ع الهوى

٣

#ع_الهوى٣
Shahd Alsalman

اكيد ظلت الحزازية بين فريد وايسر لحد نهاية السنة الثالثة يعني بيوم استلام النتائج ..
اتصلت زينب علية وكالتلي اليوم حينطون النتائج وبدوري خابرت على فريد و سمر
وفريد دك على صالح وباعتبار صالح خطب وديان بنص السنة فكال راح اجيبها وياية واتفقنا نتلاكى بباب الكلية ،
اتشاوفنا والتمينا بس لمة كلها توتر وقلق هذي النتيجة اللي حتخلينا نتأهل للتخرج مشاعر الخوف والامل والثقة بجوابنا بالامتحانات اختلطت كلها وواحد يدعي للثاني ينجح
فتنا حتى نشوف اسامينا معلكة على لوحة الاعلانات وطبعا بصعوبة فتنا بسبب ازدحام الطلاب
صالح كال اني حفوت واشوف
اول اسم ناجح جان اني وبعدي سمر
وزينب وفريد ووديان وانتظرنا صالح وكالعادة ناصب علينا وهو ناجح شعور مينوصف من يتكلل التعب بالنجاح ومثل السنتين القبلهم قررنا نحتفل
حدددنا مطعم وانقسمنا مجموعتين بسيارة صالح وسيارة فريد
مشينا خطوات قريب باب الخروج وكل واحد بينا ملتهي بتلفونة يتصل يبشر اهلة بالنجاح ؛
اتذكر اخر شي شفتة جان تراب قوي كلش يشبه الاعصار وصوت عالي حيل وانشمرت على طلاب وراها غمضت عيوني ممستوعبة اللي صار
بدت تصفر اذني صفير كلش مؤذي حاولت افتح عيني بس كل شي كبال عيني عبارة عن دخان وسراب وشي مو واضح
رجعت لوعيي وانتبهت لايدي بيهن جروح ودم والطلاب متمددين بالكاع قسم مغمى عليهم وقسم مجروحين وقسم يبجون ويصيحون
دورت على فريد والبنات وصالح مدا اركز على الوجوه لان كلهم متاذين
كمت امشي بقلة توازن وما اعرف كم جثة وجسم دست عليهم و عثرت بيهم بالغلط انتبهت لوديان وصالح بنفس المكان بس صالح حاضن وديان لان شكلها متهسترة بالبجي ومجرحين
حاولت الكى البقية بس مدا اكدر اميزهم كمت اصيح فريد لا شعوريا ابجي وارجف واعيط بصوت عالي باسمة
شكد صعبة هاللحظة جانت علية حسيت خسرتة وراح مني بهاي الساعة
و على كد ما اعرف غلاتة لفريد على كد ما زادت اكثر واكثر
من انداريت وشفت الاسعاف والناس تحاول تساعدنا لمحت ايسر
ما ادري ليش صحتة حسيتة هو اللي حيعيني على هاي المصيبة صحتة وركض باتجاهي
-ايسسسررر
- انت زينة ؟؟
-ايسر فريد ما اعرف وينة
ساعدني
-فريد وين جان
-يمي يمي جان جنا نمشي كلنا
-در امشي وياية خل اوديج للسيارة و ...
- ما امشي الا وفريد وياية
يااا الله فرييييد
عفتة وظليت افتر بين العالم حتى المحة
وكمت احس ببرودة وحرارة بنفس الوقت
شي يمشي من يم خاصرتي لحد ظهري
- در تعالي هياتة فريد لكيتة تعالي
ركضت  باتجاههم وصار احساس الحر والبرد عبارة عن وجع يمشي بجسمي كل ما اتقرب احس انفاسي تتكطع هي كم خطوة بس عبالك ماشية طريق حيل طويل
اول مشفتة جان ايسر يحاول يرفعة حتى يشيلة
فريد متاذي هواية ومجروح ومتصاوب ساعدتة وكالي اروح كدامة افتح باب الورة فتحتها وصعدناها ودموعي ما وكفت مكدرت اشوفة بهيج حالة
صعدت يمة وايسر جاب بعد طلاب اثنين شبه صاحين وصعدو ويانة حتى نسعفهم وكام يسوق بسرعة للمستشفى
بالطريق احاول اصحي لفريد ميصحى واغمى على الطالبة الويانة
واني كمت اتوسل بايسر يسوق اسرع
وصلنا المستشفى واول ما نزلت صحت اني وايسر على سديات وكنالهم حالات انفجار
بينما اجوي واخذوهم دخلو فريد والطالبة عمليات والطالب الثاني للتضميد شوية حالتة احسن
واني بقيت ابجي ووكفت يم الباب اريد احد يطمني علي كمت اتنفس سجاجين مو هوا واوكسجين وحسيت بتعب رهيب
اجة ايسر باتجاهي
- در امشي دنداويج شوفي ايدج شصاير بيها  ووجهج
-ما اروح الا يطلع فريد
- ليش العناد فريد هم دخل يتعالج وهسة يكوم من العملية بالسلامة
يلة عيني امشي
-ما اكدر ... خليني ..هنا
-در شبيج
در در
حسيت اريد انام واني واكفة وصوت ايسر صار بس صدى و اختفى حتى هو صار شي اسود بعيوني و حسيت انضربت بكاع او حايط ما اتذكر ..

كمت من مكاني ليم فريد حتى اشوف شلون صار بس هو جان  نايم ع السرير وجسمة مربوط باجهزة تنفس خفت احجي وياه واكعدة كمت ابجي بصوت ناصي كلش وخليت ايدي بين وجهي ومسمعت الا صوت نبض كلبة وهو يوكف
ركضت بسرعة حتى اصيح الدكتور واجة ايسر كالي تعالي تعالي ويبجي وياية
حسيت بي يريد يبعدني عنة وطلعني من الغرفة بقيت انتظرة برة وطلع الدكتور ولونة مخطوف كالي البقية بحياتكم
مستوعبت مدري مسمعتة زين
طلبت يكرر اللي كالة ورجع عادها توفى الله يرحمة وبقية بحياتكم ..
ما اعرف ساعتها شنو جان صار لو ما اكعد من هالكابوس الفضيع
لكيت نفسي بغرفة وحدي اريد بس احد احجي وياه وجسمي كلة يوجعني مدري من الابر مدري من وجع خاصرتي لو حالتي النفسية
فاتت علية الممرضة شافتني كعدت واجة الدكتور
جان اول سؤال قبل لا يبلش يحجي وياية هو عن فريد وكالي صحتة زينة بس شوية جروح وويا الوقت تطيب وبالنسبة الي جنت متصوبة بشظية بخاصرتي وصاير مكانها قريب ع الكلة شوية خادشتها واحتاج كم يوم يالا اطلع من العناية
اتشكرت منة وطلبت يتصلون على اهلي واهل فريد وكالي انه الولد اللي ويانة ( قصدة ايسر) اتصل بيهم وبلغهم وهم برة بس محد حيفوتلي منا لكم يوم علمود جرحي ..