ع الهوى

٣٠

#ع_الهوى٣٠
Shahd Alsalman
رجعت بس كعدت ع الكرسي وصرت تقريبا مقابيلة من بعيد
وكمت اسمع كلامة برغبة بداخلي تكلي اكعد واسمعة بس حبيت ابين كبريائي كدامة ردت احسسة هو ولا شي
- مثل متعرف اني الصغير والمدلل يعني امي اللي هي بيبيتك الله يرحمها جانت متحب احد يضوجني ولا يسمعني حجاية ولا حتى ينصحني بالنسبة الها شي مقدس جنت
طبيعي نتيجة كل دلال زايد حيكون الانحراف او التمرد واني اختاريت الطريقين
جنت فاشل بدراستي ومن اجيب درجة مو زينة الكل تلوم بية وابوية همين مرات توصل يريد يضربني بس امي متخلي ولا تقبل واني طبعا من اشوف هيج جنت اكيف لان اعتبر نفسي حر
شوية شوية كبرت واني السنة كوة اخلصها و اعبرها لحد موصلت السادس خليت السنة ب ٣ سنين هلكد ما جنت مشاغب ومهمل وما اعرف اختار طريق يرفع راس اهلي
التهيت بالجكاير والطبة والطلعة واصدقاء السوء حياتي اتغيرت للاسوء بوجودهم يوم بعد يوم صرت انسان ساقط بكل معنى الكلمة
عرفوني على بنات وجنت اطلع وياهم صحيح مسويت اي شي بس هيج مجرد اسمي طالع وياهن واشرب وارجع سكران وهاهية
جنت اعتبرة فخر الي انه اعيش هيج حياة بدون محد يسيطر علية
بعد فترة تعرفت على بنية صحيح هي مو من عمري بس حبيتها
كمت اتنفسها واحس هي هاي اللي ادور عليها برغم ما بيها شي حلو
دائما جانت تريد مني اصرف عليها هواية واطلعها واشتريلها وتكلي هالشي يحسسني برجولتك وياية وحبك الي واني اكيد انغر واريد بعد وبعد اثبتلها حبي الها
لحد وكعت وياها بمشكلة جبيرة من لكفونا اهلها بسطح البيت
ومن هذا اليوم واهلي سوو علية حظر من كل شي الطلعة الروحة الجية وحتى من المدرسة كعدوني ما كمت اشوف احد ولا احد يشوفني وابوية منع حتى امي تجي و تحجي وياية
ساعات جان يجي ويضربني ويهددني بالقتل واني جنت اصدك بي عبالي يسويها بية صدك
وساعات يكعد يحجي وياية او ينصحني او يعلمني ع الصلاة والدين يحاول بكل الطرق يقومني للصح بس اني الشيطان متمكن مني وحياتي مسويها غلط بغلط وهم ما تبت بقيت افكر بيها وشلون اطلع من غرفتي وحبسي حتى اروحلها
وحتى يخلصون اهلي من هاي المشكلة الجبيرة قررو يزوجوني صار بوكتها جدال ونقاش حاد لان اني ما اريد اتزوج الا هاي البنية وابوية وكل اهلي يكلولي هاي وحدة مو زينة ومو من ثوبنا واذا اخذتها العالم كلها حتحجي بشرفي و محد يقبل يباوع بوجهي ولا ياخذ من بناتي او يزوج اولادي اذا صارلي منها اولاد وبنات
حجو رادو صيحو ضربو مفاد بية
لحد ما جدك الله يرحمة كالي اذا تريد اتزوجها اني راضي بس تحرم تفوت هالبيت ومالك نصيب باي شي بالورث وحلف اذا شافها لو هيج بالصدفة يذبحها ويشرب من دمها
اني هنا استسلمت خفت لا يسوي كل هذا لان حلف يمين وجدك من يحلف بعد انتهى الامر يعني خفت عليها بوكتها
رضيت بالامر الواقع و تزوجت امك جانت حلوة وحبابة كلش وخجولة يعني بنية بنت بيت من صدك اني حسيت بفرقها عن اللي جنت احبها بس كابرت هواية
كامت تنصحني بالصلاة وارجع اكمل دراسة وتداريني هواية متطلب مني شي كل اللي يهمها تحافظ على كرامتها و علية بس اني بعدني بطيشي مجنت اهتم لحجيها ابد
راحت ايام واجتي ايام كم شهر من زواجي اتلاكيت بالصدفة بالبنية وعرفت اني متزوج انقهرت مني هي وحسستني اني ظالمها كالتلي اني اريدك واحبك ورجعت حييت بية كل شي جان الها
وعدتها اتزوجها بس جان شرطها اطلك واتزوجها
واني نفذت بكل رحابة صدر وكلت هي حياة وحدة اعيشها وما الي علاقة باحد حتى لو انحرم من كل شي و منهم المهم هي وكلت اخذها واهج من كل هالمكان
حاولت اقنعهم لاهلي فترة طويلة واطلك ما قبلو تعاركت وياهم طلكت امك وطلعت من البيت رحت متوجه الها  وخابرتها من تلفون المحل اللي يم بيتها
كالتلي اني مخطوبة اصلا  وخطيبي يسواك فلوس ومركز انت شنو واخذك جنت اضحك عليك بس عبالي انت كبرت ما ادري بيك بعدك زعطوط هيج
هددتها افضحها بس جانت واثقة من نفسها ومسوية زوجها مدري خطيبها مثل المحبس باصبعها مثل ما سوتني بيوم من الايام
رحت لاصدقائي مكسور خاطر وكلب وما اعرف شسوي وشلون ارجع لاهلي واني تحديتهم صعبت علية نفسي انذل كدامهم
و اصدقائي ما لفوني من خلصت فلوسي وعزايمي الهم والصرف كبحو وياية ولا عبالك بيناتنا صداقة ولا عشرة عمر وجانت هاي المواقف تذكرني بامك من تكلي ذولة صدقان الشوم والندامة محد بيهم يسندك وجنت اعاند واتعنتر عليها وتكلي مو هسة يبينون بالشدة يالا وفعلا كلامها جان صح
حتى كرايبي ما احترموني ولا خلوني افوت لبيتهم لان ابوية الة هيبة وينحسبلة الف حساب
وراح سند الاصدقاء والزوجة والاهل مني
حاولت ارجع لامك بس خفت تشمت بية لان من طلعت كالتلي ما ادعي عليك بس الدنيا دين وانت واني بيناتنا رب العالمين هو يحسسك باللي حسيت بي
تشردت بالشوراع كمت ادور داير مداير بيتنا اريد اشوف اهلي وامك
اشتغلت حمال لان ما عندي شي اكلة والعالم تتصدق علية من تشوفني نايم بالخرابة او يم العرباين
خابرت بيت اهلي طلعتلي امي تمنيت احجي وياها واتسامح منها بس مكدرت بكل مرة دموعي تخوني واستصعبها ...