ع الهوى

٨

#ع_الهوى٨
Shahd Alsalman
بعيونها لمعة دمعة خفيفة من كتلها هيج وقررت اكمل كل كلامي اللي بداخلي اريد ارتاح منة
-جنت صغير واحس ما اعرف العب ولا ادرس ولا اكل ولا اسوي شي الا وياج
وما انتبه للوقت الا لمن امي واهلج يكللولنا يلة وكت النوم وكافي لعب واضوج من تروحين لبيتكم واني اروح لبيتي
بعدين من كبرنا شوي صرت احس شي اكبر تجاهج
بس سمعت مرة من المرات امي تحجي ويا جوارينا وتكللها لا هذا ابنج هسة يسوي سوالف هيج لان هذا طيش شباب وجانت امي تقصد ابنها للمرية لان من عمري و كل يوم يريد يعرف وحدة
وكفت يم كلمة " طيش شباب "سالت بيها بطرق غير مباشرة كالولي يعني مثابت على راي وميدري هذا اليسوي يكمل بي لو ميريد لو بس لان هو بمرحلة مراهقة
لكن كبرت اكثر صار الشعور اكبر ومن دخلنا كلية ويا اول مشكلة واجهتنا حسيت بعد خلص اني واكع بحبج واريد احميج حتى من علاقتج بية
حياتي واكفة عليج وصدكيني ما فد يوم جذبتني بنية غيرج ولا اتذكر وجوه اللي يداومون ويانة كل الوجوه بالنسبة الي وجهج ؛
خلت ايدها على الميز وركزت بكلامي اكثر ونزلت عيونها على ايدها وكملت كلامي
- جانت اصعب شغلة علية من تكليلي اجوني خطابة وناس احس روحي تريد تطلع مني واعصب وما اريد ابينلج شي واتحجج انه اذا تزوجتي معناها منبقى اصدقاء ولا مقربين والحقيقة انه اني ما اكدر اتخيلج لغيري ولا اكدر اكون لغيرج
اذا تتذكرين يوم اللي نصبتي علية من كتيلي استاذ محمد رادني لابنة
تدرين بيومها ردت افوت اكتلة للمدير واللي اذاني اكثر شفت عيونج فرحانة مكدرت اميز شقاج من الصدك بحيث من عرفت هو عندة بس بنات حسيت هم وانزاح مني كلش بس بقى بية هاجس الخوف انه غيري يحصل عليج ويحبج او يتقدملج
در ما اعرف هسة شنو تحسين وما اريد كلامي هذا يجبرج على شي بس كل شي حجيتة من كلبي كلتة الج مشاعري وحبي صادقين وياج كل اللي اتمناه هو انت وسعادتي وتعاستي بيدج
لزمت ايدها وباوعت بعيني نزلت دمعتها تريد تحجي بس احس الحجي مخنوك وميطلع كل اللي كالتة الي تكدر ترجعني للبيت
استغربت من طلبها حتى معلقت على كلامي و لا كالت شي
-اني ضايقتج !؟
- لا بس اريد ارجع البيت
- مراح تردين على اللي كلتة ؟
- شتريد اكلك ؟
- ما اعرف !
ارفضي ، اقبلي ، افرحي او عصبي مني
- فريد
-در قبل لا تحجين
انت من حقج ترفضيني بس اريد منج تفكرين
و لا تتخيلين حيتغير شي اذا مقبلتي بحبي او متحملين الي نفس المشاعر
- راح تتغير هواية شغلات انت هسة سويت شي كلش صعب مراح اكدر اتعامل وياك على انك صديق وبس
-باوعي
كامت من مكانها ووكفت اندارت للشط وكمت وكفت وراها
- انت باوعني فريد
اللي بيناتنا اكبر من انه اخربة بالحب واخليلة حدود واقيدة بزواج او مشاعر
-بس هذا الزواج والحب حيكبرها لمشاعرنا ليش متخيلة كل شي حينتهي
- الحب يقتل كل شي واني ما اكدر على هالموضوع اسفة
اندارت حتى تمشي وتعوفني رجعتلها خطوتين ووكفتها لزمتها من ايدها وباوعت لعيونها
-انت متحبيني ؟!
در يعني معقولة مالي شي بكلبج
- فريد احبك
كلش احبك
بس مو هالحب اللي انت تريدة او تحسة مو هيج ابد كل شي بداخلي الك مستحيل يتغير بس ما اكدر
- ليش فهميني
- هاي الامور ما تنفهم ولا تنقاس بالعقل ولا الها سبب
مثل ما انت تحبني بلا سبب اني هم عندي هالمشاعر الك بلا سبب ومراح اكدر احبك واعلقك بية
- فكري
صدكيني ما اكدر بدونج وحياتي وكل مستقبلي واحلامي واكفين عليج انت
- كمل حياتك وانسى هالشي واتمنى نرجع مثل اول بدون حب وبدون تعلق ولا امل
- ماشي
امشي نرجع البيت وانسي كل شي كلتة الج
- صدكني هذا احسن الي والك لان
- بدون لان ولا مبررات الله يسعدج ان شاء الله
- فريد
- يلة در امشي نرجع
صعدنا بالسيارة واثنينا ساكتين بس كل واحد منا افكارة واحاسيسة معبية هالسكتة واحس كل شي بية متحطم
بحياتي محسيت هالاحساس واني كاعد يمها
اليوم حسيت عبالك بيناتنا الف ميل والف مدينة
المسافات اللي تبعد ارواحنا اكثر بهواية من المسافات اللي بين اجسادنا
ما اعرف شلون اوصف انكساري منها وما ادري هذا يا قلب راح يقتنع هي محابتني او حيسكت اذا كتلة لا تكول احبج
شلون راح ارجع اكتم شعوري اللي جان  خانكني وشكد ممكن انتظر حتى بس المح بعيونها الحب الي بدل الحزن اللي ملاها
يوم على يوم يمر وهي تذبل اكثر صح تمشي وتتحرك وتشتغل وتضحك وتسكت وتسوي كل شي بس عيونها فاضحتها بيهن
الم و حزن
كامو يحسون علينا بالدوام ويسالونا شبيج وشبيك مكمنا نتصرف مثل قبل و زاد الجفا بيناتنا وتمنيت بكل ساعة بعد بيناتنا لو محاجي ولا كايللها احبج ولا رايد منها تحبني
وهسة لو يرجع الزمن بية واعرف هذا اللي حيصير جان اختاريت ابقى ساكت ولا اخسرها كل يوم بهاي الطريقة ..

التصويت ضعيف جدا مديشجعني ابد 💔