ع الهوى

١٥

صباحكم خير
لا تنسون التصويت واليوم راح انزل ٣ بارتات اذا شفت تفاعل قوي

#ع_الهوى١٥
Shahd Alsalman
عايش بعذاب من يوم اللي سافرت وراحت عن عيوني صار كل شي ضيق علية
الغرفة البيت الشارع حتى السيارة كمت اكرهها
من تدك لايسر ويكلي هي زينة وتسلم ومتدكلي ومن اهلها يتصلون بامي وهي لا
كل شي بحياتي انكلب ١٨٠ درجة حتى شغلي صاير غلط بغلط حاولت اخذ اجازة بلكت اتعود بس مقبل المدير
بعد فترة شهرين تقريبا متحملت اكثر حتى ما اعرف شي عنها ولا اهلها يتصلون ومن تتصل امي متحصلهم
كسرت بكبريائي وسالت ايسر عنها وكالي ما ادري شي عنها بس احسة جذاب يعرف وميكول او ديحس بغيرة مني لهذا سحبت نفسي منة
وحتى البنات ما عدهم علم بشي يخصها ولا اي اتصال اكو بينهم
ضاقت علية الارض بما رحبت مثل ميكولون وشفت احسن حل استقيل واترك كل هالمكان
قدمت استقالتي و رفضها المدير بس تركت  الاذاعة كمت ما اداوم كعدت بالبيت شهر
ويا الشهرين الفاتو واني ما شايفها يعني ٣ شهور
يا طولهم وثكلهم علية
شكد ردت اشوه صورتها كدام عيني وكلبي بس مترهم شي يشدني للحظة الحضنتها بيها لجملة فريد احبك
اذا جانت تحبني ليش راحت ليش حبت ايسر وليش دتسوي هيج مدام اني اول واخر واحد تحبة
اعصابي تعبت وحياتي صارت عبارة عن نوم وانتظار وحتى النوم هم بصعوبة صار علية
رادو يرجعوني لشغلي هواية بس مجنت اقبل هملت نفسي وشكلي ولحيتي صارت طويلة مثل اللي ميتلة واحد ورافع شعار الحداد حتى اشعار اخر
امي بهاي الفترة رجعت تدهورت صحتها وكمت بين اسبوع واسبوع انيمها مستشفى
لحد يوم من الايام وديتها للمستشفى بالليل وجان الوضع اخطرمن كل مرة
طلعت الدكتورة من يمها وكالتلي فوت شوفها تريدك افتهمت منها هاي اخر لحظات بحياة امي
-يوم حبيبتي
- ماما حبيبي فريد انت احلى شي صار بحياتي الله عوضني بيك
- ابقى وياية وين تريدين تروحين
- تعبت يمة ولازم ارتاح وانت تحب راحتي
- لا تكملين فدوة لتراب رجليج
- اسمعني يمة
اوصيك بشغلك انتبه على نفسك وعيش حياتك مرتاح لان اني راضية عليك
تمنيت اشوفك متزوج
-اصحي وابقي وياية وقاومي ومن باجر اتزوج
- جنت اتمنى اشوف عرسك انت و در اعرف لهسة تحبها
وكل اللي ادعي بي الله يرجعها الك وتتزوجون وتعوضك عني  عسى الله يقبل دعائي الكم
- يمة شيعوضج مو كافي ابوية وهي تريدين انت تعوفيني
- سامحني يمة واريد اوصيك توصل لابوك صحيح ما كتلك عنة كل هالفترة بس مجنت اعرف بي وين وقبل لا اوكع هالوكعة دريت هو صاحب مستشفى جبيرة للسرطان بالشمال دورة وروح شوفة هذا ابوك
- ما اريدة
-لا يمة اني مقسيتك ولا علمتك تكره واذا تريد رضاية يدوم عليك  دورعلي
دور علي يوم
-يمة
يمة اكعدي
يوم ارجعيلي يوووم
اجوي الممرضين سحبوني منها وغطو وجهها و عمضو عيونها
ماتت وراحت من بين ايديا
تمنيت اموت بمكانج يا يمة والله ما اكدر على كل هالوجع وحدي ..
دفنتها بيدي لامي وخليت اخر حفنة تراب تغطي قبرها بجيت هواية وانكسرت هواية ومع هذا ما صحت و لا اجتني مثل مجانت تجيني من ابجي واني صغير
اخذوني الولد اصدقائي من يمها بالكوة ورجعوني للبيت اللي انطفى ضواه بعد مجانت هي النور والبركة بي
رحت لفراشها حضنت مخدتها بيها ريحتها بجيت لحد ما طلعت الشمس
ممصدك ما اسمع صوتها الصبح ومن تتلكاني من اجي
مر شريط حياتي وياها كلة من جنت صغير ودخلت مدرسة لحد ما اتخرجت واشتغلت اتذكرت كل دمعة بجتها لان فرحانة علمودي وبسببي نتيجتي وتخرجي ونجاحي بكل حياتي
اتذكرت الايام اللي ضوجتها بيها صحيح هي مواقف قليلة بس حزت بكلبي و تمنيت لو ترجع واصلحها وياها وما اكسرلها كلمة شمتكون حتى لو على اكل ما اكلتة بيوم وتنمردت عليها
اخ يا يمة المن اكول اه لو تحسرت ومنو يقرالي ايات ويحصني ويرقيني بالقران من اكون بضيق
منو حيكلي تعال يمة سويتلك الشغلات التحبها واكل منها اكل يشبه روحها الطيبة ...
فاتت ايام وصارت الاربعين وانعاد علية نفس الالم والوجع والعذاب
صار فوك الم غياب در الم غياب امي
مرت فترة وصارو تقريبا ٥ شهور ردت اطلع من الهم اللي اني بي وارجع طبيعي ع الاقل
زينت لحيتي وكمت نظفت البيت مثل مجانت تعلمني امي ومسحت كل الشبابيك خليت ضوة الشمس يفوت مثل مجانت تحب هي وحتى در تحب الشمس وضواها وخلاني احس بدفو واحسهم قريبين مني وويايا
طلعت الراديو وربطتة بالكهرباء اشتغل وحطيتة على اذاعتنا المفروض بهذا الوقت برنامج در يطلع ابتسمت ابتسامة باهتة على هيج انتظار متعب وعلى صدمات ومآسي ما تعرف غير طريق كلبي
رحت سبحت وصليت وبدلت هدومي وطلعت شغلت السيارة جانت واكفة متتحرك عفتها ورحت تمشيت واخذت تكسي للمحطة
صحيح اني تخليت عن شغلي وعفت كل شي ورة ظهري بس المدير والكل جانو منتظريني ورجعوني وياهم حتى استحيت وخجلت منهم على معاملتهم الي مقابل اللي سويتة من تصرف وياهم
وقررت اندمج ويا شغلي وانسى كل شي فات بس راح ادور على ابوية مثل مطلبت امي مني ...