ع الهوى

٤

#ع_الهوى٤
Shahd Alsalman
بعد اسبوعين تقريبا  خرجوني من المستشفى وصحتنا تحسنت وكلنا بخير اني والبنات وصالح وفريد
ومن هالحادث تحسنت علاقة ايسر وفريد وحتى علاقتة بينا و انضم لمجموعتنا
تصالحنا وياه وهو اعتذر مني ومن فريد على كلامة القديم واكتشفنا هو كلبة طيب كلش وما عندة شي بس مجرد طيش شباب مو اكثر
وعرفنا انه هو مجان موجود وكت الانفجار من صار وصل متاخر بعد ما انفجرت السيارة لهذا جان شكلة زين وما اتصاوب مثلنا وكدر يسعفنا ويساعد الطلاب
تعدينا هالشي والحمدلله وطبعا فريد كل يوم يصنف علية لان جنت خايفة علي ويكلي اني بسبع ارواح وما اعوفج لازك على كلبج لو شيصير
عشنا ايام حلوة بالعطلة لان صار عدنا تدريب صيفي واحنا مجموعتنا نروح سوة ونرجع سوة اجواء التدريب حلوة وجديدة والعملي مو مثل النظري اسهل وامتع بهواية ..

وبعد ما كملنا تدريب دخلنا رابع وايسر حول شعبتة ويانة حتى نسوي مشروع التخرج سوية وصرنا مجموعتين بوقتها وكملنا الكلية وراحت احلى ايام عشناها
حياة مختلفة و احلام بسيطة ونهاية مشوار وتعب طويل حتى نبلش خطوة جديدة بحياتنا
لكيت شغل بهاي المحطة عن طريق معارف زينب اللي اجاها ولد وخطبها وتزوجو بعد ما خلصت الامتحانات وسافرت للخارج وياه فكالتلي هاي الفرصة بدل اسمي راح احط اسمج واشتغلي وثبتي نفسج وفعلا هذا اللي صار وسحبت فريد وصرنا ع الاذاعة وهو ع الاعداد وايسر صار ع الاخراج بعد ما سحبة فريد
الحلو بالاذاعة هاي جديدة فنكدر نجيب الناس اللي نرتاح وياها ونعرف بيها تسوي شغل مو بس تاخذ راتب وخلص
وصالح ووديان ما رادو يشتغلون ويانة يعني جانت خططهم غير عنا احنا بس بقينا نتواصل وياهم حتى من اتزوجت سمر ظلينا سوية
بمرحلة الشغل هواية تغيرت حياتنا لان صارت جدية اكثر ومطلوب انه نثبت جدارتنا وقدراتنا حتى نزيد خبرتنا وبنفس الوقت نبقى من الاوائل اللي اسسو هالاذاعة
بلشنا بالاخبار كاذاعة وجانت تجربة ناجحة ومميزة لان اصعب القاء هو القاء الاخبار واداءها حسب طبقة معينة من الصوت
والاهم لغة عربية متقنة بدون اي اخطاء ..
بعدها اجتي ببالي فكرة برنامج رومانسي اخذت رأي فريد بيها و عجبة الموضوع وطرحنا الفكرة على رئيس الاذاعة
- شنو نوعية هالبرنامج وفقراتة
- استاذ يعني بصراحة اذاعتنا على كد ما هي بيها متابعين هواية بس بنفس الوقت رتيبة و دتميل للملل
لهذا فكرنا من بعد اذنك نسوي برنامج خفيف لمدة ساعتين او تلاثة حسب تصويتات المستمعين
ونخلي فقرات اتصالات و رسايل واغاني واكيد نطرح مشكلة او
ظاهرة معينة
- ماشي وشنو الافكار ببالكم ؟
- مراح اضيف هواية على كلام در بس احنا ببالنا نسوي استطلاع اراء بفئات معينة وننزل للشارع بتقارير حية ومسجلة ونطرحها بهذا البرنامج
- فكرة حلوة
و منو حيكون وياكم بالاخراج اذا الاعداد على فريد وتقديم در
- من بعد اذنك نريد ايسر ويانة بالاخراج
- تمام توكلو على الله وبيضو وجهي اريد شغل مرتب
- ان شاء الله استاذ مراح نقصر
من رخصتك
- تفضلو الله وياكم
بس لحظة در خليج اريدج بموضوع
  - صار استاذ
- فريد تريد شي ؟
- لا استاذ
- لعد شكو واكف روح لشغلك
- العفو
بعد اذنك
- تفضل
اكعدي در ليش واكفة
- كول استاذ
- باعي بصراحة اني معتبرج مثل بنتي وتعرفين بهذا الشي وكلش معتمد عليج
ولهذا السبب اكو في بالي مشروع واريدج وياية بي
- تحت امرك شنو هالمشروع
- اكو احتمال نسوي دمج لاذاعتين وهالشي حيتطلب اكثر من مدير حتى نسيطر ع الوضع وفكرت تكونين من بين اربع مدراء انت الشابة بيناتنا اني واستاذ كميل واستاذ رفعت و استاذ غانم
- اني !!؟
بس اني بعدني وما عندي خبرة جبيرة بهذا المجال بصراحة
- لا تكملين صحيح انت صغيرة بس عندج قدرات وطاقة وهالشي واثق منة كلش ولا تنسين هالمشروع ع المدى الطويل يعني بعد ممقررين احنا ولا صايرة اتفاقية اخيرة بخصوص الاذاعتين لهذا اذا صار قبول نهائي ووقعنا عقد اريدج منا لذاك الوكت تفكرين وتقررين وترديلي خبر حتى ابلغهم
وبالنسبة لراتبج حيكون اعلى ب٣ مرات من راتبج الحالي ما عدا المخصصات والحوافز واكيد معنويا حتحصلين سمعة طيبة بالوسط وشهرة اكثر
متفقين ؟
- هذي مسؤولية وثقة جبيرة من حضرتك بية وان شاء الله حفكر بالموضوع واردلك خير بقراري
- انت كد هالثقة والمسؤولية واعتمادي اصلا حاليا عليج
انتظر منج رد
تكدرين تتفضلين لشغلج
- بعد اذنك
- الله وياج
حسيت بسعادة جبيرة خاصة بعدني باول مشواري ومجنت متوقعة هيج فرصة تجيني
فتت على الغرفة فريد ينتظرني ويباوعلي يريد يعرف شصار بيني وبين المدير
وبروح شقية حبيت العب باعصابة واتشاقة وياه مثل العادة
- شراد منج استاذ محمد
- شي متتوقعة
لا لا اني نفسي مو مصدكة
- شنو دحجي !
- خطبني لابنة وكالي مهرج اللي تريديه
وحفلة وبيت وسيارة على مزاجي
- وهالشي مفرحج !؟
بيت وسيارة وحفلة
- لا طبعا اني اريد ابنة ذني يجن لان حتزوج واخد غني
- معقولة صرتي تافهة !؟
- ليش تافهة واحد لو يتزوج هيج زواج لو بلاه
- اوكي 
طلع من الغرفة ومعصب وعيونة حمر مرحت وراه كلت حخلي هيج منا لنهاية الدوام
مطب بعد للغرفة ابد واخر شي من طلعنا وخلصنا دوامنا فات اخذ حاسبتة وميباوع لوجهي
حجيت وياه و مرد علية لبس سماعات واتقصد يعلي صوت الاغاني حتى لا احجي وياه رجعت للبيت تعبانة وتلكتني ماما وكالت طبي غسلي حتى نتغدى
وع الغدا حجيتلهم طبيعة الشغل المعروض علية واثنينهم شجعوني وفرحولي
بقى فريد ما اعرف شنو رأية حتى اقرر قراري النهائي