ع الهوى

١٤

#ع_الهوى١٤
Shahd Alsalman
طلبنا المدير باجتماع مستعجل وكال اكو تغييرات حتصير رحنا كلنا ع الساعة ١٠ بغرفة الاجتماعات وانتظرناه يجي كعدنا كل واحد على كرسيه ايسر صار يمي و در كعدت كدامي بس متباوعلي واني اباوعلها لمن تندار او تدنج جنت المح شي متغير بيها بس ما اكدر اميزة شي مخلي داير مدايرها مثل هالة سودة مليانة غموض 
ضحكت بيني وبين نفسي على شي حسيتة الها وهي غركانة بحب غيري بس المصيبة الاكبر اني بعدني احبها واريد تحس بية واتمنى لو يصير شي يرجعنا سوة وما اخسرها لكن تبقى هي امنيات ..
اجة استاذ محمد وسلم علينا
- بداية حاب اشكركم على كل مجهودكم البذلتو بهاي الفترة وكل التعب التعبتو حتى تكبر هالاذاعة ويصيرلها صيت
كل شي سويتة ما نجح الا وياكم وبيكم
واليوم اريد ابدل شوية امور وتخصصات
- شلون تبدل تخصصات استاذ ؟
- يعني كل واحد يجرب يلزم مكان الثاني لفترة معينة وهالشي حيخليكم تكتسبون خبرة اكبر
- زين وشنو الترتيب الجديد المقترح ؟
- احمد بمكان ايسر
نادين بمكان صلاح
شفاء مكان زينة
فريد مكان كمال
رافع مكان سليم
ديما مكان دعاء
ميادة مكان علاء
محمد مكان سيناء
- استاذ ودر ؟
- در اخذت اجازة طويلة وراح تبلش من اسبوع الجاي بيها
لهذا اريد منكم تبقون بنفس الهمة واكيد اذا شفت نحتاج مذيعة مكان در حعين بس اني اعرف محد يعرف ولا يكدر ياخذ مكان در
- اشكرك استاذ محمد
ومدام احنا كلنا هنا اتمنى تبروني ذمة وتسامحوني اذا قصرت وياكم او ضوجتكم بحجاية
- ليش تحجين هيج حبي ؟
- يعني اجازتي طويلة وحسافر اكمل دراسة برة ولازم نتبارى الذمم
- اوي عفية در لا تحجين هيج استاذ ليش وافقتلها والله منكدر بلياها
- ان شاء الله ترجعلنا سالمة عن قريب
- شكرا استاذ
عيوني على در نزلت دمعتها واني مستغرب بهيج اجازة ومستغرب اكثر من كلامها و طريقتها كانها دتودعنا بلا رجعة واول مرة اعرف عدها طموح تكمل دراسة
اجتي عيونها بعيني حسيت تريد تكلي شي بهاي اللحظة
استاذنت هي من الاجتماع وطلعت ؛
ورة دقايق خلصنا ورحت للغرفة لكيتها دتلم بالميز مالتها وتخلي اغراضها بالكارتونة كعدت ع الكرسي بعدين كمت وكفت يمها
- صحيح حتسافرين ؟
- اي
- صدك حتدرسين ؟
-اي
- وشكد اجازتج ؟
- اجازتي طويلة يعني اكثر من ٥ شهور
- ٥ شهور !؟
- اي
- ليش مكلتي !؟
- صارت بسرعة
- قصدج اني مو مهم اعرف
- لا
بس عادي اجازة وما حنت متوقعة يوافقلي عليها والسفر صار بسرعة اوراقي انقبلت هم بسرعة
- ايسر يدري !؟
-اي يدري
- ههههه
يعني من يمة ما صارت بسرعة !!
هيج صفينا اغراب !
.... -
- تبجين !
يوجع هالشي مو ؟
تشوفين اعز اثنين يصيرون اغراب
ولا كأنه جان بيناتنا ذكريات ولا كضينا كل عمرنا سوية
تدرين در اني برغم اللي صار بس متخيلت فد يوم نوصل لهاي المرحلة جنت اتذكر كلامج من تكليلي حتى من اموت حنموت سوية لان ما اتخيل اعيش حياة ثانية ما بيها فريد
تتذكرين هذا الحجي مو ؟
- اي ومناسيتة واتمنى لو ..
- تتمنين يرجع كل شي مثل اول بس كل شي انكسر
- سامحني فريد
- بأي حق اسامح ؟
- بحق طفولتنا ومراهقتنا وسنين حلوة عشناها
بحق كل شي صار ويانة وكل موقف ضحكنا بي
بحق ايام ما ممكن تتعوض ولا تكون احلى منها
يكفيك هالحق لو احجي اكثر ؟؟
- سنين انعاشت واحنا سوة واجينا من نكبر نخرب كل شي انبنى بيناتنا
وضحكنا سوا صح بس هسة كل واحد راح يبجي وحدة
بس اسامحج بحق واحد
- شنو هالحق !؟
- لان انت در
لان كل ايامي حتصير بدون طعم بلياج
و لازم انسى كل شي بس ابقى عايش بذكريات
- اتمنى اكون تركتلك ذكريات تكفيك وتسعدك متعيشك بتعاسة
- اذا معشتيها وياية مراح اكون سعيد
در ... ابقي لا تروحين
- لازم اروح ولازم تعرف بهاي الدنيا كل شي الة نهاية
- وهاي نهايتنا !؟ بهاي الطريقة !؟
- مجبورين
- ليش مجبورين !؟
ايسر عندة شي عليج ؟
هددج بشي حتى تروحين وياه
- اني مرايحة ويا ايسر اني رايحة لوحدي
وماكو شي من اللي ببالك
- ااه منج
- لا تتحسر
ولا تنساني فريد
لا تحسسني اني مجنت مهمة
بالنسبة الية حتى لو منعتك تحبني فاني مستحيل انساك ومستحيل احد حيعبي مكانك بكلبي
- انساج !!
انت انفاسي ، كل شي حلو بدنيتي
ما عندي غيرج وغير امي
بلياج هذيج الفترة عشت بجحيم لا تخليني اخسرج؛
زين ؛ شوفي ارجعيلي حتى لو صديقة او خليني اكرهج وانت قريبة مني وكدامي ولا احبج وانت بعيدة وما اشوفج الله يخليج در
- اسفة 
لزمت ايدها وخليتها على صدري وعيونها مليانة دموع وانفاسها صارت عبارة عن شهكات بجي
- حسي بدكات كلبي شوفي شلون يدك يريد يطلع من مكانة ويخليج بي يحبسج بداخلة
- والله مو بيدي لازم اروح
- ليش لازم وليش مو بيدج شلون اخليج تتراجعين شلون اخليج انت تسامحيني على كل شي صار او اعتذرلج حتى تبقين
جرت ايدها من ايدي واخذت جنطتها و تريد تطلع تقدمت كم خطوة واندارت علية فتحت ايدها ورحت حضنتها دموعها اختلطت بدموعي و ايدي متريد تهدها وهي متتحرك كأنما تريد تشبع من ريحتي وحضني
- فريد اني احبك فوك متتخيل
انت اول واخر انسان كلبي يحبة بس ..
- ابقي در ميخالف راضي بحبج هيج ما اريد اكون حبيب
ابقي وياية
- دير بالك على نفسك
سحبت نفسها مني وطلعت تمشي بسرعة وخلتني بنار دموعي والم احساسي بجرح ما ممكن يطيب بيوم ...