ع الهوى

٢٢

مساء الورد على كلوبكم وعيونكم ❤️

#ع_الهوى٢٢
Shahd Alsalman
اتفقت ويا اهلها يروحون اليوم وابقى اني وياها وكلت لايسر همين يروح يرتاح
راحو وبقيت وياها هي نايمة وسالت الممرضة شكد حتبقى غافية كالتلي تقريبا ٣ ساعات اذا مو اكثر
خليت رقمي يمها وكتلها اول متكعد تتصل بية خاف اتاخر  و طلعت من المستشفى
بعد ٤ ساعات بالضبط كعدت و فتحت عينها بلا متطول نظرتها الي باوعت للشباج  كمت قربت الكرسي منها وصرت بصفها كلش وبعدها تباوع وسرحانة بعالم خاص بيها
- صرتي احسن ؟
- اي
- يعجبج شي تاكليه مشتهيتة !؟
- لا
و حتى لو اريد اني ممنوعة من الشغلات الاحبها
باوعت ع الباب كمت قفلتة وامشي على كيفي وفتحت الكنتور جبت جيس انداريت عليها دتباوعلي مستغربة
- شدسوي شنو هذا !؟
- اششش نصي صوتج
وكمنا نحجي بهمس اني وهي
- ليش انصي اصوتي !؟
- افتحي العلاكة شوفيها
- امممم
لااااا !! ههههه صدك تحجي !!
نساتل !؟
- اي نساتل تحبيهم
اعرف هنا اكلهم مطيب جربتة ويا امي طعمة مينجرع
- هههههه اذا عرف الدكتور يشنقني
- منين حيعرف منكلة لا اني ولا انت
اششش على كيفج من تفتحيها
- اااييي مدنفتح
- شو جيبي اظل اعلم بيج
كل شي عرفتي تسوين من كبرتي الا هالسالفة
متعرفين تفتحين غلاف
- انت علمتني ع الدلال غير
- اي صحيح
يلة اكلي بس مو تطمعين
- لاء ما اطمع
دتاكل وفرحانة بطعمها ورجعت لمعة عيونها وضحكتها وهي تباوعلي وعبالك طفلة ابوها جابلها شي وياه
- فريد شلونها خالة ؟ خما عرفت بية ؟
- لا متعرف شي بس كتلها جاي لهنا شغل اصلا اذا عرفت بيج تنقهر كلش واخاف لا تتاذى
- شكد مشتاقة احجي وياها وابوسها
- تحبيها ؟
- اي والله هواية عبالك امي الثانية
عادي نحجي وياها تلفون ؟
- لا لان هي تحس عليج وانت صوتج تعبان مبين عليج مريضة يعني
فاني راح ابلغها بسلامج منا لحد متطيبين
- خوش
زين اكلك شلون عايفها وحدها
- مو وحدها وياها ممرضة وحطيتلها فلوس ورتبت وضعها وجيتج هي الحمدلله زينة بس للامان حطيتلها ممرضة احسن
- زين سويت
- كافي اكل اكلتيها نصها ترة
- طيبة طيبة كلش
- عافيات بس هاهية باجر هم ناكل منها اني وياج
- هههههه ليش تنصي صوتك من نحجي على الاكل
- ولج اذا لكفونا حنديح اني وياج متعرفين شلون دخلتها وياية عبالك مهرب مخدرات
- هههههههه فريد تتذكر من جنا نختل شغلات على اهلنا
- اي اتذكر طبعا هي هاي تنسي عود نضم عليهم الورقة اذا ٩ من ١٠
- اي اي تتذكر من لكفتنا امي شسوو بينا
- شسوو ؟
- شنو نسيت !؟
كالولي بعد متشوفين فريد ولا تلعبين وياه وحننقلج غير مدرسة وانت هم خالة كالتلك متلعب وياها
- وبعدين !؟
- لعد ليش تكول ما انسى !
- دكملي
- عشنا بقلق وقتها كمنا ندرس هواية وبالصف نتشاوف ونكتب واجبنا ونراجعة سوية واول منستلم درجة حتى لو ٨ هم نكللهم
شكد خفت بوقتها لا صدك ما العب وياك وظليت ابجي
- وبعد شتتذكرين ؟
- اتذكر من غشيت انت بالمتوسطة واجيت كتلي اني غشيت حتى اخفف عنك الضوجة كتلك اني هم غشيت وانت ظليت تضحك
كتلك ليش تضحك كتلي هو انت تعرفين شنو يعني غش
كتلك لا بس شفتك غشيت كلت اني هم اغش وياك هههههههه
بوكتها متنا ضحك وين يالا افتهمت معناها
- وبعد شتذكرين ههههه
- هواية شغلات
مرات اتذكر من ردت اسوي مثلك عود اني لاعبة كرة قدم وردت اتحداك دااركض ووكعت على ايدي صار بيها التواء بالمعصم
- لا ما اتذكر هاي شسويت اني بوقتها متتذكرين !؟
- رحت لفيت ايدك بالربطة البيضة مال خالة كتلي باعي اني هم ما اعرف العب الا لمن اطيب صرت مثلج وصدكتك عبالي انت هم هيج مثلي واكع 
- صحيح
وهسة همين اني ما اعرف العب بدونج
- شتلعب !؟
-العب بهاي الدنيا
مو انت تكولين الدنيا مثل ملعب الطوبة كلها تركض ومحد يفوز الا اللي يوصل للهدف وياخذة بتعبة 
- اي فعلا هي هيج
- لهذا السبب اني خليتج تحجين عن هالذكريات لوحدج ومكلت ولا اي شي برغم مناسي ولا تفصيل صغير حتى لو ما بي معنى
حتى انت تكولين انه اني وياج على الحلوة والمرة ومثل ما جنتي اتساعديني جنت اساعدج وما فد يوم خلينا ببالنا انه احنا دنسوي هالشغلة علمود الشفقة او علمود واحد يتذمر من اللاخ مثل مكلتي اليوم
دارت وجهها ع الشباك ونزعت الكلاو اللي جنت لابسة براسي صحتها وباوعتلي باستغراب وعيون مفتوحة وسدت حلكها بيدها
- ليش هيج سويت بشعرك !؟؟؟
- ادري اخرع صرت هو اني اصلا ما انشاف نوب هيج سويتة ههههههههه
- ههههههه عزة مدا اصدك
- شنو المتصدكي
در اني وياج بكل حالاتج وسويت هالشي علمودج انت لان ما احب تعيشين لحظة وحدة اني مو وياج بيها ولا اثنيناتنا نفس الشي طبعا ما عدا اللحظة اللي اكلتي بيها النستلة ومنطيتيني منها هاي سامحتج بيها هههههههه
- هههههههههه
حضنتني وبست راسها ونزعت الكلادة اللي جنت لابسها بيها حلقتين من زمان مشتريهم جنت ناوي بعيد ميلادها اقدمها الها بس مصارت فخليتهم بزنجيل بركبتي واني كلي امل تكون بيوم الي وتحبني مثل ما احبها
رجعت طلبت منها تتزوجني وقبلت وهالمرة الفرحة ماليتها بدون تردد اخذت الحلقة مني ولبسناها سوية بس حلقتها جبيرة صايرة كلش رجعتها بالزنجيل ولبستها بركبتها و كمت ضميت الجيس وفتحت الباب من القفل ورحت يمها بقينا كاعدين ع الفراش وهي بحضني ...