ع الهوى

٢٨

#ع_الهوى٢٨
Shahd Alsalman
سافرنا حتى نسوي اخر تحليل ونشوف النتيجة وصلنا الدكتور وقام باللازم وكلي امل انه اطلع متعافية منة
بعد الفحص كالي حيطول اسبوعين او اكثر حتى يبلغني بالنتيجة
طلبت منة انه اطلع لشغلي وسمحلي بشرط ما اتعب ولا اضغط على نفسي لان هالشي يجيب نتيجة سلبية
فرحت كلش لان حرجع لدوامي وتركت كل شي ورة ظهري حتى النتيجة بالنهاية اني حاولت بكل الطرق اقاوم المرض وهذا يكفي حتى اعيش مرتاحة وان كان كم يوم بعمري ميهم ...
رجعت لبغداد واول طلعة الي جانت المحطة الاذاعية دخلت اني وفريد ولكيت محضريلي ورد والكل واكف حتى يستقبلني غمرتني فرحة وسعادة متنوصف كل هالناس تحب من كلبها بدون مقابل
سلمت على واحد واحد وعلى المدير و طلب مني ما اتعب نفسي وكتلة اتحملني هالكم يوم وبعدها بلكت اكدر اكمل وارجع من جديد
كالي ان شاء الله ترجعين وتنورين اذاعتج مرة لوخ شكرتة واخذوني ايسر وفريد لغرفتنا مرتبين الميز وتارسي ورد كعدنا نحجي ع الصار بغيابي و شنو الجديد بالبرامج
بعدها كل واحد راح لشغلة وبقيت كاعدة على الكرسي وحدي وافكر بكل اللي صار حسيت بنعس وغفيت ع الميز
حسيت على فريد يصيح ويهز بية كعدت مخروعة من منظرة ووكفت على حيلي وهو رجع خطوة ليورة
- فريد شكو
- يا الله دخيلك
انت مخبلة !؟؟
- شبيك دفهمني ؟؟؟
- شفهمج
طلعتي نايمة واني عبالي بيج شي
- والله عبالي صاير شي فززتني
- ليش هيج سويتي
- اي نعست شسوي الحباية تنعس وردت اغفى شوية
- هو انت مال شغل
امشي دا ارجعج
جرني من ايدي ودفعتة ورفع ايدة
- حضربج بوكس اطير وجهج ترة
- اموتك والله
جرني من ياخة جاكيتي وصرت قريبة منة كلش
- اذا متسمعين كلام متلومين الا نفسج
عيوني بعينة وقريب علية واشوفة عصبي بس يحاول مياذيني
ضحكت من كل كلبي وهو ضحك على ضحكتي
حضنتة
- لا تخاف ما بية شي والله جنت نعسانة وبعد السويتة بية منا لاسبوع ما انام من الفزة
- يا عمري خفت عليج والله اسف فززتج
- فريد
- ها يا عيوني
- احبك هواية
- اموت عليج مو بس احبج
وخرني من حضنة واخذني بيدة للتسجيل وكالي اكو مفاجأة الج
وصلنا وجان اكو كرسي ثاني يم الكرسي القديم مالتي
- شنو هاي ؟
- مو جانت امنيتج انه اكون مذيع وياج ببرنامج سوية ؟
- وبعدني اتمنى هالشي خاصة ورة مسمعت الحلقة القدمتها وحدك
- ولهذا السبب اني والمدير سوينا البرنامج مالتنا الي والج مو بس الج
- والله فريد ؟؟؟
- والله
ضحكت وبجيت بنفس الوقت من الفرحة لزم ايدي وباسها
رحت كعدت يمة ع الكرسي الثاني ويكلب بالاوراق هو ويحضر ويرتب ويسالني نشيل هالمقطع او نحطة رتبنا تقريبا كم حلقة كبداية مشوار جديد لهذا البرنامج
انتبه للساعة وكالي امشي ارجعج للبيت حتى ترتاحين واني ارجع لدوامي
رجعت البيت وشوي احس بتعب لان صار فترة تاركة كعدة الصبح والدوام الطويل والتركيز اكلت واخذت الدوة ونمت
مرت الايام وفات على موعد النتيجة تقريبا اسبوع وبخلال هذا الاسبوع قدمنا اول حلقة مشتركة الي ولفريد وجانت ناجحة جدا
ومنتظرين نقدم حلقة ثانية اليوم
بدينا بتحية المستمعين والمستمعات وطرحنا فكرة الحلقة وفتحنا باب المشاركة للكل
مرت الساعة الاولى بين اغاني واتصالات ونقاشات المستمعين
تلفوني جان صامت شفت اضاءة تتوهج منة عرفت بي ديدك افتريت بالكرسي حتى اشوف منو ولكيت رقم ما اعرفة مرة مرتين لحد ٥ مرات يدك وما جاوبتة فريد سالني منو وكتلة ما اعرف منو عوفة
ختمنا حلقة البرنامج بالساعة الثانية وطلعت قبل فريد حتى اغسل وجهي
تفاجئت برسالة منتبهت واصلتني من نفس الرقم وكاتبلي
" در اطلعي برة الاذاعة اني منتظرج هناك "
استغربت منو هذا ومنين يعرفني احتاريت اروح لوحدي اطلعلة لو اكول لفريد ترددت اطلع خفت
- در
- ها
- شبيج هيج واكفة
- ايسر الله جابك
تجي وياية ؟
- وين ؟
- باوع هذا رقم اتصل علية مشلتة
وهسة دازلي هيج رسالة
- ابقي جوة اني حطلعلة هسة
- لا حجي وياك
- ليش تعاندين
طبي جوة يم فريد حشوف منو هذا واجيج و اذا اكو شي حدكلج
- ماشي
راح ايسر ورجعت يم فريد بالغرفة سالني اذا تعبانة وكتلة لا بس بالي يم ايسر
اندكت الباب وانفتحت جان ايسر ووجهة ما اعرف اميز تعابيرها
واكو شوية شحوب حسيتة مو طبيعي فات للغرفة وفات وراه الدكتور عامر وكفنا اني وفريد على حيلنا
كمت ابلع بريكي ورجلي ترجف ما اعرف شنو السبب و فريد يكول خير شبيكم
الدكتور شايل بيدة ظرف جبير ويباوعلنا بلش يفتح بي ويطلع منة اوراق واني بعد حيلي ميشيلني رحت يم فريد تقربت منة ولزمت بيدة
رفع الدكتور عامر عيونة علية ...