ع الهوى

٩

#ع_الهوى٩
Shahd Alsalman
ايام اعاني من سكوتنا اني وياها و فكرت لوحدي هواية حتى ارجع العلاقة بيني وبينها وانسيها كلامي وانساها ك حب حياتي ونرجع اصدقاء
انتظرتها تجي للدوام لان احنا من يومها كمنا ما نجي سوة للدوام على كد الشغل يكون حجينا واذا صار حجي فاحنا كلنا موجودين يعني بيني وبينها بعد ماكو شي خاص
اللي اذاني اكثر انه هي تعبت بسبب هذا الموضوع متريد تتقرب مني ولا تريد تجرحني وشعوري انه هي بحاجة الي صار اكبر من حاجتي الها
وهاي الايام الفاتت ما اعرف اي شي عنها حتى لبيتهم يا دوب اسلم على ابوها من الباب واروح واعتقد هي فهمتة ليش متروح وياية ولا ترجع من نخلص دوام لان مسالني بس بنفس الوقت معتبان علية ولا نبرة صوتة او نظرتة تغيرت
عيوني ع الباب تنتظر جيتها عدت ساعتين وهي ماكو وايدي ع التلفون اتصل عليها لو ما اتصل اطلع اسمها وارجع اسد التلفون لحد ما دك التلفون وجان اسمها
- الو در وين انت اليوم ؟
- فريد تكدر تجي
- وين انت ؟شبيج؟
ليش صوتج يرجف !؟
- اني بالمستشفى تعال هسة اذا تكدر
- يا مستشفى شصاير وياج
- مصاير لا تخاف بس تعال
- يلة جايج المستشفى القريبة ع البيت ؟
- اي هي
- ماشي
استاذنت من المدير وبلغتة عندي حالة طارئة وحتى لا يدك علية انطيتة كل التقارير ورحت طاير للمستشفى
اول ما فتت شفت در وامها واكفة تبجي
- در شبيكم عمو بي شي ؟؟
- لا
-لعد شنو ؟؟
صاير شي وياج ؟
- فريد خالة تعبت شوية والدكتورة جوة وياها
- امي !!!؟
- يمة جنت احجي وياها بالتلفون كتلها تعالي مريلي نشرب كهوة وكالتلي تعبانة كلش وتعاليلي رحت عليها والباب مفتوحة لكيتها واكعة بالحديقة كعدتها حاولت وماكو صحت در وهي خابرت الاسعاف وجبناها لهنا
- يا الله اني شفتها مو على بعضها من الصبح بس متوقعت هيج
- ميخالف فريد ازمة وتعدي ان شاء الله
هسة تطلع الدكتورة وتطمنا عليها لا تخاف
-صوجي لو باقي يمها
- اجتي الدكتورة
- دكتورة احجيلي شلونها ؟؟؟
- منو حضرتك ؟
- اني ابنها
- تحتاج فحوصات وراح نخليها بالعناية لان عمل الكلة اليسار متوقف تقريبا و صاير ضغط ع اليمنى
وعلى اساس الفحوصات نكمل اجراءاتنا ونشوف شنقرر
- شكرا الج دكتورة
- العفو عدها العافية
راحت الدكتورة وفتت على امي جانت فاتحة عيونها اول ما شفتها بجيت وحضنتها خفت عليها وخفت ابقى لوحدي وتعوفني مثل ما عافني ابوية واعاني مرة لوخ
من قبل لا انولد جانت امي حامل بية وطلكها لان هو مجان يحبها اهلة جبرو عليها وامي وحدانية ما عدها احد تركلها البيت وطلع ومن راد يتزوج البنية الحبها اكتشف انه هي تزوجت وباعتبار اهلة غضبو علي بسبب طلاك امي
وامي هم بعد متكدر تعيش وياه فسافر للخارج وترك كل شي وراه حسب مكالت بيبي لامي
وحتى امي ما تعرف اي طريق الة ومن بعد ما جابتني وصارت ولادتي قررت تبيع البيت اللي سجلة جدي ابو ابويا باسمها كنوع من التعويض و و تسكن بغير مكان بس بيت جدي مقبلو وبعد تقريبا سنة ونص بيبتي ماتت من كد القهر على وضعنا وابويا خاصة هو المدلل عدها وبعدها لحكها جدي من صار عمري ٤ سنوات
ومن ذاك اليوم وامي تدور لاحد يشتري بيتها حتى تاخذ غيرة وحسب مجانت تحجيلي دائما تفتقد بيبي وجدو لان جانو يحبوها ويداروها ومن ماتو كلش تاذت عليهم
والبيت اللي سكنت بي هو نفسة اللي لكيت بي در وشفتها لاول مرة من اجوي يسلمون علينا باعتبارنا سكان جدد وصارت علاقتنا كلش قوية مثل الاهل واكثر ..
بالبداية امي جانت تعاني لان ما عدها شغل ولا مكملة دراستها حتى تتوظف وبيوم ام در طرحت عليها فكرة باعتبارها تعرف عدها مبلغ شوي زين فحتى لا يضيع كلة بالمصرف وع البيت ويطير منها اقترحت عليها انه تشارك ابو در بشغلة بنسبتها هي وشيجي ارباح هو يقسمها بيناتهم والحمدلله صار وضعنا المادي مرتاح اكثر ..

طلعت برة بساحة المستشفى كعدت على مصطبة كونكريت وحسيت محتاج ابجي
- فريد ليش البجي ؟؟؟
- حتروح مني
- لا تحجي هيج كلها كم يوم وتطيب وترجع احسن من اول
- در ما اتحمل خسارتها اني من بعدها ما عندي كل احد
- واني ؟
-انت !
انت يجي يوم وتعوفيني وتلتهين بحياتج مثل ما هسة ملتهية
- اني مملتهية بس انت تعرف الصار
-شنو اللي صار اعترفتلج بمشاعري استاهل تتركيني هيج ؟
- لا بس ما ادري ..
شوف انسى الصار وكل الحجي
خلينا نرجع طبيعين واصدقاء
- محتاجلج در لا تعوفيني ابد بعد
- لا ما اعوفك وباقية يمك
كوم غسل وجهك وتعال اطلبلك شي تاكل ما اكلت من الصبح انت
-ما اشتهي
- ماكو ما اشتهي اسمع الكلام امشي وياية
- اوكي
رحنا اني وياها للكافتريا وجابت اكل وكلاصين جاي
بديت اكل بلفتي وانتبهت عليها مدتاكل بس تشرب جاي
-ليش متاكلين ؟
- شو نفسي انسدت
- هاي من الجوع اكلي يلة
- ماشي
اكلت شوية وعافتة واني هم ووراها رجعنا ليم امي و جانو بعدهم ديسوولها فحوصات ..