ع الهوى

٣١

#ع_الهوى٣١
Shahd Alsalman
فد يوم جماعة من اللي احمللهم بضاعة كالو نجيب من اوربا فلان نوعية وفلان منشأ لمعت براسي فكرة اسافر واهاجر برة واترك كل شي بس الفكرة صعبة على واحد مثلي واصلا بلا هدف
حجيت ويا الرجال وكتلة ساعدني توسلتة وطلبت منة يهربني لان ما عندي فلوس كل اللي املكة اكل بي يا دوب يكفيني و مرات ما اكل
كالي خير ان شاء الله وذاك وجه الضيف ولا شفتة بعد الا ورة كم يوم مدري اسبوعين بوكتها كل شي جان بعيني متشابه والايام بالنسبة الي مثل اخوة توائم ما افرقهم
كالي لكيتلك مهرب بس لازم خلال ٤ أيام تروح ما تبقى هنا سالتة ع الفلوس وكالي هاي علية بس تقرة فاتحة لوالدي كل يوم
هزتني حجايتة اني وين وهو وين يفكر بابو المتوفي يسويلة صدقة جارية
واني جان كبال عيني و اعاندة واوجع كلبة وكسرت كلمتة وتركتة
صار موعد السفر وقبل لا اسافر خابرت اهلي وحجيت ويا امي وطلبت منها تسامحني على كل شي هي وابوية  ومرتي ومتكول لاحد اي شي عني
مكالمة مدتها كم ثانية بس ريحتني لمن كالت مسامحتك والله يوفقك
سافرت برة  لالمانيا وهناك طلبت لجوء والعذر جان انه اني ملاحق من قبل النظام هيج علمني المترجم احجي حتى احصل اللجوء
وحصلت لجوء واقامة واكيد مجانت حياتي سهلة تعلمت كل شي بصعوبة لغة وعمل وطريقة تعامل الناس
من بعدها نصحني رجال من اللاجئين حتى اكمل دراسة وهناك يحترمون ويقدرون اي احد يدرس مجنت مقتنع بالشغلة بس شوية شوية اتقبلت الفكرة و درست وهمين جانت صعبة بس ويا الوكت ووجود زملاء عرب واجانب حسيت نفسي بديت اتغير نحو الاحسن
ودرست الطب وتخصصت بالامراض السرطانية لان اعتبرت كل شي بحياتي سويتة جان مثل مرض خبيث فتك بية وبعائلتي وحلفت من ساعتها اشتغل على نفسي وادرس واطور ابحاثي في سبيل انقذ ارواح العالم وبنفس الوقت انقذ نفسي من احساسي بالعذاب وتانيب الضمير تجاه كل شخص اذيتة واولهم اهلي اللي مكدرت اتواصل وياهم مجانت اكو هيج تكنلوجيا وتطور ووسائل اتصال وحتى لو اكو فاني اريد اسوي شي يفتخرون بي كدام الكل وكدام نفسهم بالدرجة الاولى يالا ارجعلهم
لكن مشيئة الله سبقتني واخذ اهلي لعندة وعرفت الخبر من صديق قديم بالمنطقة جان جاي تجارة لالمانيا وبلغني هاي الاخبار بس مجان يعرف اي شي عن امك ولا اي تفاصيل غير وفاتهم
مشت بية الايام واني عايش لوحدي مكدرت اتزوج من جديد ولا اكون عائلة صرت دكتور ناجح وابحاثي ماخذة مركز اول
ومع هذا كل اللي كتلة الك ونجاحي العملي ميساوي الا صفر لمن اتذكرهم
هذي قصتي واذا تسالني ليش مرجعت حكلك لان مالي عين
احجيها بصريح العبارة اكو ناس تتقبل وتمشي كل شي صار عادي واني مو من هالناس مع الاسف
ف يا ابني اعذرني على كل هالسنين وانطيني حق ولا تلومني وتزيد عذاب ضميري اكثر واكثر كل شي بحياتي جان واكف ويوم اللي عرفت بيك ابني تمنيت اخذك لحضني وكلت الله سامحني و دزك الي مكافأة لان مشيت عدل واحترمت نفسي وصلحت كل اغلاطي السابقة ...