ع الهوى

٦

#ع_الهوى٦
Shahd Alsalman
مرت فترة وانشغلنا كلش بشغلنا وتقديم الحلقات بس فريد مرة عن مرة يصير مزاجي اكثر واحسة مو مستقر وبدة يضايقني بتصرفات معينة ، مثلا
كلامي ويا زملائي اللي يضحك وياية واللي يحاولون يتقدمون لخطبتي هذا يكرهة حتى لو جان كلش مقرب منة كام يتصرف تصرفات جنونية
بس هالشي حسيتة ديضغط علية وعلى اعصابي كمنا نتعارك او نحتد بالكلام واحد ع الثاني بعدها يعتذر مني ويكلي اعصابي تعبانة حاولت اقنعة ياخذ اجازة بس ميقبل يتحجج بية وشلون يعوفني
و فد يوم كلش ضوجني وبوقتها جنت احس بتعب ضغط علية بموضوع الاتصالات ويا المستمعين
- باعي كتلج هالشي ممنوع
- شنو ممنوع هذا شغلي واذا المذيع ميكون قريب او محبوب او يضحك شنو فائدتة !!
- يعني ترضيها اي واحد يجي يكلج فدوة لكلبج
- فريد كافي انت شنو صايرلك
تعرف كامو يحجون علينا هلكد منتعارك اني وياك
- طز بيهم كلهم
- عيب الحجي هذا انت خريج وواصل ومثقف و....
اتقرب مني وحط عينة بعيني وكام يحجي بعصبية
- اني ولا شي وانسان مبهذل وممنوع بعد تحجين بهاي الطريقة ويا اي متصل والا اخليج بكل الطرق تكعدين بالبيت
- مو صاحي والله
دفعتة بايدي على جتفة ووخرت دااطلع من الغرفة
لزم ايدي وجرني حتى اوكف وصرت قريبة منة ويعصر على ايدي
- تدفعيني لان اغار عليج ؟!
- غيرتك مالها مبرر ولا تنسى احنا بمكان شغل
ودفعتك بسبب اسلوبك
- ماشي در سهلة
- هد ايدي
- روحي ومن هاللحظة حقدم على استقالتي
- قدمها يكون احسن
جنت اتخيل ديحجي هيج بعصبية وممكن يهدى ويسكت
بس تفاجئت من رجعت للغرفة و شفتة ديلم بغراضة وايسر واحمد و نادين وياه
ايسر باوع علية
- يمعودة تعالي محد غيرج يكدر يرجعة
- شكو !؟؟
- الاستاذ مقدم استقالة والمدير مقبل بيها وكايلة حتى لو متقبل اني طالع
- فريد صدك ديحجي ايسر ؟؟؟
- اي صدك
رحت يمة وبديت اوخر الغراض وارجعها ع الميز
- رجعهن لا تتخبل وتتعصب بلا داعي
- يمعود فريد ولك على بختك احنا نديح بلياك
- احمد وخر عني خليني اروح
وخري انت لا تطلعيهم
- فريد بس عاد
عبالك حيهاجر مو ديطلع من الغرفة عافنا ووصل يم الباب واحنا وراه وحسيت النفس انكطع ردت اجر هوا مكدرت وعبالك جسمي تشنج ونمل وبعدها ما حسيت بشي
ومن صحيت شفت فريد و البقية فوك راسي واني ع القنفة ولا دارية بشي
- در شبيج ليش هيج وكعتي
اني اسف والله مو قصدي اضوجج
- شكو شصار ؟
- صارلج ربع ساعة فاقدة وعيج ومتصحين من طلع فريد وكعتي من طولج شبيج حبيبتي
- ما ادري احس بتعب نادين ساعديني اروح اغسل
- لا شتغسلين كومي نروح مستشفى
-لا اني زينة والله هسة اغسل وارتاح يجوز لان مماكلة
- هسة اجيبلج اكل
-فريد لا تروح ابقى هنا لا تستقيل
- لا شستقيل والله باقي بس كومي وصيري زينة
اني اعتذر منج ومن الكل ما ادري شبية عصبي هاي الفترة
كلة من وراية هيج صار وياج
- ما صار شي الحمدلله اني زينة
اسفة خوفتكم
كمت وغسلت وجهي والدوخة مستمرة اول مرة يصير هالشي وياية بس يمكن من قلة الاكل و التعب المتواصل والضغوطات هيج صارت نتيجتها
مرت الايام
فريد رجع طبيعي بس كأنه مخبي كلام هواية بعيونة وساكت حتى لا يتعبني بسبب مرضي افلاونزة قوية واني دا ادوام حتى متجلب بية واطيب بسرعة بس تعبتني كلش لهذا احس بدلال غير شكل من فريد وعلى كولتة ما معقولة معرفتي غلاتج عندي كافي مرض وطيبي عاد وجنت اضحك على حجاياتة .
بعد فترة زاد علينا الشغل كمنا نقدم برنامجين اضافي واحد الي خاص بالاضافة لبرنامجي الاول والثاني مجموعة مقدمين اني ونادين و علي و محمد هلكد ما اتعب اريد بس انام اسبوع كامل
كملنا البرنامج وجنت امشي اني ونادين
-در شبيج حبي اليوم كلش تعبانة انت !؟
-ما ادري والله يمكن مصخنة
-شجاج انت مدتطيبين من الافلاونزة
-لا مو افلاونزة بس يمكن حر وبرد واصلا تعبانة نادين واستاذ محمد مديقبل ينطيني اجازة كل مرة اكولة يكلي لا وخليها
- بس ميصير هيج شو عبالك بدة يطمع بينا حتى احنا مدينطينا مفكة خلي نكلة يجيب بعد مذيعين شوية تتقسم الساعات علينا ونرتاح خما مكينة احنا و حتى مدنكد...
-نادين
-ها عيني
-الزميني
-اسم الله شبيج !!
تعالي اكعدي هنا
-جيبيلي مي حبابة
-لحظة
هاج شربي حبيبي
شبيج در!؟
- ما ادري دخت كلش حسيت اسودت الدنيا بعيني
-اسم الله عليج
ماكلة شي ؟
-لا ما اشتهي بس محتاجة ارتاح
-امشي اوديج للبيت
- يا ريت بس المدير
-دمشي يمعودة يا مدير اني اكلة عود هي كلها ساعة ونطلع اصلا
- يلة
من كمت دخت اكثر ورجعت كعدت
مدا اكدر حبي خليني هنا
-ارتاحي بس تروح الدوخة اوديج
-اوكي
بقيت كاعدة شوية وشربت عصير حسيت نفسي مستقرة وودتني نادين للبيت بسيارتها
واول ما فتت رحت نمت بهدومي مثل الجنازة ولا حسيت على شي كل اللي جنت بحاجتة النوم ومن كعدت لكيت فريد دازلي رسايل بالة يمي وطمنتة كتلة جنت كلش نعسانة محتاجة انام مكدرت انتظرة حتى نطلع سوة وهسة احسن صرت ..