ع الهوى

١١

#ع_الهوى١١
Shahd Alsalman
رحت لفريد بعد مخلصت شغلي وجانت خالة كاعدة وديوكلها
-مساء الخير
- مساء النور هلا
- هلا بيك
خالة شلونج اليوم
- الحمدلله حبيبتي
- الحمدلله اليوم وجهج احسن
بس شو مماكلة شي من اكلج
- ما اريد يمة ما اشتهي
-متشتهين شنو
شو وخري خل اني اوكلج من ايدي هذا فريد ميعرف يوكلج
- ها هسة صرت ما اعرف
- شفهمك شو وخر
- تفضلي عيني
شاورت خالة لا تفشليني كدامة اكلي حتى لو كم لكمة هسة يشمت بية
ضحكت هي وكالت متكبرون انتو
بديت اوكلها لكمة ورة لكمة وهي تضحك و حسيت بفريد كلش مرتاح وراها اخذت دواها واجتي الممرضة انطتها ابرة وراحت
شفتها نعست كمت غطيتها وطلعت اني وفريد من الغرفة
- تعبتج وياية لوما انت ولا جان اكلت
- قشمرها متعرف تقشمرها
- حتى لو اعرف؛
هي تحبج هواية اكثر مني
- ههههههه جنك دتغار
- لا ليش اغار اني ابنها على عنادج
- لا ابد مغيران هههههههه
- ههههههه شسويتي اليوم
- ماكو شغل كالعادة رتبت التقارير السويتها وطلعت تسجيلات قديمة كلت استغلها حتى اسوي كم حلقة باعتبارك مجاز
- جيبي المواضيع حتى اسويلج اعداد هنا ومن تجين اخذيها مني
- ابد مالك علاقة بشي خليك ويا خالة واني اعرف ادبر اموري
ايسر ونادين وياية همين
- الحمدلله اكلج
- ها عيني
- ايسر شبي ؟
- شبي
- بارحة خابرتة دا اسالة عليج وعبالك جان متوتر صاير شي وياه
- لا بس متلاغي ويا المدير علمود الوقت مو تعرفة ميحب يجي من وكت والمدير ميحب التاخير
- امممم خوش
- متروح للبيت؟
- لا باقي روحي انت ارتاحي
- روح ومن ترجع اني ارجع للبيت لا تعاند
- اوكي
شنو هاي بيدج الزراك
- مطخوخة مدري وين
- تاذيج خاف بيها فطر شي خل نشوفها
- هههه يا فطر ما بيها شي يومين وتروح
- منتبهتي يعني
- عادي مو شايفني شلون امشي واهف بالمشية عبالك جندي
- هههه هم صدك ياما وياما ركضت وراج وانت بس تمشين بسرعة ميحتاج تركضين
-هههه يلة كوم كافي سوالف
- خوش دكي علية اذا صار شي
-ان شاء الله
- باي
- بيباي
طلع فريد ورجع للبيت بقيت لوحدي ويا خالة دك علية ايسر
- در شوكت اشوفج
- اني هسة بالمستشفى
- يا مستشفى بلا زحمة !؟
- يم خالة ام فريد وفريد راح يرتاح
- اعرف هناك باوعي
ولا اكلج اني جاي
-ماشي هلا بيك بس ليش متجي من يرجع فريد
- اني مجاي على فريد جاي علمودج
- ايسر يعني مو وكتها والله
- يلة اني جاي باي
- اوكي باي
بعد ساعتين تقريبا وصل ايسر وجنت كاعدة بالانتظار
- هلو در
- هلو ايسر اكعد
شو تاخرت
- ازدحام شوارع
شلونج
- الحمدلله
- انت مو المفروض هسة بالبيت !؟
- ايسر اني مو كتلك راجعة يم فريد بعد ليش تحجي هواية بالموضوع
- لان هالشي غلط
- لا مو غلط
- باوعي الج مهلة منا لدقيقتين اذا مرحتي ازعل عليج والله
- اهووو ايسر شبيك ما اكدر خالة وحدها
- اني باقي رجعي
- مترهم عيب من فريد واصلا خالة متعرفك بس بالاسم
- يعني حيزعل فريد !؟؟؟
- اي حيزعل
- خوش لعد اترخص اني
مو مال واحد يحجي وياج
- ايسر كافي عليك الله
كام من يمي وكمت وراه سحبتة من ردان قميصة حتى اوكفة
واجة فريد بس شفت وجهة ميتفسر وانتبهت بعدني لازمة قميصة وخرت ايدي وتسالمو بيناتهم بس عيونة بيهن علامات استفهام على هاللقطة اللي شافها باعتباري حتى سلام ما اسلم بالايد ف شلون لزمت ردان قميصة
حاولت الم الموضوع وكتلة ايسر اجة يشوفك عبالة انت هنا وهو بس يهز براسة وصافن علينا وحتى لا يسالني ويحجي وياية كتلة لايسر يرجعني وياه للبيت تحججت بالتعب وزاد هالشي من استغراب فريد اكثر رفع حواجبة وكالي على راحتكم
طلعت من المستشفى وكلبي يدك الف دكة بالدقيقة ولمت ايسر على جيتة وهو كالي احسن هيج حتى ترجعين
بس اكيد فريد مراح يفوتها ولا يعديها سلامات اذا ميسالني واذا ميعرف سبب جية ايسر للمستشفى خاصة انه ما بقى هواية بسرعة اخذني وطلع ..
ثاني يوم مر سلامات لان اخذت وياية ماما مخليتلة مجال يحجي واعرف عيونة ونبرة صوتة كلها متغيرة ومراضية عني
واليوم الثالث نزل ضغط خالة والدكتورة كالت راح نبلش بتحضيرها للعمليات
فريد على اعصابة وممتحمل حجاية وكل شي بهاي المرحلة صعب لان بالنسبة الها العملية خطرة ومو بهاي السهولة بس هي من واجبها تسوي كل شي حتى تعالجها ؛
صار وكت العملية ام فريد ودعتة بدموعها ووصتني علي وحتى وصتة علية
امنتها امي برب العالمين والرسول وراحت فاتت الغرفة
وبقى فريد قريب من الباب
سحبة بابا وكعدة يمة وخلاه يلزم قران حتى يقرالها شي منة
فتح القران ونزلت دموعة مكدرت اشوفة بهاي الحالة وكعدت يمة تمنيت لو اكدر احضنة واخذة بعيد حتى ميتوجع هلكد
هو و ديقرة دكلي ايسر راسا انتبه على شاشة تلفوني وغطيتة بحركة سريعة حتى لا يقراه كمت من يمة وطلعت برة حتى احجي وياه ..

لا تنسون التصويت اعزائي