ع الهوى

٢٥

#ع_الهوى٢٥
Shahd Alsalman
مجنت متخيل حجم الم اهل مريض السرطان شكد جبير
على كد ما هو يتالم اهلة يتالمون اكثر منة وعلمتني امي من اشوف احد مريض او متوجع اردد هذا الدعاء
  " الهي ارحم نفوسا انت اعلم بحالها "
تقرر يوم عملية در يكون الثلاثاء الصبح وهيأها الدكتور نفسيا و جسديا الها بس هي خايفة كلش وجانت تبجي هواية متريد تسويها وتموت تريد تموت بشكل طبيعي
واكيد احنا من نسمع كلامها ونحس بخوفها ننهار بس نمثل كدامها القوة ونبسط عليها موضوع العملية و هو اعقد من انه يتبسط
عفناها تنام وترتاح وطلعنا برة اني واهلها كعدت ع الكرسي مدنج وحاط راسي بين ايديا و سمعت صوت ايسر يسلم علية
رفعت راسي حتى ارد السلام وشفت كل الاذاعة جاية المدير وزملائنا واصدقاءنا وشكو احد يحب در مصدكت عيوني كمت وسلمت عليهم وكالولي احنا جينا حتى نوكف وياها ونبقى يمها  بالعملية
فرحت لان حسيت بمحبتهم الها واعتقد هالجية حتفرق وياها وتشجعها حتى تقاوم وتعيش وتسوي عمليتها وهي مرتاحة
عرفتهم على اهلها وكعدنا ننتظر شوكت تصحى من النوم
فتت عليها وهي فتحت عيونها
- شلون صار حبيبي الحلو ؟
- الحمدلله
- حتنامين بعد ؟
- لا تعبت اريد اتمشى
- اي يلة علواه كومي امشيج
- يلة
كومتها لبستها غطا راسها وجاكيت وسندتها علية وتمشينا خطوة بخطوة لحد ما وصلنا الباب وتفاجئت بشوفة زملائنا مجانت مصدكة عيونها البنات حضنوها والولد واستاذ محمد سلمو عليها وبدل ما اخذها اني للحديقة هم اخذوها واني وراهم
كعدو سوية وكامو يحجون وياها ويضحكوها وهي اندمجت وياهم كلش حتى ضحكتها صارت عالية
وراها صار العصر كالو حنروح للفندق نرتاح من الطريق وهي هم نامت تشكرت منهم اني واهلها لان محد يسويها هسة الا اللي كلبة طيب ويحفظ العشرة والملح و الزاد
رجعو اهلها همين وبقيت يمها مثل كل يوم و فكرت هواية حد ما غفيت
فتحت عيني حسيت دتكعدني كمت كلش مخروع
- شبيج حبيبي ؟؟؟ شيوجعج!؟
- ما بية شي كلبي لا تخاف بس ردت اكلك شي
- شنو
- اني احبك هواية
- واني احبج اكثر
- راح اسوي العملية واقاوم هالمرض بكل قوتي وارجعلكم
- متاكدة ؟ توعديني !؟
- اوعدك حبقى اقاومة علمودك
- هي هاي البنية الحبيتها قوية وميهزمها شي ولا تخاف
- ما اريد اموت هسة اريد اعيش باقي عمري وياك كلة حتى لو جان سنة
واريد ارجع لبيتي واهلي واشوفهم متطمنين علية
واريد ارجع لشغلي عندي هواية طموحات واحلام محققتهم لهسة
وارجع لاصدقائي حتى للمستمعين
- راح ترجعين ان شاء الله بس خليج قوية ولا تترددين ولا تغيرين كلامج
- ما اغيرة اني مصرة ومراح يوكفني شي الا اذا الله راد ياخ....
- لا تكوليها ان شاء الله تعيشين
حضنتها قوي وكتلها تعالي نامي يمي ومن تجي الممرضة تكعدج عود و روحي وافقت بلا تردد وغفينا باحضان بعض بس غفينا مرتاحين بسبب كلامها
اكيد جيتهم اثرت بيها وخلتها تتمسك بالحياة اكثر ..
صار يوم العملية وكلنا نمثل عليها الابتسامة والشجاعة وهي صح خايفة بس احس بيها امل ونشاط كلش جبير
سلمو عليها الكل واهلها وعافونا وحدنا اني وياها اباوع عليها وتباوعلي ما اكدر اخليها تسويهاولا اكدر ابقيها هيج كبال عيني تموت
- فريد اتقرب ليش بعيد
- اني قريب وهاي صرت بحضنج حبيبي
- لا تخاف حرجعلك
- در اموت بلياج
- لا تبجي حبقى وياك واذا تبجي حخاف اكثرومراح تنجح العملية
- لا لا ما ابجي بس لان مشتاق لحضنج هيج بجيت
- ابقى مشتاقلي حتى من تخلص العملية نكمل هالحضن
- حنتظرج حبيبتي انت
- يلة روح صيحهم خلي ياخذوني اريد اخلص من هالمرض وارجع طبيعية
- ان شاء الله ترجعيلي بالسلامة يا عمري
رحت صحت الممرضة وحضرتها للعملية فاتت لصالة العمليات وهي تضحك وتبتسم واول ما انسدت الباب كمنا نبجي
اجة الدكتور و كال ادعولها وراح نبدي بالعملية واخذني على صفحة
- ابني اني بعدني عند وعدي الك شنو اكدر حسوي ما اقصر
- شكرا دكت..
- لا تكول دكتور
كول بابا
.... -
- على راحتك بس انت ابني واني حبقى منتظرك بلهفة
يلة روح ادعيلها ولا تبجي ابد
حسيت بحاجة احضنة واشكيلة واظل ابجي يمة اعرف هو يريد يتقرب مني بس حسيت هالشي صعب علية
ساعات من الانتظار المميت مثل واحد مجروح وديتصفى دمة شوي شوي ينهد حيلة وميكدر يتحمل اكثر ولا ينتظر بعد دقيقة زيادة
كلنا واكفين على اعصابنا
شفاء جانت توثق هالحدث بالصور وايسر يمنعها ويطلب منها تبطل بس جان جوابها كلش يريح كلبي من تكولة باجر نضحك على هالصور ونكعد نسولف بيها ويا در من تتشافى ان شاء الله وترجع بيناتنا
طلعوها على السدية وكلنا نريد نشوفها بس اخذوها للعناية المشددة وطلع الدكتور بعدها
- دكتور طمني عن بنتي شلون العملية
- ابو در سوينا كل العلينا والباقي على الله
واكدر اكللكم العملية نجحت بنسبة ٧٠ % وبعد ما تصحى حنشوف النتيجة بشكل اوضح من خلال التحاليل
ارتاحو هسة لان هي حتبقى بالعناية لحد ما تصحى وشوية تطول
عن اذنكم
شكرناه كلنا وانملت المستشفى بفرحتنا بكلامة واحضاننا واصواتنا ..