مشيت جهزتا شنطه صغيره فيها كم غيار و لبستا و ده كلو و يارا قاعده قدامي بتعاين لي بكشيره.. شلتا شنطتي و مفتاح العربيه و مسكتها من يدها و نزلنا سوا..
لقيت ماما ليلي و عمو مختار و مراد قاعدين في الصاله.. من شفتا مراد قلبي وجعني.. بس ابتسمتا و مشيت عليهم..
يارا:( ي ماما شوفي ميمي ماشه تقعد مع خالتو ساميه)
ليلي باستغراب:( ليه ي ميمي?)
قلتا ليها:( كم يوم بس و بجي.. يارا دي براها مكبره الموضوع)
مختار:( لو كم يوم موافقين ماف مشكله.. بس اوعي تتاخري)
قلتا ليهو:( حاضر ي عمو..يلا)
سلمتا علي ماما ليلي و عمو مختار .. لمن مديت يدي اسلم علي مراد.. قلبي دقي شديد..
قلتا ليهو :( يلا باي)
حسيتو بعاين لي جووه عيوني داير يفهم حاجه.. بس نزلتا عيني منو و طلعتا انا و يارا...يارا وصلتني لحدي العربيه.. و ركبتا و هي واقفه بالشباك..
يارا:( حتجي متين.. حددي لي)
قلتا ليها:( ي مجنونه كلها يومين.. بتعملي كده ليه? محسساني قاعده براك.. اهو البيت مليان)
يارا:( متعوده عليك بس ناس البيت دي م قعد اقعد معاهم الا وقت الاكل)
سمعنا صوت مراد:( يارا.. خلي ميمي تغير جو شويه)
يارا اتلفتت عليهو...
مراد:( ادخلي خلاص.. دايره في كلمتين)
يارا:( طيب.. يلا باي.. حاضرب ليك)ادتني بوسه علي خدي
و مشت..
بكلام مراد...قلبي بقي يدق و جسمي كلو برد..
لفا جا ركب جمبي.. م قدرتا اعاين ليهو في وشو.. مراد حسي بتوتري..
مراد:( الامتحانات كانت كيف?)
قلتا ليهو:( كويسه)
مراد:( ميمي.. عايني لي)
قبلتا عاينت ليهو في وشو و دنقرتا راسي سرعه... مراد ضحك..
مراد:( ميمي.. م تخجلي مني.. انا مراد...ود خالتك و متربيين مع بعض طول عمرنا..الحصل ده م حيغير حاجه في علاقتنا.. انتي بت خالتي و مقامك من مقام يارا.. متعود عليك..علي ضحكك معاي و هظارك و عزف الجيتار مع بعض..انا داير ترجع علاقتنا و التوتر ده يمشي خاالص لو دايره انا حااعتبر انك م قلتي لي حاجه.. و نرجع علاقتنا عادي... رايك شنو?)
دموعي نزلت من كلامو...و كلامو وجعني ..بالسهوله دي داير ينسي اني بحبو.. ولا كانو عرف.. مسحتا دموعي و ابتسمتا و قلتا لبهو:( طيب.. انسي اني قلتا ليك شي.. بس علاقتنا م اظن ترجع)
