لصدرة ..
عمو گاله .. فوت يابه فوت اخذلك كسرة ليش واكف بالباب ..
لاعمي اريد ارجع لبيتي .. ابدل واطلع للديرة ..
من سمعته كال اريد اروح سديت المي وكل سمعي يمه وين يريد يروح ..
رفعت راسي اله جان يباوعلي بنظرة عتب ..
هاا .. براحتك يابه براحتك .. سلملي ع الاهل ..
يوصل ..
يله في امان الله ..
الله وياك يابه الله وياك ..
طلع ..
خلصت شغلي ودخلت لغرفتي تمددت ..
تكمله بارت 17
ضغطه معلك تكدرت اكثر ..
وديته العصريه للطبيب اول ماوصلت البيت وطمني الطبيب عليه ولازم نبعده عن الضغوط ..
ظليت احس بالذنب .. ابويه من ورة الشغل ديتعصب وديرتفع ضغطه واني واني عايفه ورايح ادرس ببغداد اركض ورة وحده زعطوطه ..
كرررهت روحي كرهت گلبي المرهون الهه من هي لفه بالگماط ..
لليل احتاجيتهه تزيل همي وتريحني بحجايه طيبه مثل طعم شفايفهه وكلمه حنينه مثل لمسه ايدهه دكيت ودكيت مجاوبت ..
متجاهلتني ..
بين متطمنت ع والدي للاحد ياله رجعت لبغداد ..
الاثنين عندي امتحان بشعبتهه ..
صارت كدامي تعصبت حقدت اريد شي يبرد ناري عنهه ..
سلمت الاسئله .. اراقبهه ماكو صافنه متحل عرفتهه ممجاوبه ومن صارت ورقتهه بيدي تأكدت ..
خلص وقت الامتحان سحبت كل الاوراق ووجهت كلام الهه بلهجه عصبيه گدام الطلاب ..
اخلص امتحاني بالساعه الثانيه والگاج بمكتبي ..
هزت راسهه ..
حاضر استاذ ..
طلعت للشعبه الثانيه ينتظروني امتحنهم ..
ورة ساعة اجتني لغرفتي ..
تدعي رباطه الجأش والهدوء بس من ملامح وجهه المتوترة اعرفهه خايفه ..
السلام عليكم ..
مارديت سلامهه .. بأيماءة مني انطيتهه الاذن بالدخول ..
دزيت عليه ..
اگعدي ..
سحبت ورقه من الجرار وطيتهياه بعصبيه خليتهه ع المكتب وسألتهه ..
هاي شنو ؟
قدمت جذعهه للجانب واخذت الورقه بيدهه تتفحصهه ..
هاي ورقتي ..
اعرف ورقتج .. شمصخمه بيهه ..
غمضت عيونهه وبلكت ريگ وحجت كلام اقرب للهمس ..
ادري بروحي ممجاوبه ..
مو اجيت ودرستج ..
مفتهمت ..
وليش محجيتي بوقتهه ؟
سكتت دنگت راسهه ..
سألتهه بمكر .. بشنو جنتي لاهيه ؟
رفعت راسهه رأسا وكأنه حست بفخ سؤالي ..
غيرت نبرتي لنبرة حانيه ..
شبيج .. ليش متغيرة ..
ممتغيرة .. انت ماعرف شلون صاير ..
ليش شسويتلج ؟
هواي سويتلي ..
اي طيني مثل حتى افتهم راسي من رجليه ..
والي صار ببيت عمو ..
عرفتهه تقصد ع البوسه وعرفتهه راح تذبهه براسي ولا كأنه هي نفسهه الذابت بيدي مستسلمه ..
رفعت حاجب .. حجيت بثقه ..
الي صار بارادتج ..
ها لا مو ...
تلعثمت ردتهه تكمل .. نصت ..
ليش شالعه كلبي .. ليش مدتريحيني وتعترفين ..
اعترف بشنو ؟
حبج الي ..
بس اني ....
اششششش لاتكملين ولاتكولين انت مثل اخويه ترة ذني سوالفج حافظهن ..
عليت صوتي واني اتكلم ..
شبيك ديلر صوتك ترة فضحتنه شنو ماعدنه بيت نحجي بي ..
يابيت هذا .. بيت عمج ؟مو اجيت و ردت اتفاهم وهم تهربتي واختفيتي مدري وين ..
سكتت ..
هسه مو ناويه تعترفين ..
رفعت راسهه .. بشنو اعترف ؟
شفت دموع تجمعت بعيونهه ..
انج تحبيني ..
سكتت .. هاا .. تعترفين لو ارسبج ..
ع وجهي شبح ابتسامه لان ماردتهه تبجي مهانت عليه ردت الطف واخفف من حدة الجو المتوتر بيناتنه واخليهه تنسى البجي ..
اخذت جنطتهه وگامت ..
گالت .. رسبني ..
حجتهه بثقه ..
صدمني شويه ردهه ..
اهاا ..
صفنت عليهه طولهه وگفتهه خشمهه العالي وجهه وحنكه المرفوع متباوعلي تباوع ليكدام ..
گتلهه ..غبيه ..
التفتت بسرعه باوعت لوجهي صارت عيني بعينهه ..
اي غبيه ..
خاف عبالج مقدام نفس قبل .. لايابنت عمي زمان اول تحول .. مقدام بعد ميركض ورة وحده زعطوطه مثلج ..
للاسف انتي متستاهلين ..
نزلت دمعه منهه ..
اني خايفه ..
والله اني خايفه ..
حجت وصارت الدموع عشرة عشرة تنزل ..
هذا عذرج ؟
وداعة ابويه خايفه ..
اوك اجي وياج من شنو خوفج ؟
تنتقم لكرامتك مني .. ياما صديتك ..
صفنت بوجهه الي تحول الى كتله من خليط اللون الابيض والاحمر .. طرف الخشم الوجنات حمر الشفايف ترجف وتحجي .. الحنك يهتز ويه البرطومه حابسه البجيه بس الدموع غصبن عليهه تنزل ..
تمعنت بتضاريس هالوجه الاحبه بس مرة بعد مرة يخذلني ويأذي گلبي بقسوة ويجازيه بحرمان وجفاء ومكابرة ..
هذا عشمج بيه يابنت عمي ؟
تتصورين اگدر اكسر گلبج ..
دنگت تبجي .. اكتافهه تنهز اثر البجي ..
مو گتلج غبيه .. ومتستاهليني .. لو تحبيني جان مخليتي عذرج عائق بيني وبينج .. هه عائق جديد هذا ..
ابتعدت عنهه ..
طلعي برة .. ولتتوقعين الي صار يخليني اشد وياج او اتساهل وياج بالدرجه .. مااساعد .. استحقاقج وبس ..
هزت راسهه .. اخذت جنطتهه وطلعت .. رسبت هيفين بأختبار قلبي للمرة الالف !!
للحكايه بقيه ..
أنت تقرأ
امانتي
General Fictionقصه منقوله للكاتبه ملاك الصمت غربه حب فراق امل عذاب هل للقاء موعد؟ ؟ #أمانتي القصه حقيقيه ابطالهه خليط بين الغربيه والاكراد ان شاء الله تستمتعون بيهه ..
