المسا۽ قاعدين في الصاله.. انا و يارا و ماما ليلي و امي و عمو مختار و هشام..
عمو مختار جاب لينا تورته و حلويات...
عمو مختار:( عايني ي ساميه... قرايه ميناس حقت الجامعه كلها علي)
ساميه:( لالا ي مختار.. انا عندي الحمدلله.. و ابوها الله يرحمو خلي ليها قروش و المحل قعد يجيب قروش كويسه و بقريها احسن قرايه.. و انت كفايا عليك يارا)
هشام:( ميناس بتي و قرايتها علي انا)
مختار:( عارف ي ساميه...عارف عندك..و عارف ي هشام بتقدر تقريها احسن جامعه بس دي هديتي ل ميناس.. تختار الجامعه الدايراها و التخصص الدايراهو و كلو علي حسابي)
ليلي:( ربنا يخليك ي مختار)
عمو مختار جد خجلني شديد...
قمتا علي حيلي حبيت علي راسو و قلتا ليهو:( ربنا يخليك لينا ي عمو مختار)
عمو مختار طيب شديد و حنين...بالذات معانا انا و يارا.. بس متشدد شويه مع اولادو.. بالذات مراد...
ساميه:( ربنا يخليك ي مختار...جد خجلتني)
مختار:( ماف خجل.. ميناس ذي يارا ... الاتنين بناتي)
جا داخل مراد شايل كيسين كبار في يدو...
مراد:( مسا۽ الخير)
رينا مسا۽ النور...
مراد جا علينا انا و يارا سلم علينا و قال لينا:( الف مبروك.. جد فرحتوني)
يارا:( الله يبارك فيك ي مراد.. اصلا احنا شاطرين شويه كده كانو حيزيعونا)
قلتا ليهو:( الله يبارك فيك)
م قدرتا ارفع عيني في عينو.. دي كان اول مره اتكلم معاهو من وقت الحادثه..
مراد مدا لي كيس كبير..
مراد:( دي هديه نجاحك)
استغربتا شديد...
مراد:( افتحيها شوفيها)
كان كيس كبير.. شلتو ختيتو علي الكرسي و جواهو شنطه فتحتها لقيتو جيتار...
مراد:( عشان تتعلمي تاني براك)
قلتا ليهو:( شكرا)
مختار:( بدل م تجيب ليها حاجه تنفعا جايب ليها جيتار)
ليلي و ساميه ضحكو..
يارا:( و انا?? )
مدا ليها الكيس التاني..
مراد:( ده حقك.. فيهو حاجات من البتحبيها دي... ان شا۽الله تعجبك)
يارا شالتو بفرح و فتحتو.. لقت فيهو مساكات بتاعت شعر و لصقات حق حيط.. و اكسسوارات ملونه..
