اميره قاعده مع الباشا في الفيلا.. في الحديقه ...
وليد: ( قال الا يجي السودان? خليهو يجي.. انا بعرف اتفاهم معاهو)
اميره:( كيف?)
وليد:( حاخليهو يطلقك غصب عنو)
اميره:( لا ي وليد م دايره محمود يعرفك.. حاكلم عمي و حيحصل مشاكل.. خليك بعيد انا بتفاهم معاهو و بخليهو يطلقني)
وليد:( م حيطلقك..لو كان داير يطلقك كان طلقك من زمان)
اميره:( كدي انا بتصرف ..خليهو يجي و لو م طلقني بعدين انت اتدخل)
وليد:( حاضر اوامرك ي الغاليه)
رجعتا مع ناس ماما ليلي البيت.. تاني يوم مشينا الجامعه و و مشينا انا و يارا المستشفي وقت غسيل مراد.. لقينا ماما ليلي و عمو مختار و امجد و مصطفي قاعدين.. سلمنا و سالنا من مراد..
ليلي:( دخل الغسيل)
قلتا:( ربنا يسهل ليهو)
ماما ليلي كانت بتقرا في قران.. و عمو مختار شايل سبحه بسبح.. قعدنا و بقيت بدعي ليهو...كنت خايفه شديد عليهو لاني سمعتا ب ناس ماتو عديل اثناء الغسيل...
امي م جات كانت مشغوله مع هشام عشان بجهز حاحات سفرو و مسافر...بس بتضرب تلفون تتطمن علي مراد..
ماريا كانت تعبانه ب الحمل و راقده م قدرت تجي برضو..
دكتور علي طلع و طمنا علي مراد و قال هو كويس بس لازم يرتاح بعد الغسيل..
ماما ليلي:( بس اشوفو و اتطمن و نمشي)
علي:( طيب..ماف مشكله)
شويه و جابو مراد غرفتو...مشينا كلنا نتطمن عليهو شكلو كان تعبان شديد و م قادر بتكلم سلمنا عليهو و هو بهز راسو بس م بتكلم.. انا جد قلقتا عليهو قلتا ليهم:( امشو انا بقعد معاهو)
امجد كان راجع ل ماريا عشان يوديها الدكتور...
و مختار عندو شغل.. و ماما ليلي م بتقدر علي قعاد المستشفي...
يارا:( انا بقعد معاك)
قلتا ليها:( لالا امشي.. عشان تجهزي ل مراد غرفتو.. المساء بطلع)
مصطفي:( انا بقعد معاك ي ميناس)
قلتا ليهو:( طيب)
ديل كلهم مشو.. و مصطفي طلع من الغرفه م قال لي ماشي وين..
مشيت قعدتا جمب مراد و مسكتا يدو و انا دموعي نازله..
قلتا ليهو:( مراد .. انت كويس?)
فتح عيونو عاين لي و دموعو نزلت...
قلتا ليهو:( مالك?)
مراد:( انا العملتو في روحي ي ميناس.. انا غبي... انا عارف الشراب الكتير ده ممكن يعمل فشل بس برضو كنت بصر اني اشرب.. اني غبي.. استاهل كل البحصل لي)
